ಮಹಿಳೆಯರಿಗೆ ಕಾಟ ಕೊಡುತ್ತಿದ್ದವನ ಸೆರೆ

ಬೆಂಗಳೂರು: ರಾತ್ರಿ ವೇಳೆ ಒಂಟಿ ಮಹಿಳೆಯರ ಮನೆಗಳ ಬಳಿ ಹೋಗಿ ಕಾಲಿಂಗ್‌ ಬೆಲ್‌ ಒತ್ತಿ ಕಿರುಕುಳ ನೀಡುತ್ತಿದ್ದ ಆರೋಪಿಯನ್ನು ಯಲಹಂಕ ಪೊಲೀಸರು ಬಂಧಿಸಿದ್ದಾರೆ. ಚಿಕ್ಕಬೊಮ್ಮಸಂದ್ರ ನಿವಾಸಿ ಆದಿ(25) ಬಂಧಿತ. ಖಾಸಗಿ ಕಂಪೆನಿಯೊಂದರ ಉದ್ಯೋಗಿಯಾಗಿರುವ ಆರೋಪಿ ಕಾಲೇಜುಗಳ ಬಳಿ ಹೋಗಿ ಯುವತಿಯರನ್ನು ಚುಡಾಯಿಸುತ್ತಿದ್ದ.

ಅಷ್ಟೇ ಅಲ್ಲದೇ, ಇತ್ತೀಚೆಗೆ ಚಿಕ್ಕಬೊಮ್ಮಸಂದ್ರದ ಒಂಟಿ ಮನೆಗಳನ್ನು ಗುರುತಿಸಿ ರಾತ್ರಿ ವೇಳೆ ಕಾಲಿಂಗ್‌ ಬೆಲ್‌ ಒತ್ತಿ ಯುವತಿಯರು ಮತ್ತು ಮಹಿಳೆಯರಿಗೆ ಕಿರುಕುಳ ನೀಡುತ್ತಿದ್ದ. ಒಂದು ವೇಳೆ ಯುವತಿಯರು ಯಾರೆಂದು ನೋಡಲು ಹೊರಬಂದರೆ ಅವರ ಜತೆ ಅನುಚಿತವಾಗಿ ವರ್ತನೆ ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಫೆ.19 ರಂದು ರಾತ್ರಿ 8 ಗಂಟೆ ಸುಮಾರಿಗೆ ಚಿಕ್ಕಮೊಮ್ಮಸಂದ್ರ ನಿವಾಸಿ ಶೇಖರ್‌ ಪೂಜಾರಿ ಎಂಬುವರ ಮನೆಗೆ ಹೋಗಿದ್ದ ಆರೋಪಿ ಮನೆಯ ಕಾಲಿಂಗ್‌ ಬೆಲ್‌ ಒತ್ತಿದ್ದಾನೆ. ಈತನನ್ನು ಕಿಟಕಿಯಲ್ಲೇ ನೋಡಿದ ಶೇಖರ್‌ ಪೂಜಾರಿ ಸಹೋದರಿಯರು ಬಾಗಿಲು ತೆರೆದಿಲ್ಲ.

ಬಳಿಕ ಅದೇ ರಸ್ತೆಯ ಮತ್ತೂಂದು ಮನೆಗೆ ತೆರಳಿದ ಆರೋಪಿ ಇದೇ ರೀತಿ ಮಾಡಿದ್ದು, ಮನೆಯ ಯಜಮಾನರು ಹೊರಬಂದಾಗ ಇಲ್ಲದ ಸಬೂಬು ಹೇಳಿ ಕಾಲ್ಕಿತ್ತಿದ್ದಾನೆ. ಒಂದೆರಡು ದಿನಗಳ ಬಳಿಕ ಮತ್ತೆ ಇದೇ ರೀತಿ ವರ್ತಿಸಿದಾಗ ಶೇಖರ್‌ ಪೂಜಾರಿ ಪ್ರಶ್ನಿಸಿದ್ದು, ಹಲ್ಲೆಗೆ ಮುಂದಾಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.