10 ವರ್ಷದ ಹಿಂದಿನ ಲೆಕ್ಕ ವ್ಯತ್ಯಾಸ: ಬಿಸಿಸಿಐಗೆ ತಲೆಬಿಸಿ

ಮುಂಬಯಿ: ಪ್ರಸ್ತುತ ರದ್ದಾಗಿರುವ ಚಾಂಪಿಯನ್ಸ್‌ ಲೀಗ್‌ ಟಿ20 ಕೂಟದ ಆರ್ಥಿಕ ಲೆಕ್ಕಾಚಾರದಲ್ಲಿ ವ್ಯತ್ಯಾಸವಾಗಿರುವ ಘಟನೆ ಈಗ ಪತ್ತೆಯಾಗಿದೆ. ಆದ್ದರಿಂದ ಇದನ್ನು ಪತ್ತೆಹಚ್ಚಲು ಬಿಸಿಸಿಐ, ಆರ್‌ಬಿಐ ನೆರವು ಕೋರಿದೆ.

2009ರಲ್ಲಿ ಬಿಸಿಸಿಐ ವಿವಿಧ ದೇಶಿ ತಂಡಗಳು ಹಾಗೂ ಐಪಿಎಲ್‌ನ ಅಗ್ರ 3 ತಂಡಗಳ ನಡುವೆ ಚಾಂಪಿಯನ್ಸ್‌ ಲೀಗ್‌ ಟಿ20 ಪಂದ್ಯಾವಳಿ ನಡೆಸುತ್ತಿತ್ತು. ಆ ವೇಳೆ ಕ್ರಿಕೆಟ್‌ ಆಸ್ಟ್ರೇಲಿಯದಿಂದ 2 ಕೋಟಿ ರೂ. ಬಿಸಿಸಿಐಗೆ ಬರಬೇಕು ಎಂಬ ಬಿಸಿಸಿಐನ ಲೆಕ್ಕಪತ್ರದಲ್ಲಿ ತೋರಿಸಲಾಗಿದೆ.

ಇದನ್ನು ಕ್ರಿಕೆಟ್‌ ಆಸ್ಟ್ರೇಲಿಯದ ಬಳಿ ವಿಚಾರಿಸಿದಾಗ 2015ರ ವೇಳೆ ಎಲ್ಲ ಹಳೆಯ ಬಾಕಿಯನ್ನು ತೀರಿಸಲಾಗಿದೆ ಎಂದು ಅದು ಮಾಹಿತಿ ನೀಡಿದೆ. ಇದರಿಂದ ಗೊಂದಲಗೊಂಡಿರುವ ಬಿಸಿಸಿಐ ಆಡಳಿತಾಧಿಕಾರಿಗಳು, ಇದರ ಸತ್ಯಾಸತ್ಯತೆ ತಿಳಿಯಲು ರಿಸರ್ವ್‌ ಬ್ಯಾಂಕ್‌ ಆಫ್ ಇಂಡಿಯಾದ ನೆರವು ಕೋರಿದ್ದಾರೆ.