ಕಲೆ ಅಳಿಸುವ ಕಲೆ

ಹಾಲು ಒಡೆಯಲು ಒಂದು ಹನಿ ಹುಳಿ ಸಾಕು. ಹಾಗೆಯೇ, ಬಟ್ಟೆ ಹಾಳಾಗಲು ಒಂದು ಚಿಕ್ಕ ಕಲೆ ಸಾಕು. ಅದರಲ್ಲೂ ಹೊಸ ಬಟ್ಟೆ ಮೇಲೆ ಕಲೆ ಆಗಿಬಿಟ್ಟರಂತೂ, ಧರಿಸುವಂತಿಲ್ಲ, ಬಿಡುವಂತಿಲ್ಲ ಎಂದು ಪೇಚಾಡುವ ಪರಿಸ್ಥಿತಿ. ಕಠಿಣ ಕಲೆಯನ್ನು ಅಳಿಸುವುದು ಸವಾಲಿನ ಕೆಲಸವೇ. ಆ ಸವಾಲನ್ನು ಸ್ವಲ್ಪ ಸುಲಭ ಮಾಡುವಂಥ ಟಿಪ್ಸ್‌ಗಳು ಇಲ್ಲಿವೆ. ಯಾವ ಕಲೆಗೆ, ಯಾವುದು ರಾಮಬಾಣ ಅಂತ ನೋಡಿ…

-ಆಯಿಲ್‌ ಪೇಂಟ್‌, ಗ್ರೀಸ್‌
ಆಯಿಲ್‌ ಪೇಂಟ್‌ ಹತ್ತಿದ ಬಟ್ಟೆಯನ್ನು, ಸೀಮೆಎಣ್ಣೆಯಲ್ಲಿ ಒಂದು ಗಂಟೆ ನೆನೆಸಿಟ್ಟು, ಬಟ್ಟೆ ಸೋಪ್‌/ಪೌಡರ್‌ನಿಂದ ತೊಳೆದರೆ ಕಲೆ ಹೋಗುತ್ತದೆ.

-ಲಿಪ್‌ಸ್ಟಿಕ್‌
ಲಿಪ್‌ಸ್ಟಿಕ್‌ ಕಲೆಯ ಅಂಟಿರುವ ಜಾಗಕ್ಕೆ ಗ್ಲಿಸರಿನ್‌ ಹಚ್ಚಿ, ಕಲೆ ಸಂಪೂರ್ಣವಾಗಿ ಹೋಗುವವರೆಗೆ ಉಜ್ಜಿ, ನಂತರ ಸೋಪ್‌ ಹಾಕಿ ತೊಳೆಯಿರಿ.

-ರಕ್ತ
ಬಟ್ಟೆಯ ಮೇಲೆ ರಕ್ತ ಬಿದ್ದ ತಕ್ಷಣ, ಉಪ್ಪುನೀರಿನಿಂದ ತೊಳೆದರೆ ಕಲೆ ಉಳಿಯುವುದಿಲ್ಲ. ಇಲ್ಲದಿದ್ದರೆ, ಉಪ್ಪಿನ ನೀರಿನಲ್ಲಿ ಒಂದೆರಡು ಗಂಟೆ ನೆನೆಸಿಟ್ಟು, ನಂತರ ತೊಳೆದರೆ ಕಲೆ ಹೋಗುತ್ತದೆ.

-ಟೀ, ಕಾಫಿ
ಕಲೆ ಆಗಿರುವ ಜಾಗಕ್ಕೆ ಎತ್ತರದಿಂದ ಬಿಸಿ ನೀರನ್ನು ಚೆಲ್ಲಿ. ನಂತರ, ಬಿಸಿ ಸೋಪಿನ ನೀರಿನಲ್ಲಿ ತೊಳೆಯಬೇಕು.

-ಶಾಯಿಯ ಬಣ್ಣ
ಟೊಮೇಟೋ ತುಂಡಿನಿಂದ, ಕಲೆಯಿರುವ ಭಾಗವನ್ನು ಚೆನ್ನಾಗಿ ಉಜ್ಜಿ. ನಂತರ ಕಲೆಯ ಭಾಗಕ್ಕೆ ಉಪ್ಪು ಲೇಪಿಸಿ, ತಣ್ಣೀರಿನಲ್ಲಿ ತೊಳೆಯಿರಿ. ಕಲೆಯಿರುವ ಭಾಗವನ್ನು ಅರ್ಧ ಗಂಟೆ ಮೊಸರಿನಲ್ಲಿ ನೆನೆಸಿಟ್ಟು, ನಂತರ ತೊಳೆದರೂ ಸರಿಯೇ.

-ಎಲೆ ಅಡಿಕೆ ರಸ
ಬಟ್ಟೆಯ ಮೇಲೆ ಎಲೆ ಅಡಿಕೆ ರಸವೇನಾದರೂ ಬಿದ್ದಿದ್ದರೆ, ಆ ಜಾಗಕ್ಕೆ ಸೀಬೆಕಾಯಿ ರಸ ಹಚ್ಚಿ, ಚೆನ್ನಾಗಿ ಉಜ್ಜಿ ಆನಂತರ ತೊಳೆಯಬೇಕು.

-ಎಣ್ಣೆ
ಕಲೆಯಾಗಿರುವ ಭಾಗವನ್ನು ಹೀರಿಕೊಳ್ಳುವಂತೆ ಸೀಮೆ ಸುಣ್ಣ, ಫೇಸ್‌ ಪೌಡರ್‌, ಟಾಲ್ಕಮ್‌ ಪೌಡರ್‌ನಂಥ ವಸ್ತುಗಳಿಂದ ಪುಡಿಯನ್ನು ಹರಡಬೇಕು. ಕುದಿಯುವ ನೀರನ್ನು ಬಹಳ ಎತ್ತರದಿಂದ ಸುರಿದು ಸೋಪಿನಿಂದ ತೊಳೆಯಬೇಕು.

-ತುಕ್ಕು
ಲಿಂಬೆ ರಸ ಮತ್ತು ಉಪ್ಪನ್ನು ಬೆರೆಸಿದ ಮಿಶ್ರಣದಲ್ಲಿ ತುಕ್ಕಿನ ಕಲೆ ಇರುವ ಬಟ್ಟೆಯ ಭಾಗವನ್ನು ಸ್ವಲ್ಪ ಹೊತ್ತು ನೆನೆಸಿ, ನಂತರ ಬಟ್ಟೆಯನ್ನು ಬಿಸಿಲಿನಲ್ಲಿ ಒಣಗಿಸಿ. ಇದೇ ರೀತಿ 2-3 ಸಾರಿ ಮಾಡಿದರೆ ಕಲೆ ಹೋಗುತ್ತದೆ.

-ಬಾಲ್‌ ಪಾಯಿಂಟ್‌ ಪೆನ್‌
ಸ್ಪಿರಿಟ್‌ ಅನ್ನು ಲೇಪಿಸಿ ಸರಿಯಾಗಿ ಉಜ್ಜಿ, ಆಮೇಲೆ ಸೋಪಿನಿಂದ ತೊಳೆಯಬೇಕು.

-ಶಿವಲೀಲಾ ಸೊಪ್ಪಿಮಠ