ಒಡನಾಡಿಗೆ ಕಣ್ಣೀರಿನ ವಿದಾಯ

ಬೆಂಗಳೂರು: ವ್ಯಕ್ತಿಯನ್ನು ಕೊಲ್ಲಬಹುದು, ವಿಚಾರಗಳನ್ನು ಕೊಲ್ಲಲು ಸಾಧ್ಯವಿಲ್ಲ. ಗೌರಿ ನಿನ್ನೊಂದಿಗೆ ನಾವಿ ದ್ದೇವೆ, ನಿನ್ನ ಬಲಿದಾನ ವ್ಯರ್ಥವಾಗಲು ಬಿಡೆವು…. ರವೀಂದ್ರ ಕಲಾ ಕ್ಷೇತ್ರ ಆವರಣದಲ್ಲಿ ಗೌರಿ ಲಂಕೇಶ್‌ ಅಂತಿಮ ದರ್ಶನ ಪಡೆದ ಒಡನಾಡಿಗಳು, ಪ್ರಗತಿ ಪರ ಸಂಘಟನೆಗಳ ಹೋರಾಟಗಾರರು, ವಿಚಾರವಾದಿಗಳು “ಗೌರಿ ನಿನ್ನ ವಿಚಾರಧಾರೆಗೆ ಸಾವಿಲ್ಲ, ನಿನ್ನ ಹೋರಾಟ ಮುಂದುವರಿಸುತ್ತೇವೆ’ ಎಂಬ ವಾಗ್ಧಾನದೊಂದಿಗೆ ಕಣ್ಣೀರಿನ ವಿದಾಯ ಹೇಳಿದರು.

ದುಷ್ಕರ್ಮಿಗಳ ಗುಂಡಿಗೆ ಬಲಿಯಾದ ಗೌರಿ ಲಂಕೇಶ್‌ ಮೃತದೇಹ ಮರಣೋತ್ತರ ಪರೀಕ್ಷೆ ಮುಗಿಸಿ ಸಾರ್ವಜನಿಕ ದರ್ಶನಕ್ಕೆ ರವೀಂದ್ರ ಕಲಾಕ್ಷೇತ್ರ ಆವರಣ ಪ್ರವೇಶಿಸಿದಾಗ ಒಡನಾಡಿಗಳ ಆಕ್ರಂದನ ಮುಗಿಲು ಮುಟ್ಟಿತು. ಆಸ್ಪತ್ರೆಯಿಂದ ಪಾರ್ಥಿವ ಶರೀರದ ಜತೆ ಯಲ್ಲೇ ಬಂದ ನಟ ಪ್ರಕಾಶ್‌ ರೈ, ತಾಯಿ ಇಂದಿರಾ, ಸಹೋದರ ಇಂದ್ರಜಿತ್‌ ಲಂಕೇಶ್‌, ಸಹೋ ದರಿ ಕವಿತಾ ಅವರು ಆವರಣದಲ್ಲಿ ಗೌರಿ ಆತ್ಮೀಯ ಬಳಗ ಕಂಡು ದು:ಖತಪ್ತರಾದರು. 

ಕಾಲೇಜು ವಿದ್ಯಾರ್ಥಿಗಳು, ರೈತಸಂಘ, ದಲಿತ ಸಂಘರ್ಷ ಸಮಿತಿ, ಕಮುನಿಸ್ಟ್‌ ಪಕ್ಷಗಳ ಕಾರ್ಯಕರ್ತರು, ರಂಗಭೂಮಿ ಕಲಾವಿದರು, ನಿರ್ದೇಶಕರು, ಸಿನಿಮಾ- ಕಿರುತೆರೆ ಕಲಾವಿದರು, ಮಾನವ ಹಕ್ಕುಗಳ ಹೋರಾಟಗಾರರು, ಲೇಖಕರು, ಬರಹಗಾರರು, ಹಲವು ಮಠಾಧೀಶರು ಸೇರಿದಂತೆ ನಾನಾ ಕ್ಷೇತ್ರದವರು ಅಂತಿಮ ನಮನ ಸಲ್ಲಿಸಿದರು.
 
ಎಐ ಸಿಸಿ ಉಸ್ತುವಾರಿ ವೇಣು ಗೋ ಪಾಲ್‌, ಮುಖ್ಯಮಂತ್ರಿ ಸಿದ್ದರಾಮಯ್ಯ, ರವೀಂದ್ರ ಕಲಾಕ್ಷೇತ್ರದ ಆವರಣಕ್ಕೆ ತೆರಳಿ ಪಾರ್ಥೀವ ಶರೀರದ ಅಂತಿಮ ದರ್ಶನ ಪಡೆದು ದುಃಖತಪ್ತ ಕುಟುಂಬ ವರ್ಗದವರಿಗೆ ಸಾಂತ್ವನ ಹೇಳಿದರು. ಮಾಜಿ ಸಿಎಂ ಎಂ.ವೀರಪ್ಪ ಮೊಯಿಲಿ, ಸಚಿವರಾದ ಡಿ.ಕೆ.ಶಿವಕುಮಾರ್‌, ಉಮಾ ಶ್ರೀ, ರಾಮಲಿಂಗಾರೆಡ್ಡಿ, ಸಾಹಿತಿ ದೇವನೂರು ಮಹದೇವ, ಸಚಿವರಾದ ರಾಮಲಿಂಗಾರೆಡ್ಡಿ, ರಮೇಶಕುಮಾರ್‌, ಶಾಸಕ ಜಮೀರ್‌ ಅಹಮದ್‌ ಸೇರಿದಂತೆ ಹಲವರು ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಿದ್ದರು. 

ಮಳೆಯ ನಡುವೆಯೂ ಸಾವಿರಾರು ಮಂದಿ ಸಾಲಿನಲ್ಲಿ ಬಂದು ಅಂತಿಮ ದರ್ಶನ ಪಡೆದರು. “ಗೌರಿ ನಿನ್ನ ಬಲಿದಾನ ವ್ಯರ್ಥವಾಗಲು ಬಿಡೆವು…’ ಎಂದು ಘೋಷಣೆ ಕೂಗುತ್ತಲೇ ಒಡನಾಡಿಗಳು ವಿದಾಯ ಹೇಳಿದರು. ನಿರೀಕ್ಷೆಗೂ ಮೀರಿ ಜನ ಆಗಮಿಸಿದ್ದರಿಂದ ಪರಿಸ್ಥಿತಿ ನಿಭಾಯಿಸಲು ಪೊಲೀಸರು ಹರಸಾಹಸ ಪಡುವಂತಾಯಿತು. ಸಚಿವೆ ಉಮಾಶ್ರೀ ಅವರು ರವೀಂದ್ರ ಕಲಾಕ್ಷೇತ್ರದ ಆವರಣದಲ್ಲೇ ಇದ್ದು, ಸಾರ್ವಜನಿಕ ದರ್ಶನದ ಉಸ್ತುವಾರಿ ನೋಡಿಕೊಂಡರು. 

ಮಧ್ಯಾಹ್ನ 3.30ರ ಹೊತ್ತಿಗೆ ಪಾರ್ಥೀವ ಶರೀರವನ್ನು ಚಾಮರಾಜಪೇಟೆಯ ಲಿಂಗಾಯತ ರುದ್ರಭೂಮಿಗೆ ಕೊಂಡೊಯ್ಯಲು ಸಿದ್ಧತೆ ಆರಂಭವಾಯಿತು. ಪಾರ್ಥೀವ ಶರೀರವನ್ನು ಆ್ಯಂಬುಲೆನ್ಸ್‌ಗೆ ಇರಿಸುತ್ತಿದ್ದಂತೆ ಆಕ್ರಂದನ ಮುಗಿಲು ಮುಟ್ಟಿತು. ಅಲ್ಲಿಯೂ ಸಾವಿ ರಾರು ಮಂದಿ ಆಗ ಮಿಸಿ ಅಂತಿಮ ದರ್ಶನ ಪಡೆದರು. ಪೊಲೀಸ್‌ ವಾದ್ಯ ಶೋಕಗೀತೆ ನುಡಿಸಿ, ಎರಡು ನಿಮಿಷ ಮೌನ ಆಚರಿಸಿ, ನಂತರ ಗಾಳಿಯಲ್ಲಿ ಮೂರು ಸುತ್ತು ಗುಂಡು ಹಾರಿಸಲಾಯಿತು.  ಸರ್ಕಾರಿ ಗೌರವಗಳನ್ನು ಪೂರೈಸಿದ ನಂತರ ಪಾರ್ಥಿವ ಶರೀರವನ್ನು ಅವರ ಕುಟುಂಬಕ್ಕೆ ಹಸ್ತಾಂತರಿಸಲಾಯಿತು. 

ಗೌರಿ ಲಂಕೇಶ್‌ ಇಚ್ಛೆಯಂತೆ ಹಾಗೂ ಅವರ ಕುಟುಂಬದ ಸದಸ್ಯರ ಆಶಯದಂತೆ ಯಾವುದೇ ವಿಧಿ-ವಿಧಾನಗಳನ್ನು ಪೂರೈಸಲಿಲ್ಲ. ಪಾರ್ಥಿವ ಶರೀರದ ಮೇಲೆ ಹೂವಿಟ್ಟು ಅಂತಿಮ ನಮನ ಸಲ್ಲಿಸಲಾಯಿತು. ನಂತರ ಗೌರಿ ಲಂಕೇಶ್‌ ಮಣ್ಣಲ್ಲಿ ಮಣ್ಣಾದರು. ಈ ವೇಳೆ ಪ್ರಗತಿಪರರು ಹಾಗೂ ಅಭಿಮಾನಿಗಳಿಂದ “ನಮಗಾಗಿ ಮತ್ತೆ ಹುಟ್ಟಿ ಬಾ ಗೌರಿ ಅಕ್ಕ…’, “ಗೌರಿ ಲಂಕೇಶ್‌ ಅಮರ್‌ ರಹೇ ಅಮರ್‌ ರಹೇ…’ ಘೋಷಣೆಗಳು ಮೊಳಗಿದವು. ಕೂಡಲಸಂಗಮ ಪೀಠದ ಬಸವಜಯ ಮೃತ್ಯುಂಜಯ ಸ್ವಾಮೀಜಿ ಸಮ್ಮುಖದಲ್ಲಿ ಅಂತ್ಯಕ್ರಿಯೆ ನಡೆಯಿತು.  

ಉಮಾಶ್ರೀ, ಜಮೀರ್‌ ಮೇಲ್ವಿಚಾರಣೆ
ಮುಖ್ಯಮಂತ್ರಿ ಸಿದ್ದರಾಮಯ್ಯ ರವೀಂದ್ರ ಕಲಾಕ್ಷೇತ್ರಕ್ಕೆ ಆಗಮಿಸಿ ಅಂತಿಮ ದರ್ಶನ ಪಡೆದರು. ನಂತರ ರುದ್ರಭೂಮಿಯಲ್ಲಿ ನಡೆದ ಅಂತ್ಯಕ್ರಿಯೆಯಲ್ಲೂ ಪಾಲ್ಗೊಂಡರು. ಈ ಎಲ್ಲ ಕಾರ್ಯಗಳ ಉಸ್ತುವಾರಿಯನ್ನು ಸಚಿವೆ ಉಮಾಶ್ರೀ, ಸ್ಥಳೀಯ ಶಾಸಕ ಜಮೀರ್‌ ಅಹ ಮದ್‌ ಅವರಿಗೆ ವಹಿಸಿದ್ದರು. ಕಲಾಕ್ಷೇತ್ರದಿಂದ ರುದ್ರಭೂಮಿಗೆ ಆಂಬ್ಯುಲೆನ್ಸ್‌ನಲ್ಲೇ ಬಂದಿದ್ದರು.