ಹಸಿದವರ ಸಹಾಯಕ್ಕೆ ತಮನ್ನಾ

ಕೋವಿಡ್ 19 ಲಾಕ್‌ ಡೌನ್‌ ನಿಂದಾಗಿ ಜನರ ಬದುಕು ದಿನದಿಂದ ದಿನಕ್ಕೆ ದುಸ್ತರವಾಗುತ್ತಿದೆ. ಇನ್ನು ದಿನನಿತ್ಯದ ಅಗತ್ಯ ವಸ್ತುಗಳು, ಆಹಾರ ಸಾಮಗ್ರಿಗಳು ಬಡವರು, ಕೂಲಿ ಕಾರ್ಮಿಕರ ಕೈಗೆಟುಕುವುದು ಕಷ್ಟವಾಗುತ್ತಿದೆ. ಇದೇ ವೇಳೆ ಚಿತ್ರರಂಗದ ಅನೇಕ ತಾರೆಯರು ಜನರ ಸಂಕಷ್ಟಕ್ಕೆ ಸ್ಪಂದಿಸುತ್ತಿದ್ದು, ಇದೀಗ ಮಿಲ್ಕಿ ಬ್ಯೂಟಿ ಖ್ಯಾತಿಯ ತಮನ್ನಾ ಭಾಟಿಯ ಕೂಡ ಅಂಥದ್ದೇ ಸಹಾಯಕ್ಕೆ ಮುಂದಾಗಿದ್ದಾರೆ.

ಕೋವಿಡ್ 19 ಲಾಕ್‌ ಡೌನ್‌ ನಿಂದಾಗಿ ಆಹಾರ ಸಿಗದೆ ಸಂಕಷ್ಟಕ್ಕೆ ಒಳಗಾಗಿರುವ ಮುಂಬೈ ಸ್ಲಂ ನಿವಾಸಿಗಳು ಮತ್ತು ವೃದ್ದಾಶ್ರಮಗಳಿಗೆ ಬರೋಬ್ಬರಿ ಐವತ್ತು ಟನ್‌ ನಷ್ಟು ಆಹಾರ ಸಾಮಗ್ರಿಗಳನ್ನು ಒದಗಿಸಲು ಮುಂದಾಗಿದ್ದಾರೆ. ಯಾರೂ ಹಸಿವಿನಿಂದ ಮಲಗಬಾರದು ಅದಕ್ಕಾಗಿ ಈ ಮೂಲಕ ತನ್ನ ಕೈಲಾದ ಸಹಾಯಕ್ಕೆ ಮುಂದಾಗಿರುವುದಾಗಿ ತಮನ್ನಾ ತಿಳಿಸಿದ್ದಾರೆ. ಇನ್ನು ತಮನ್ನಾ ಅವರ ಇಂಥದ್ದೊಂದು ಮಹಾತ್ಕಾರ್ಯಕ್ಕೆ ಅಭಿಮಾನಿಗಳು ಮತ್ತು ಚಿತ್ರರಂಗದಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಈಗಾಗಲೇ ಚಿತ್ರರಂಗದ ಬಹುತೇಕ ಮಂದಿ ತಮ್ಮ ಕೈಲಾದ ಸಹಾಯ ಮಾಡುತ್ತಿದ್ದಾರೆ. ಚಿತ್ರೋದ್ಯಮದ ಕಾರ್ಮಿಕರಿಗೆ ಸಹಾಯ ಹಸ್ತ ಚಾಚುತ್ತಿದ್ದಾರೆ. ಇನ್ನು ಅನೇಕ ಮಂದಿ ಪ್ರಧಾನ ಮಂತ್ರಿಗಳ ಪರಿಹಾರ ನಿಧಿಗೆ ದೇಣಿಗೆ ನೀಡುತ್ತಿದ್ದಾರೆ. ಆದರೆ ತಮನ್ನಾ ನೇರವಾಗಿ ಹಸಿದವರ ಹೊಟ್ಟೆತುಂಬಿಸುವ ಕಾರ್ಯಕ್ಕೆ ಮುಂದಾಗಿದ್ದಾರೆ. ಕೊರೊನಾ ಲಾಕೌxನ್ನಿಂದಾಗಿ ಅನೇಕರು ಒಂದು ಹೊತ್ತಿನ ಊಟಕ್ಕೂ ಪರದಾಡುವಂತಾಗಿದೆ. ಇಂತಹ ಸಂದರ್ಭದಲ್ಲಿ ಅವರ ಸಹಾಯಕ್ಕೆ ತಮನ್ನಾ ಮುಂದಾಗಿದ್ದಾರೆ.

ತಮನ್ನಾ ಬಹುಭಾಷೆಯಲ್ಲಿ ಬೇಡಿಕೆಯ ನಟಿಯಾಗಿದ್ದು, ತಮ್ಮ ನಟನೆ ಹಾಗೂ ಬೋಲ್ಡ್‌ ಲುಕ್‌ನಿಂದ ಗಮನಸೆಳೆದಿದ್ದಾರೆ. ಕನ್ನಡದ ಜಾಗ್ವಾರ್‌ ಹಾಗೂ ಕೆಜಿಎಫ್ ಚಿತ್ರಗಳ ಸ್ಪೆಷಲ್‌ ಸಾಂಗ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಇದು ತಮನ್ನಾ ವಿಷಯವಾದರೆ ಕನ್ನಡದ ಅನೇಕ ನಟಿಯರು ಕೂಡಾ ತಮ್ಮ ಕೈಲಾದ ಸೇವೆ ಮಾಡುತ್ತಿದ್ದಾರೆ. ಜೊತೆಗೆ ತಮ್ಮ ಅಭಿಮಾನಿ ಸಂಘಗಳಿಗೆ ಪ್ರೋತ್ಸಾಹ ನೀಡುತ್ತಿದ್ದಾರೆ.