ಲಾಲು ಪುತ್ರ ತೇಜ್‌ಪ್ರತಾಪ್‌ಗೆ ಮದುವೆ; ಕನ್ಯೆ ಯಾರು ಗೊತ್ತೆ?

ಪಾಟ್ನಾ: ಬಿಹಾರ ಮಾಜಿ ಮುಖ್ಯಮಂತ್ರಿ ಆರ್‌ಜೆಡಿ ವರಿಷ್ಠ ಲಾಲು ಪ್ರಸಾದ್‌‌ಯಾದವ್‌ ಅವರ ಹಿರಿಯ ಪುತ್ರ ಮಾಜಿ ಸಚಿವ ತೇಜ್‌ ಪ್ರತಾಪ್‌ ಯಾದವ್‌ ಹೊಸ ಬಾಳಿಗೆ ಕಾಲಿಡುತ್ತಿದ್ದಾರೆ.

ಮಾಜಿ ಸಚಿವರಾಗಿರುವ ಚಂದ್ರಿಕಾ ಪ್ರಸಾದ್‌ ರಾಯ್‌ ಅವರ ಪುತ್ರಿ ಐಶ್ವರ್ಯಾ ರಾಯ್‌ ಎಂಬಾಕೆಯನ್ನು 30 ರ ಹರೆಯದ ತೇಜ್‌ ವಿವಾಹವಾಗುತ್ತಿದ್ದು, ಎಪ್ರಿಲ್‌ 18 ರಂದ ಎಂಗೇಜ್‌ಮೆಂಟ್‌ ನಡೆಯಲಿದ್ದು ಮೇ 12 ಕ್ಕೆ ವಿವಾಹಕ್ಕೆ ಮಹೂರ್ತ ನಿಗದಿಯಾಗಿರುವುದಾಗಿ ವರದಿಯಾಗಿದೆ.

ಬಿಹಾರದ ಮಾಜಿ  ಮುಖ್ಯಮಂತ್ರಿ ದಾರೋಗಾ ಪ್ರಸಾದ್‌ ರಾಯ್‌ ಅವರ ಮೊಮ್ಮಗಳಾಗಿರುವ ಐಶ್ವರ್ಯಾ ಪಾಟ್ನಾದಲ್ಲಿ ಶಾಲಾ ಶಿಕ್ಷಣ ಪೂರೈಸಿದ್ದು, ದೆಹಲಿಯಲ್ಲಿ ಉನ್ನತ ಶಿಕ್ಷಣ ಪಡೆದಿದ್ದಾರೆ. 

ಮದುವೆಯ ಮಾತುಕತೆಯನ್ನು ತೇಜ್‌ ಪ್ರತಾಪ್‌ ತಾಯಿ ರಾಬ್ರಿ ದೇವಿ  ಅವರೆ ಮುಂದೆ ನಿಂತು ಮಾಡಿರುವುದಾಗಿ  ತಿಳಿದು ಬಂದಿದೆ. 

ಬಿಜೆಪಿ ನಾಯಕ ಸುಶೀಲ್‌ ಮೋದಿ ಅವರು ‘ತೇಜ್‌ಪ್ರತಾಪ್‌ ಗೊಂದು ಕನ್ಯೆ ಹುಡುಕಿ . ಯಾವುದೇ ವರದಕ್ಷಿಣೆ ಬೇಡ,  ಅಂಗ ದಾನಕ್ಕಾಗಿ ಪ್ರತಿಜ್ಞೆ ಮಾಡುವುದು ಮತ್ತು ವಿವಾಹಕ್ಕೆಅಡ್ಡಿಯಾಗುವ ಯಾವುದೇ  ಬೆದರಿಕೆಗಳಿಲ್ಲ’ ಎಂದು ವ್ಯಂಗ್ಯವಾಗಿ ಟೀಕೆ ಮಾಡಿದ್ದರು. ಇದಕ್ಕೆ ತಿರುಗೇಟು ನೀಡಿದ್ದ ತೇಜ್‌ಪ್ರತಾಪ್‌  ‘ಸುಶೀಲ್‌ ಮೋದಿ ಮನೆಗೆ ನುಗ್ಗಿ ಅವರ ಪುತ್ರನ ಮದುವೆಯನ್ನು ತಡೆಯುತ್ತೇನೆ’ ಎಂದಿದ್ದರು. ಬಳಿಕ ‘ಮೋದಿ ಅವರೇ ನನಗೊಂದು ಹುಡುಗಿ ಹುಡುಕಲಿ’ ಎಂದು ತಿರುಗೇಟು ನೀಡಿದ್ದರು.