ಟ್ಯಾಟೂ ಮೇಕಿಂಗ್‌ ಅವಕಾಶಗಳ ಆಗರ

ತಾವು ಯಾವುದರಲ್ಲಿ ಡಿಗ್ರಿ ಮಾಡಿದ್ದೇವೋ ಅದಕ್ಕೆ ತಕ್ಕಂತೆ ಕೆಲಸ ಸಿಗಬೇಕೆಂದು ಕಾದು ಕುಳಿತುಕೊಳ್ಳುವ ಕಾಲ ಅಲ್ಲ ಇದು. ಇವತ್ತು ಪದವಿ, ಸ್ನಾತಕೋತ್ತರ ಪದವಿಗಳು ತಮ್ಮ ಬೆಲೆಯನ್ನು ಕಳೆದುಕೊಂಡು ವಿದ್ಯಾರ್ಥಿಗಳು ಬಗೆ ಬಗೆಯ ಕೋರ್ಸ್‌ಗಳತ್ತ ಮುಖ ಮಾಡುತ್ತಿರುವ ಕಾಲ. ಅಂತಹ ಕೋಸ್‌ಗಳಲ್ಲಿ ಟ್ಯಾಟೂ ಕೋರ್ಸ್‌ ಒಂದು.

ಟ್ಯಾಟೂ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ. ತಮಗೆ ಇಷ್ಟವಿರುವ ಒಂದು ವಸ್ತು ಅಥವಾ ವಾಕ್ಯ ಅಥವಾ ಸುಂದರವಾರ ಚಿತ್ರಗಳನ್ನು ತಮ್ಮ ಮೈಯಲ್ಲಿ ಹಚ್ಚೆ ಹಾಕಿಸಿಕೊಳ್ಳುವುದು ಎಲ್ಲರಿಗೂ ಇಷ್ಟ. ಹಿಂದೆ ಭಾರತ ದಲ್ಲಿ ಚಾಲ್ತಿಯಲ್ಲಿದ್ದ ಹಚ್ಚೆ ಹಾಕುವಿಕೆಯೇ ಇಂದು ಆಧುನಿಕತೆಯಲ್ಲಿ ಟ್ಯಾಟೂ ಎಂದು ಮಾರ್ಪಟ್ಟಿದೆ. ಮೈಗೆಲ್ಲ ಟ್ಯಾಟೂ ಹಾಕಿಸಿಕೊಂಡವರು ನಮ್ಮ ಕಣ್ಣಿಗೆ ಕಾಣಸಿಗುತ್ತಾರೆ. ಟ್ಯಾಟೂ ಹಾಗೂ ಚಿತ್ರಕಲೆಯಲ್ಲಿ ಆಸಕ್ತಿ ಇರುವವರಿಗೆ ಈ ಟ್ಯಾಟೂ ಕೋರ್ಸ್‌ ಒಂದು ಉತ್ತಮ ಶಿಕ್ಷಣವಾಗಿದೆ.

ಈ ಟ್ಯಾಟೂ ಕೋರ್ಸ್‌ ಅನ್ನುವುದು ಎಲ್ಲರಿಗೂ ಅಷ್ಟು ಸುಲಭದಲ್ಲಿ ಒಲಿದು ಬರುವುದಿಲ್ಲ. ಇದಕ್ಕೆ ಉತ್ತಮ ಚಿತ್ರ ಕಲಾಕಾರನಾಗಿದ್ದರೆ ಮಾತ್ರ ಸಾಧ್ಯವಿರುತ್ತದೆ. ಮುಂದುವರಿದ ಎಲ್ಲ ದೇಶಗಳಲ್ಲೂ ಈ ಟ್ಯಾಟೂಗೆ ಅತೀವ ಬೇಡಿಕೆ ಇದೆ. ಅಂದ ಹಾಗೆ ಈ ಟ್ಯಾಟೂ ಬಗ್ಗೆ ಆಸಕ್ತಿ ಹೊಂದಿರುವವರಿಗೆ ಅದರ ಬಗ್ಗೆ ಇನ್ನಷ್ಟು ಕಲಿಯ ಬೇಕೆನ್ನುವವರಿಗೆ ಟ್ಯಾಟೂ ಕೋರ್ಸ್‌ಗಳ ಮಾಹಿತಿ ಇಲ್ಲಿದೆ.

ಕೋರ್ಸ್‌ನಲ್ಲಿ ಏನೇನಿದೆ?
ಇದರಲ್ಲಿ ಪ್ರಮುಖವಾಗಿ ಡ್ರಾಯಿಂಗ್‌ನ ಮೂಲ ಅಂಶಗಳು, ಟ್ಯಾಟೂ ಆರ್ಟ್‌ ಪರಿಚಯ, ಹಚ್ಚೆ ಪ್ರಕ್ರಿ ಯೆಯ ತಿಳವಳಿಕೆ, ಹಚ್ಚೆ ಉಪಕರಣಗಳ ಪರಿಚಯ, ವಿವಿಧ ರೀತಿಯ ಸೂಜಿಗಳನ್ನು ಅರ್ಥೈಸಿಕೊಳ್ಳುವುದು, ವಿವಿಧ ರೀತಿಯ ಹಚ್ಚೆ ಯಂತ್ರಗಳ ಪರಿಚಯ. ಸುರಕ್ಷತೆ, ನೈರ್ಮಲ್ಯ ಮಾನದಂಡಗಳು, ಉಪಕರಣಗಳನ್ನು ಕೈಗೆತ್ತಿಕೊಳ್ಳುವುದು ಮತ್ತು ನಿರ್ವಹಿಸುವುದು, ಚರ್ಮದ ಪ್ರಕಾರಗಳು, ಸಾಂಕ್ರಾಮಿಕ ರೋಗಗಳು ಮತ್ತು ತಡೆಗಟ್ಟುವಿಕೆಗಳು ಹಚ್ಚೆ ತರಬೇತಿ ಪಠ್ಯಕ್ರಮದ ಭಾಗವಾಗಿದೆ.

ಈ ಟ್ಯಾಟೂ ಕೋರ್ಸ್‌ 18 ವರ್ಷ ಮೇಲ್ಪಟ್ಟವರಿಗೆ ಲಭ್ಯವಿದ್ದು. ಇದು 2 ತಿಂಗಳು, ನಾಲ್ಕು ತಿಂಗಳು ಮತ್ತು ಕೆೆಲವು ಕಡೆ ಒಂದು ವರ್ಷದವರೆಗೆ ಲಭ್ಯವಿದೆ. ಈ ಕೋರ್ಸ್‌ ಗುಣಮಟ್ಟದ ಆಧಾರದ ಮೇಲೆ ಫೀಸ್‌ಗಳು ಅಂದಾಜು 60,000 ರೂ.ಗಳಿಂದ ಆರಂಭಗೊಂಡು, 1. ಲಕ್ಷ ರೂ. ಗಳ ವರೆಗೆ ಇದೆ. ಈ ಟ್ಯಾಟೂ ತರಬೇತಿ ಯಶಸ್ವಿಯಾಗಿ ಮುಗಿದ ಅನಂತರ ಹಚ್ಚೆ ಪ್ರಮಾಣಪತ್ರವನ್ನು ನೀಡಲಾಗುತ್ತದೆ. ಸ್ವತಃ ಟ್ಯಾಟೂ ಶಾಪ್‌ ಹಾಕಿಕೊಳ್ಳುವುದಾದರೆ ಈ ಪ್ರಮಾಣ ಪತ್ರ ಅತೀ ಮುಖ್ಯವಾಗಿದೆ.

ಸಂಭಾವನೆಗೆ ಬರವಿಲ್ಲ
ವಿದೇಶಗಳಲ್ಲಿ ಹೆಚ್ಚಿನ ಹಚ್ಚೆ ಕಲಾವಿದರು ಸುಮಾರು 30,000 ಮತ್ತು 50,000 ಡಾಲರ್‌ ಗಳವರೆಗೆ ಗಳಿಸುತ್ತಾರೆ. ಸ್ವತಃ ಉದ್ಯಮ ಮಾಡುವುದಾದರೆ ಇದೊಂದು ಲಾಭದಾಯಕವೂ ಹೌದು. ನಿಮ್ಮ ಟ್ಯಾಟೂ ಗುಣಮಟ್ಟದ ಮೇಲೆ ನಿಮ್ಮ ಸಂಪಾದನೆಯಿರುತ್ತದೆ. ನಗರಗಳಲ್ಲಿ ಈ ಉದ್ಯಮ ಆರಂಭಿಸುವುದಾದರೆ ಅತೀ ಹೆಚ್ಚಿನ ಲಾಭ ಗಳಿಸಬಹುದು. ವಿದೇಶದಲ್ಲೂ ಹೆಚ್ಚಿನ ಬೇಡಿಕೆಯಿದೆ. ಕೆಲವೊಂದು ಟ್ಯಾಟೂ ಕೋರ್ಸ್‌ ಸೆಂಟರ್‌ಗಳು ಅವರೇ ಕೆಲಸವನ್ನು ತೆಗೆದುಕೊಡುತ್ತಾರೆ. ಫ್ಯಾಷನ್‌ ಲೋಕದ ಮಾಡೆಲಿಂಗ್‌ ಕ್ಷೇತ್ರಗಳಲ್ಲಿ ಈ ಟ್ಯಾಟೂ ಕಲಾವಿದರಿಗೆ ಉನ್ನತ ಸ್ಥಾನಮಾನವಿದೆ.