ಥಾಣೆ: ನಿರ್ಲಕ್ಷ್ಯ ಅಥವಾ ಪಾನ ಮತ್ತರಾಗಿ ವಾಹನ ಚಲಾಯಿಸುವುದರಿಂದ ಉಂಟಾಗುವ ಅಪಘಾತ ಗಳನ್ನು ತಡೆಗಟ್ಟುವ ಉದ್ದೇಶದಿಂದ ಥಾಣೆ ಪೊಲೀಸರು ಹೊಸ ವರ್ಷದ ಸಂಭ್ರಮಾಚರಣೆ ವೇಳೆ ನಗರದ ಹಲವಾರು ಪ್ರಮುಖ ಫ್ಲೈ ಓವರ್‌ ಗಳನ್ನು ಮುಚ್ಚಲು ನಿರ್ಧರಿಸಿದ್ದಾರೆ.
ಕೋವಿಡ್-19 ಸಾಂಕ್ರಾಮಿಕ ರೋಗ ವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಗುರುವಾರ ಮತ್ತು ಶುಕ್ರವಾರದ ಮಧ್ಯರಾತ್ರಿಯಲ್ಲಿ ಹೊಸ ವರ್ಷದ ಯಾವುದೇ ಸಾರ್ವಜನಿಕ ಆಚರಣೆಯನ್ನು ನಡೆಸದಂತೆ ಮತ್ತು ಆ ಅವಧಿಯಲ್ಲಿ ಕಟ್ಟಡದ ಟೆರೇಸ್‌ಗಳನ್ನು ಮುಚ್ಚುವಂತೆ ಪೊಲೀಸರು ನಗರದ ವಸತಿ ಸೊಸೈಟಿಗಳಿಗೂ ಸೂಚನೆ ನೀಡಿದ್ದಾರೆ.
ಹೊಸ ವರ್ಷವನ್ನು ಸರಳವಾಗಿ ಆಚರಿಸುವಂತೆ, ಜನರಿಗೆ ಹೊರಗೆ ಹೋಗದಂತೆ ಮತ್ತು ಜನಸಂದಣಿಯನ್ನು ತಪ್ಪಿಸುವಂತೆ ಕೇಳಿಕೊಳ್ಳಲಾಗಿದೆ. ಬಿಗು ಬಂದೋಬಸ್ತ್ ಆಯುಕ್ತಾಲಯದಲ್ಲಿರುವ ಎಲ್ಲ ಡಿಸಿಪಿಗಳು, 17 ಸಹಾಯಕ ಪೊಲೀಸ್ ಆಯುಕ್ತರು (ಎಸಿಪಿಗಳು), 128 ಇನ್‌ ಸ್ಪೆಕ್ಟರ್‌ಗಳು, 150 ಸಹಾಯಕ ಪೊಲೀಸ್ ಇನ್‌ಸ್ಪೆಕ್ಟರ್‌ಗಳು, 3,500 ಇತರ ಪೊಲೀಸರು, 950 ಮಹಿಳಾ ಪೊಲೀಸ್ ಸಿಬಂದಿ ಹೊಸ ವರ್ಷದ ಸಂಭ್ರಮಾಚರಣೆ ವೇಳೆ ಕರ್ತವ್ಯದಲ್ಲಿರುತ್ತಾರೆ.
ಇದನ್ನೂ ಓದಿ:ರೂಪಾಂತರಿತ ಕೋವಿಡ್: ವರದಿಯಾಗಿಲ್ಲ
ರಾಜ್ಯ ಮೀಸಲು ಪೊಲೀಸ್ ಪಡೆಯ (ಎಸ್‌ಆರ್‌ಪಿಎಫ್‌) ಮೂರು ಕಂಪೆನಿಗಳು ಮತ್ತು 300 ಹೋಂ ಗಾರ್ಡ್‌ಗಳನ್ನು ಕೂಡ ನಿಯೋಜಿಸಲಾಗಿದೆ. ಬಾರ್‌ಗಳು, ರೆಸ್ಟೋರೆಂಟ್‌ಗಳು ಮತ್ತು ಇತರ ಸ್ಥಳಗಳ ಮೇಲೆ ಪೊಲೀಸರು ನಿಗಾ ಇಡಲಿದ್ದಾರೆ.
