ರಾಹುಲ್‌ ಗಾಂಧಿ ಕರೆ ತಂದಿದ್ದ ವಿಮಾನದಲ್ಲಿ ತಾಂತ್ರಿಕ ದೋಷ

ಹುಬ್ಬಳ್ಳಿ: ಎಐಸಿಸಿ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರನ್ನು ದೆಹಲಿಯಿಂದ ಕರೆ ತಂದು ಹುಬ್ಬಳ್ಳಿಯಲ್ಲಿ ಇಳಿಸಿ ಖಾಲಿಯಾಗಿ ಹಿಂದಿರುಗುತ್ತಿದ್ದ ವಿಶೇಷ ವಿಮಾನದಲ್ಲಿ ತಾಂತ್ರಿಕ ದೋಷ ಕಂಡು ಬಂದಿದ್ದು, ವಿಮಾನವನ್ನು ಹುಬ್ಬಳ್ಳಿ ನಿಲ್ದಾಣದಲ್ಲೇ ನಿಲ್ಲಿಸಲಾಗಿದೆ. 

ರಾಹುಲ್‌ ಅವರು ಚುನಾವಣಾ ಪ್ರಚಾರಾರ್ಥ ಉತ್ತರ ಕನ್ನಡ ಜಿಲ್ಲೆ ಅಂಕೋಲಾಕ್ಕೆ ತೆರಳಲೆಂದು ಗುರುವಾರ ಬೆಳಿಗ್ಗೆ 11:00 ಗಂಟೆ ಸುಮಾರಿಗೆ ದೆಹಲಿಯಿಂದ ವಿಶೇಷ ವಿಮಾನದಲ್ಲಿ ಹುಬ್ಬಳ್ಳಿ ವಿಮಾನ ನಿಲ್ದಾಣಕ್ಕೆ ಆಗಮಿಸಿದರು. ಅನಂತರ, ಹೆಲಿಕಾಪ್ಟರ್‌ ಮೂಲಕ ಅಂಕೋಲಾಕ್ಕೆ ತೆರಳಿದ್ದರು. ರಾಹುಲ್‌ ಅವರನ್ನು ಕರೆ ತಂದಿದ್ದ ವಿಮಾನ ವಾಪಸ್‌ ದಿಲ್ಲಿಗೆ ತೆರಳಲು ಸಿದ್ಧವಾದಾಗ ಅದರಲ್ಲಿ ತಾಂತ್ರಿಕ ದೋಷ ಕಂಡು ಬಂತು.

ವಿಮಾನದ ಪೈಲಟ್‌ ತತ್‌ಕ್ಷಣ ಅದನ್ನು ಗಮನಿಸಿ ವಿಮಾನ ಹಾರಾಟ ಕೈಗೊಳ್ಳದೆ ನಿಲ್ಲಿಸಿದ್ದಾರೆ. ವಿಮಾನ ಕಂಪೆ‌ನಿಯ ತಾಂತ್ರಿಕ ಸಿಬ್ಬಂದಿ ಶುಕ್ರವಾರ ನಗರಕ್ಕೆ ಆಗಮಿಸಿ ತಾಂತ್ರಿಕ ದೋಷ ಪರಿಶೀಲಿಸಲಿದ್ದಾರೆ ಎಂದು ತಿಳಿದು ಬಂದಿದೆ.