101 ಅಡಿ ಎತ್ತರದ ಮಾದಪ್ಪ ಪ್ರತಿಮೆಗೆ ಶಂಕು

ಹನೂರು: ಶ್ರೀ ಕ್ಷೇತ್ರ ಮಲೆ ಮಹದೇಶ್ವರ ಬೆಟ್ಟದ ದೀಪದಗಿರಿ ಒಡ್ಡುವಿನಲ್ಲಿ 101 ಅಡಿ ಎತ್ತರದ ಮಹದೇಶ್ವರ ಪ್ರತಿಮೆ ನಿರ್ಮಾಣ ಕಾಮಗಾರಿಗೆ ಮಲೆ ಮಹದೇಶ್ವರ ದೇಗುಲ ಅಭಿವೃದ್ಧಿ ಪ್ರಾಧಿಕಾರದ ಕಾರ್ಯದರ್ಶಿ ಗಾಯತ್ರಿ ಚಾಲನೆ ನೀಡಿದರು. ಬಳಿಕ ಮಾತನಾಡಿದ ಅವರು, 20 ಕೋಟಿ ವೆಚ್ಚದಲ್ಲಿ 101 ಅಡಿ ಎತ್ತರದ ಪ್ರತಿಮೆ ನಿರ್ಮಿಸಲು ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿದ್ದ ವೇಳೆಯಲ್ಲಿಯೇ 2016ರಲ್ಲಿ ಭೂಮಿಪೂಜೆ ನೆರವೇರಿಸಲಾಗಿತ್ತು.

ಆದರೆ, ಕಾಮಗಾರಿಗೆ ಅವಶ್ಯಕವಾಗಿದ್ದ ಜಮೀನಿನ ಪೈಕಿ ಒಂದು ಎಕರೆ ಜಮೀನು ಖಾಸಗಿ ರೈತನಿಗೆ ಸೇರಿದ್ದರಿಂದ ಅವರಿಂದ ಖರೀದಿ ಪ್ರಕ್ರಿಯೆ ನಡೆಸಲು ವಿಳಂಬವಾಗಿತ್ತು. ಇದೀಗ ರೈತರಿಂದ ಜಮೀನನ್ನು ನೇರ ಖರೀದಿ ಮೂಲಕ ಖರೀದಿಸಿ ಕಾಮಗಾರಿಗೆ ಚಾಲನೆ ನೀಡಲಾಗುತ್ತಿದೆ ಎಂದು ತಿಳಿಸಿದರು.

ಪ್ರವಾಸಿಗರ ಆಕರ್ಷಣೆ: ದೀಪದಗಿರಿ ಒಡ್ಡುವಿನಲ್ಲಿ 101 ಅಡಿ ಎತ್ತರದ ಮಹದೇಶ್ವರರ ಪ್ರತಿಮೆ ನಿರ್ಮಾಣದ ಜೊತೆಗೆ ಸುತ್ತಲಿನ 20 ಎಕರೆ ಭೂಮಿಯನ್ನು ಅಭಿವೃದ್ಧಿಪಡಿಸಿ ಈ ಪ್ರದೇಶದಲ್ಲಿ ಧ್ಯಾನಮಂದಿರ, ಪ್ರಕೃತಿ ಚಿಕಿತ್ಸಾ ಕೇಂದ್ರ, ಆಯುರ್ವೇದ ಔಷಧಾಲಯ ಮತ್ತು ಆಯುರ್ವೇದ ಗಿಡಗಳ ನರ್ಸರಿ, ಭಕ್ತಾದಿಗಳಿಗೆ ಶೌಚಾಲಯ ಮತ್ತು ಪಾರ್ಕಿಂಗ್‌ ವ್ಯವಸ್ಥೆ ಸೇರಿದಂತೆ ಸಕಲ ವ್ಯವಸ್ಥೆಯನ್ನು ಕಲ್ಪಿಸಿ ಮಹದೇಶ್ವರನ ಭಕ್ತಾದಿಗಳ ಜೊತೆ ಪ್ರವಾಸಿಗರನ್ನೂ ಆಕರ್ಷಿಸುವ ಮಹತ್ವಾಕಾಂಕ್ಷೆಯ ಯೋಜನೆಯಾಗಿದೆ ಎಂದರು.

ಪಿಎಸ್‌ಎಪಿ ಕಂಪನಿಗೆ ನಿರ್ಮಾಣ ಹೊಣೆ: 101 ಅಡಿ ಎತ್ತರದ ಪ್ರತಿಮೆ ನಿರ್ಮಾಣ ಕಾಮಗಾರಿಯನ್ನು ಗದಗ ಮೂಲದ ಪಿಎಸ್‌ಎಪಿ ಆರ್ಕಿಟೆಕ್ಟ್ ಕಂಪನಿಗೆ ನೀಡಲಾಗಿದ್ದು, ಕಾಮಗಾರಿಯನ್ನು ಮುಂದಿನ ಎರಡೂವರೆ ವರ್ಷಗಳ ಅವಧಿಯಲ್ಲಿ ಮುಕ್ತಾಯಗೊಳಿಸುವಂತೆ ನಿರ್ದೇಶಿಸಲಾಗಿದೆ.

ಈ  ಪಿಎಸ್‌ಎಪಿ ಕಂಪನಿ ಪ್ರಸಿದ್ಧ ಪ್ರವಾಸಿ ತಾಣ ಮುರುಡೇಶ್ವರದಲ್ಲಿ ಈಶ್ವರ ಪ್ರತಿಮೆ ಮತ್ತು ಗದಗದ ಬಸವೇಶ್ವರ ಪ್ರತಿಮೆಯನ್ನು ಯಶಸ್ವಿಯಾಗಿ ನಿರ್ಮಿಸಿರುವ ಸಂಸ್ಥೆಯಾಗಿದೆ ಎಂದರು. ಈ ಸಂದರ್ಭದಲ್ಲಿ ಲೋಕೋಪಯೋಗಿ ಇಲಾಖೆ ಅಭಿಯಂತರ ಕುಮಾರ್‌, ಆಗಮಿಕರಾದ ಕರವೀರಸ್ವಾಮಿ, ಪಿಎಸ್‌ಎಪಿ ಕಂಪನಿಯ ಮಾಲತೇಶ್‌, ಪ್ರಾಧಿಕಾರದ ಅಧಿಕಾರಿ ಮತ್ತು ಸಿಬ್ಬಂದಿ ವರ್ಗ ಹಾಜರಿದ್ದರು.

ಮಹದೇವ ಪ್ರಸಾದ್‌ ಕನಸು: ಮಲೆ ಮಹದೇಶ್ವರ ಬೆಟ್ಟದಲ್ಲಿ 101 ಅಡಿ ಎತ್ತರದ ಪ್ರತಿಮೆ ನಿರ್ಮಿಸುವುದು ಮಾಜಿ ಸಚಿವ ಮಹದೇವ ಪ್ರಸಾದ್‌ ಕನಸಿನ ಕೂಸಾಗಿತ್ತು. ಈ ಯೋಜನೆಯನ್ನು ಅತಿ ಶೀಘ್ರವಾಗಿ ಪ್ರಾರಂಭಿಸಬೇಕು ಎಂದು ಅಂದಿನ ಪ್ರಾಧಿಕಾರದ ಕಾರ್ಯದರ್ಶಿಯಾಗಿದ್ದ ಭಾರತಿ ಅವರಿಗೆ ಸೂಚಿಸಿದ್ದರು.

ಆದರೆ, 2017ರ ಜನವರಿಯಲ್ಲಿ ಮಹದೇವಪ್ರಸಾದ್‌ ಕಾಲವಾದ ಬಳಿಕ ಕಾಮಗಾರಿ ನನೆಗುದಿಗೆ ಬಿದ್ದಿತ್ತು. ಬಳಿಕ ಅವರ ಪತ್ನಿ ಗೀತಾ ಸಚಿವೆಯಾದಾಗ ಈ ಬಗ್ಗೆ ಗಮನಹರಿಸುವಂತೆಯೂ ಕೋರಲಾಗಿತ್ತು. ಅಲ್ಲದೇ ಪ್ರತಿ ಬಾರಿ ಪ್ರಾಧಿಕಾರದ ಸಭೆಗಳನ್ನು ಆಯೋಜಿಸಿದಾಗಲೂ ಶಾಸಕ ನರೇಂದ್ರ ಅವರು ಪ್ರಾಧಿಕಾರದ ಅಧಿಕಾರಿಗಳಿಗೆ ಸೂಚನೆ ನೀಡುತ್ತಲೇ ಬರುತ್ತಿದ್ದರು.

ಆದರೆ, ಕಾಮಗಾರಿ ಪ್ರಾರಂಭ ಹಂತದಲ್ಲಿಯೇ ಇದ್ದುದರಿಂದ ಭಕ್ತಾದಿಗಳು ಆಗಾಗ್ಗೆ ಬೇಸರವನ್ನೂ ವ್ಯಕ್ತಪಡಿಸಿದ್ದರು. ಇದೀಗ ಕಾಮಗಾರಿ ಪ್ರಾರಂಭವಾಗಿರುವುದು ಮಹದೇಶ್ವರನ ಭಕ್ತಾದಿಗಳು ಮತ್ತು ಮಹದೇವ ಪ್ರಸಾದ್‌ ಅಭಿಮಾನಿಗಳಲ್ಲೂ ಸಂತಸ ಮೂಡಿಸಿದೆ.

20 ಅಡಿ ಪೀಠ, 80 ಅಡಿ ಪ್ರತಿಮೆ: ಪ್ರತಿಮೆಯನ್ನು 101 ಅಡಿ ನಿರ್ಮಿಸಲು ಉದ್ದೇಶಿಸಲಾಗಿದ್ದು, ಈ ಪೈಕಿ 20 ಅಡಿ ಎತ್ತರಕ್ಕೆ ಪೀಠದ ಮಾದರಿ ಗುಹೆ ನಿರ್ಮಿಸಲಾಗುವುದು. ಈ ಗುಹೆಯಲ್ಲಿ 24 ವಿಭಾಗಗಳು ಇರಲಿದ್ದು, ಇವುಗಳಲ್ಲಿ ಮಹದೇಶ್ವರರಿಗೆ ಸಂಬಂಧಿಸಿದ ಇತಿಹಾಸ ಇರುವ ಗೋಡೆ ಬರಹಗಳನ್ನು ಮತ್ತು ಮಹದೇಶ್ವರರಿಗೆ ಸಂಬಂಧಿಸಿದ ಆಡಿಯೋಗಳನ್ನು ಬಿತ್ತರಿಸುವ ವ್ಯವಸ್ಥೆ ಮಾಡಲಾಗುವುದು.

ಈ 20 ಅಡಿ ಪೀಠದ ಮೇಲೆ 80 ಅಡಿ ಮಹದೇಶ್ವರರ ಪ್ರತಿಮೆಯನ್ನು ಹುಲಿಯ ಮೇಲೆ ಕುಳಿತಿರುವ ಮಾದರಿಯಲ್ಲಿ ಪ್ರತಿಷ್ಠಾಪಿಸುವ ಯೋಜನೆಯಾಗಿದೆ ಎಂದು ಪ್ರಾಧಿಕಾರದ ಕಾರ್ಯದರ್ಶಿ ಗಾಯತ್ರಿ ತಿಳಿಸಿದರು.