Bills: ಮಸೂದೆಗಳಿಗೆ ಹಿಂದಿ ಹೆಸರು ತಪ್ಪಲ್ಲ, ಅಸಾಂವಿಧಾನಿಕವಲ್ಲ ಎಂದ ಸಮಿತಿ

ಹೊಸದಿಲ್ಲಿ: ಕೇಂದ್ರ ಸರಕಾರ ತಿದ್ದುಪಡಿ ಮಾಡಲು ಉದ್ದೇಶಿಸಿರುವ ಮೂರು ಅಪರಾಧ ದಂಡ ಸಂಹಿತೆ ಮಸೂದೆಗಳಿಗೆ ಹಿಂದಿ ಹೆಸರು ಇರಿಸಿದ್ದನ್ನು ಗೃಹ ಖಾತೆಗಾಗಿನ ಸಂಸತ್‌ನ ಸ್ಥಾಯಿ ಸಮಿತಿ ಸಮರ್ಥಿಸಿ, ಒಪ್ಪಿಗೆ ನೀಡಿದೆ. ಸುಪ್ರೀಂ ಕೋರ್ಟ್‌, ಹೈಕೋರ್ಟ್‌ ಗಳು, ಕಾಯ್ದೆಗಳು, ಮಸೂದೆಗಳು ಹಾಗೂ ಇತರ ಕಾನೂನು ದಾಖಲೆಗಳಲ್ಲಿ ಆಂಗ್ಲ ಭಾಷೆಯನ್ನು ಬಳಸಬೇಕು ಎಂದು ಸಂವಿಧಾನದ 348ನೇ ವಿಧಿ ಹೇಳುತ್ತದೆ.

ಅದರಂತೆ, 3 ಪ್ರಸ್ತಾವಿತ ಕ್ರಿಮಿನಲ್‌ ಕಾನೂನುಗಳ ಹೆಸರುಗಳು ಮಾತ್ರ ಹಿಂದಿಯಲ್ಲಿದ್ದು, ಒಳಗಿರುವ ಅಂಶಗಳೆಲ್ಲವೂ ಆಂಗ್ಲ ಭಾಷೆಯಲ್ಲೇ ಇವೆ. ಹೀಗಾಗಿ ಈ ಮಸೂದೆಗಳಲ್ಲಿ ಸಂವಿಧಾನದ 348ನೇ ವಿಧಿಯ ಉಲ್ಲಂಘನೆ ಆಗಿಲ್ಲ. ಇದು ಅಸಾಂವಿಧಾನಿಕವಲ್ಲ ಎಂದು ಬಿಜೆಪಿ ಸಂಸದ ಬೃಜ್‌ಲಾಲ್‌ ನೇತೃತ್ವದ ಸಮಿತಿ ಹೇಳಿದೆ.