ತಾವರಗೇರಾ ಪ.ಪಂ: 45 ಸ್ಪರ್ಧಿಗಳ ಭವಿಷ್ಯ ಡಿ.27 ರಂದು ನಿರ್ಧಾರ

ಕುಷ್ಟಗಿ: ಕುಷ್ಟಗಿ ತಾಲೂಕು ತಾವರಗೇರಾ ಪಟ್ಟಣ ಪಂಚಾಯತಿ ಡಿ.27 ರ ಚುನಾವಣೆಗೆ ಸೂಕ್ಷ್ಮ, ಅತಿ ಸೂಕ್ಷ್ಮ ತಲಾ 4, ಸಾಮಾನ್ಯ 7 ಗುರುತಿಸಲಾಗಿದೆ.

ತಾವರಗೇರಾ ಪಟ್ಟಣದ ಒಟ್ಟು 18 ವಾರ್ಡಗಳಲ್ಲಿ ವಾರ್ಡ್ 2, ವಾರ್ಡ್ 12 ಹಾಗೂ ವಾರ್ಡ್ 13 ರಲ್ಲಿ ಅವಿರೋಧ ಆಯ್ಕೆಯಾಗಿದ್ದು 15 ವಾರ್ಡ್ ಗಳಲ್ಲಿ ಚುನಾವಣೆ ನಡೆಯುತ್ತಿದೆ.

ಈ ಚುನಾವಣೆಯಲ್ಲಿ ಕಾಂಗ್ರೆಸ್ 13, ಬಿಜೆಪಿ12   ನಾಗರೀಕ ಸಮಿತಿ ತಾವರಗೇರಾ ಸೇರಿದಂತೆ ಪಕ್ಷೇತರರು12, ಜೆಡಿಎಸ್ 2, ಆಮ್ ಆದ್ಮಿ 4, ಡಬ್ಲ್ಯೂ ಪಿಐ2 ಸೇರಿದಂತೆ ಒಟ್ಟು 45 ಸ್ಪರ್ಧಿಗಳ ಭವಿಷ್ಯ ಡಿ.27 ರಂದು ನಿರ್ಧಾರವಾಗಲಿದೆ.

ಅವಿರೋಧ ಆಯ್ಕೆಯ ಮೂರು ವಾರ್ಡ್ ಹೊರತು ಪಡಿಸಿ ಒಟ್ಟು 15 ವಾರ್ಡ್ ಗಳಲ್ಲಿ 5,351 ಪುರುಷ ಮತದಾರರು, 5,534 ಮಹಿಳಾ ಮತದಾರರು ಸೇರಿದಂತೆ ಒಟ್ಟು 10,885 ಮತದಾರರು ಮತದಾನದ ಹಕ್ಕನ್ನು ಚಲಾಯಿಸುವರು.

ಪೊಲೀಸ್ ಬಿಗಿ ಬಂದೋಬಸ್ತ್ ಗಾಗಿ ಸಿಪಿಐ 1, ಪಿಎಸೈ 3, ಎಎಸೈ 4, 13 ಹೆಡ ಕಾನ್ ಸ್ಟೆಬಲ್, ಪೇದೆ, ಮಹಿಳಾ ಪೇದೆಗಳು ಸೇರಿದಂತೆ 26 ಜನರನ್ನು ಬಂದೋಬಸ್ತ್ ಗೆ ನಿಯೋಜಿಸಲಾಗಿದೆ. ಚುನಾವಣಾ ಸಿಬ್ಬಂದಿ ಮತಗಟ್ಟೆಗೆ ತೆರಳಿದ್ದು ಡಿ.27 ರ ಸೋಮವಾರ ನಡೆಯುವ ಚುನಾವಣೆಗೆ ತಾಲೂಕಾಡಳಿತ ಸರ್ವಸನ್ನದ್ದವಾಗಿದೆ.