ಸ್ಪೀಡ್‌ ಗವರ್ನರ್‌: ಗೋವೆಯಲ್ಲಿ ಎರಡನೇ ದಿನವೂ ಟ್ಯಾಕ್ಸಿ ಮುಷ್ಕರ

ಪಣಜಿ : ಸುಪ್ರೀಂ ಕೋರ್ಟ್‌ ಆದೇಶದ ಅನ್ವಯ ಸ್ಪೀಡ್‌ ಗವರ್ನರ್‌ ಕಡ್ಡಾಯ ಅಳವಡಿಕೆಯನ್ನು ವಿರೋಧಿಸಿ ಗೋವೆಯ ಟ್ಯಾಕ್ಸಿ ನಿರ್ವಾಹಕರು ಇಂದು ಎರಡನೇ ದಿನ ಕೂಡ ರಸ್ತೆಗಿಳಿದಿಲ್ಲ. ಪರಿಣಾಮವಾಗಿ ಪ್ರವಾಸೋದ್ಯಮವೇ ಜೀವಾಳವಾಗಿರುವ ಗೋವೆಗೆ ಭಾರೀ ಹೊಡೆತ ಉಂಟಾಗಿದ್ದು ಪ್ರವಾಸಿಗರು ಪರದಾಡುವಂತಾಗಿದೆ. 

ಗೋವಾ ಸರಕಾರ ಆವಶ್ಯಕ ಸೇವೆಗಳ ಎಸ್ಮಾ ಕಾಯಿದೆಯನ್ನು ಅನ್ವಯಿಸಿರುವ ಹೊರತಾಗಿಯೂ ಸುಮಾರು 18,000 ಟ್ಯಾಕ್ಸಿಗಳು ಮತ್ತು ಸುಮಾರು 350ರಷ್ಟು ಹಳದಿ-ಕಪ್ಪು ಪ್ರೀಪೇಡ್‌ ಟ್ಯಾಕ್ಸಿಗಳು ರಸ್ತೆಯಿಂದ ದೂರ ಉಳಿದಿವೆ. 

“ನಮ್ಮದು ಶಾಂತಿಯುತ ಮುಷ್ಕರ; ನಮ್ಮ ಬೇಡಿಕೆ ಈಡೇರುವ ತನಕ ಒಂದೇ ಒಂದು ಟ್ಯಾಕ್ಸಿ ಕೂಡ ರಸ್ತೆಗೆ ಇಳಿಯುವುದಿಲ್ಲ’ ಎಂದು ಉತ್ತರ ಗೋವಾ ಟ್ಯಾಕ್ಸಿ ಸಂಘದ ಪ್ರಧಾನ ಕಾರ್ಯದರ್ಶಿ ವಿನಾಯಕ ನಾನೋಸ್ಕರ್‌ ಹೇಳಿದ್ದಾರೆ.