ಬೆಂಗಳೂರು ಮಧ್ಯರಾತ್ರಿ ಮ್ಯಾರಥಾನ್‌ ನಿಮಗೊತ್ತೆ?

ಸಾಮಾನ್ಯವಾಗಿ ಮ್ಯಾರಥಾನ್‌ ಬೆಳಗ್ಗೆ ನಡೆಯುವುದನ್ನು ನಾವೆಲ್ಲರು ನೋಡಿದ್ದೇವೆ. ಆದರೆ ಮ್ಯಾರಥಾನ್‌ ಇತಿಹಾಸದಲ್ಲೇ ಮೊದಲ ಬಾರಿಗೆ ಮಧ್ಯರಾತ್ರಿ ಮ್ಯಾರಥಾನ್‌ ಆಯೋಜಿಸಿದ ಕೀರ್ತಿ ರೋಟರಿ ಐಟಿ ಕಾರಿಡಾರ್‌ಗೆ ಸಲ್ಲುತ್ತದೆ. ಇದೀಗ ಸಂಘಟಕರು ಬೆಂಗಳೂರಿನಲ್ಲಿ 13ನೇ ಆವೃತ್ತಿ ಮಧ್ಯರಾತ್ರಿ ಮ್ಯಾರಥಾನ್‌ ಅನ್ನು ಡಿ.7ರಂದು ಆಯೋಜಿಸಲು ತೀರ್ಮಾನಿಸಿದ್ದಾರೆ. ವೈಟ್‌ಫೀಲ್ಡ್‌ನಲ್ಲಿ ಸಂಜೆಯಿಂದ ಬೆಳಗ್ಗಿನ ತನಕ ವಿವಿಧ ವಿಭಾಗಗಳಲ್ಲಿ ಮ್ಯಾರಥಾನ್‌ ನಡೆಯಲಿದೆ.

ಆಸ್ಟ್ರೇಲಿಯ, ಅಮೆರಿಕ, ಕೀನ್ಯಾ, ಇಥಿಯೋಪಿಯಾ ಸೇರಿದಂತೆ ಒಟ್ಟಾರೆ 4 ಸಾವಿರಕ್ಕೂ ಅಧಿಕ ಮಂದಿ ಸ್ಪರ್ಧಿಗಳು ಪಾಲ್ಗೊಳ್ಳಲಿದ್ದಾರೆ. ಹಿಂದೆ ಬ್ಯಾಡ್ಮಿಂಟನ್‌ ಆಟಗಾರ್ತಿ ಸೈನಾ ನೆಹ್ವಾಲ್‌, ಬಾಕ್ಸಿಂಗ್‌ ತಾರೆ ಮೇರಿ ಕೋಮ್‌, ಫ್ಲೈಯಿಂಗ್‌ ಸಿಖ್‌ ಖ್ಯಾತಿಯ ಮಿಲ್ಕಾ ಸಿಂಗ್‌, ಟೆನಿಸ್‌ ದಿಗ್ಗಜ ಮಹೇಶ್‌ ಭೂಪತಿ ಸೇರಿದಂತೆ ಅನೇಕ ಕ್ರೀಡಾ ತಾರೆಯರು ಮಧ್ಯರಾತ್ರಿ ಮ್ಯಾರಥಾನ್‌ನಲ್ಲಿ ಭಾಗವಹಿಸಿರುವುದು ವಿಶೇಷ.