Sandalwood: ಸೂಲಗಿತ್ತಿಯಸುತ್ತ ತಾಯವ್ವ

ಕನ್ನಡದಲ್ಲಿ ಕಮರ್ಷಿಯಲ್‌ ಚಿತ್ರಗಳ ಅಬ್ಬರಗಳ ನಡುವೆ ಒಂದಿಷ್ಟು ಕಂಟೆಂಟ್‌ ಆಧಾರಿತ ಚಿತ್ರಗಳೂ ಸದ್ದು ಮಾಡುತ್ತಿವೆ. ಈ ಸಾಲಿಗೆ ಹೊಸದಾಗಿ ಸೇರ್ಪಡೆಯಾಗುತ್ತಿದೆ “ತಾಯವ್ವ’ ಎಂಬ ಸಿನಿಮಾ.

ಇತ್ತೀಚೆಗೆ ವಿಧಾನಸಭೆ ವಿಪಕ್ಷ ನಾಯಕ ಆರ್‌. ಅಶೋಕ್‌ ಹಾಗೂ ಹಿರಿಯ ನಟಿ ಉಮಾಶ್ರೀ ಈ ಚಿತ್ರದ ಶೀರ್ಷಿಕೆಯನ್ನು ಅನಾವರಣಗೊಳಿಸಿದರು. ಜೊತೆಗೆ ಸಿನಿಮಾ ಬಗ್ಗೆ ಮಾತನಾಡಿ, ಚಿತ್ರತಂಡಕ್ಕೆ ಶುಭಕೋರಿದರು.

ಒಬ್ಬ ಸೂಲಗಿತ್ತಿಯ ಸುತ್ತ ಸಾಗುವ, ಮಹಿಳಾ ಪ್ರಧಾನ ಕಥೆಯಿದು ಎಂಬುದು ಚಿತ್ರತಂಡದ ಮಾತು. ನಂದಿ ಪ್ರಶಸ್ತಿ ಸಂಸ್ಥಾಪಕಿ ಎಸ್‌. ಪದ್ಮಾವತಿ ಚಂದ್ರಶೇಖರ್‌ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದು, ನಿರ್ಮಾಪಕ ಭಾ.ಮ. ಹರೀಶ್‌ ಚಿತ್ರವನ್ನು ಅರ್ಪಿಸುತ್ತಿದ್ದಾರೆ. ಸಾತ್ವಿಕ್‌ ಪವನ್‌ಕುಮಾರ್‌ ನಿರ್ದೇಶನದ ಜೊತೆಗೆ ಛಾಯಾಗ್ರಹಣದ ಜವಾಬ್ದಾರಿಯನ್ನೂ ಹೊತ್ತಿದ್ದಾರೆ. ಪಿ. ಶೇಷಗಿರಿ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿದ್ದು, ಅನಂತ್‌ ಆರ್ಯನ್‌ ಸಂಗೀತ ಸಂಯೋಜನೆ ಇದೆ. ಗೀತಪ್ರಿಯ, ಲತಾ ಸೇರಿ ರಂಗಭೂಮಿ ಕಲಾವಿದರು ಚಿತ್ರದಲ್ಲಿ ನಟಿಸಿದ್ದಾರೆ.

ಸದ್ಯ ಚಿತ್ರೀಕರಣ ಮುಗಿಸಿರುವ ತಾಯವ್ವ, ಸೆನ್ಸಾರ್‌ ಹಂತಕ್ಕೆ ಸಜ್ಜಾಗಿದೆ.