ಇಸ್ರೇಲ್‌ ಪರ ಮತ ಹಾಕಿದ್ದಕ್ಕೆ ಮೋದಿಗೆ ಧನ್ಯವಾದ

ಜೆರುಸಲೇಂ: ವಿಶ್ವಸಂಸ್ಥೆಯ ಆರ್ಥಿಕ ಮತ್ತು ಸಾಮಾಜಿಕ ಸಮಿತಿಯಲ್ಲಿ ಸದಸ್ಯತ್ವ ಕೋರಿ ಪ್ಯಾಲೆಸ್ತೀನ್‌ ಸಮೂಹವು ಮಂಡಿಸಿದ್ದ ನಿಲುವಳಿ ವಿರುದ್ಧ ಭಾರತ ಮತ ಹಾಕಿದ್ದಕ್ಕೆ ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೇತಾನ್ಯಾಹು ಭಾರತದ ಪ್ರಧಾನಿ ನರೇಂದ್ರ ಮೋದಿಗೆ ಧನ್ಯವಾದ ತಿಳಿಸಿದ್ದಾರೆ.
ಪ್ಯಾಲೆಸ್ತೀನ್‌ನ ಶಹೀದ್‌ ಎಂಬ ಸಂಸ್ಥೆಯು ವಿಶ್ವಸಂಸ್ಥೆಯ ಆರ್ಥಿಕ ಮತ್ತು ಸಾಮಾಜಿಕ ಸಮಿತಿಯಲ್ಲಿ ವೀಕ್ಷಕರ ಸ್ಥಾನಮಾನ ಕೋರಿ ಅರ್ಜಿ ಸಲ್ಲಿಸಿತ್ತು. ಸಾಮಾನ್ಯವಾಗಿ ಇಸ್ರೇಲ್‌ ಹಾಗೂ ಪ್ಯಾಲೆಸ್ತೀನ್‌ ವಿಚಾರದಲ್ಲಿ ಭಾರತ ನಿರ್ಲಿಪ್ತ ನಿಲುವು ತಾಳುತ್ತಿತ್ತು. ವಿಶ್ವಸಂಸ್ಥೆಯಲ್ಲಿ ಈ ಕುರಿತ ಯಾವುದೇ ಮತದಾನದಲ್ಲೂ ಮತ ಹಾಕುತ್ತಿರಲಿಲ್ಲ. ಆದರೆ ಈ ವಿಚಾರದಲ್ಲಿ ಭಾರತ ಅಚ್ಚರಿಯ ನಡೆ ಇಟ್ಟಿದ್ದು, ಇಸ್ರೇಲ್‌ಗೆ ಸಂತಸ ತಂದಿದೆ.