ಗೋಲ್ಡ್‌ಕೋಸ್ಟ್‌: ರಾಷ್ಟ್ರೀಯ ದಾಖಲೆ ಹೊಂದಿರುವ ತೇಜಸ್ವಿನ್‌ ಶಂಕರ್‌ ಕಾಮನ್ವೆಲ್ತ್‌ ಗೇಮ್ಸ್‌ ಹೈಜಂಪ್‌ ಸ್ಪರ್ಧೆಯ ಫೈನಲ್‌ಗೆ ನೆಗೆದಿದ್ದಾರೆ. ಸೋಮವಾರದ ಅರ್ಹತಾ ಸುತ್ತಿನಲ್ಲಿ ಅವರು “ಎ’ ವಿಭಾಗದಲ್ಲಿ ಜಂಟಿ 5ನೆಯವರಾಗಿ ಹಾಗೂ ಒಟ್ಟಾರೆ 9ನೆಯವರಾಗಿ ಕಾಣಿಸಿಕೊಂಡರು.
2.10 ಮೀ. ನೆಗೆತದೊಂದಿಗೆ ಸ್ಪರ್ಧೆ ಆರಂಭಿಸಿದ ಶಂಕರ್‌, ಅಂತಿಮವಾಗಿ 2.21 ಮೀ. ನೆಗೆತದೊಂದಿಗೆ ಅರ್ಹತಾ ಸುತ್ತು ಮುಗಿಸಿದರು. ಸ್ಪರ್ಧೆಯಲ್ಲಿದ್ದ ಯಾರಿಂದಲೂ ಕೂಟದ ನಿಗದಿತ ಗುರಿಯಾದ 2.27 ಮೀ. ದೂರವನ್ನು ತಲುಪಲಾಗಲಿಲ್ಲ. ಟಾಪ್‌-12 ಸ್ಪರ್ಧಿಗಳ ಗರಿಷ್ಠ ನೆಗೆತದ ದೂರ 2.21 ಮೀ. ಆಗಿತ್ತು. ಹೈಜಂಪ್‌ ಫೈನಲ್‌ ಎ. 14ರಂದು ನಡೆಯಲಿದೆ.
21ರ ಹರೆಯದ ತೇಜಸ್ವಿನ್‌ ಶಂಕರ್‌ ಯುವ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಗೆದ್ದ ಹೆಗ್ಗಳಿಕೆ ಹೊಂದಿದ್ದಾರೆ. ಕಳೆದ ತಿಂಗಳು ನಡೆದ “ಫೆಡರೇಶನ್‌ ಕಪ್‌’ ಚಾಂಪಿಯನ್‌ಶಿಪ್‌ನಲ್ಲಿ 2.28 ಮೀ. ಸಾಧನೆಯೊಂದಿಗೆ ರಾಷ್ಟ್ರೀಯ ದಾಖಲೆ ನಿರ್ಮಿಸಿ ಗೋಲ್ಡ್‌ಕೋಸ್ಟ್‌ ಕೂಟಕ್ಕೆ ಅರ್ಹತೆ ಪಡೆದಿದ್ದರು.
ಆಸ್ಟ್ರೇಲಿಯದ ಕ್ರಿಕೆಟಿಗ ಮಿಚೆಲ್‌ ಸ್ಟಾರ್ಕ್‌ ಅವರ ಕಿರಿಯ ಸಹೋದರ ಬ್ರ್ಯಾಂಡನ್‌ ಸ್ಟಾರ್ಕ್‌ ಕೂಡ ಹೈಜಂಪ್‌ ಅರ್ಹತಾ ಸುತ್ತಿನಲ್ಲಿ ಸ್ಪರ್ಧಿಸಿದ್ದು, ತವರಿನ ವೀಕ್ಷಕರಿಂದ ಅಪಾರ ಬೆಂಬಲ ಸಂಪಾದಿಸಿದರು. ಬ್ರ್ಯಾಂಡನ್‌ ಯುತ್‌ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ಸಾಧಕನೂ ಆಗಿದ್ದಾರೆ.
ಹಿಮಾ ಸೆಮಿಫೈನಲ್‌ ಓಟ
ವನಿತೆಯರ 400 ಮೀ. ಹೀಟ್ಸ್‌ನಲ್ಲಿ ಭಾರತದ ಹಿಮಾ ದಾಸ್‌ ಸೆಮಿಫೈನಲ್‌ ತಲಪುವಲ್ಲಿ ಯಶಸ್ವಿಯಾಗಿದ್ದಾರೆ. ಅವರು 52.11 ಸೆಕೆಂಡ್‌ಗಳಲ್ಲಿ ಈ ದೂರವನ್ನು ಕ್ರಮಿಸಿ 8ನೇ ಸ್ಥಾನಿಯಾದರು.
ಆದರೆ ಕರ್ನಾಟಕದ ಭರವಸೆಯ ಓಟಗಾರ್ತಿ ಎಂ.ಆರ್‌. ಪೂವಮ್ಮ ಹೀಟ್ಸ್‌ನಲ್ಲಿ 24ನೇ ಸ್ಥಾನಿಯಾಗಿ ಸ್ಪರ್ಧೆ ಮುಗಿಸಿ ನಿರಾಸೆ ಮೂಡಿಸಿದರು. ಈ ದೂರವನ್ನು ಕ್ರಮಿಸಲು ಪೂವಮ್ಮ 53.72 ಸೆಕೆಂಡ್‌ ತೆಗೆದುಕೊಂಡರು.
