ತಾಲೂಕು ಪಂಚಾಯತ್‌ : ಅನುದಾನ ಹೆಚ್ಚಿಸಿ, ಆಶಯ ಉಳಿಸಿ

ಬೆಂಗಳೂರು: ಅಧಿಕಾರ ವಿಕೇಂದ್ರೀಕರಣದ ಆಶಯ ಸಾಕಾರವಾಗಬೇಕಾದರೆ ಮೂರು ಹಂತಗಳ ಅಧಿಕಾರ ಇರಲೇಬೇಕು- ಇದು ತಾಲೂಕು ಪಂಚಾಯತ್‌ ಅಧ್ಯಕ್ಷರ ಅಭಿಪ್ರಾಯ. ಅಧಿಕಾರವೇ ಇಲ್ಲದ ತಾ.ಪಂ. ವ್ಯವಸ್ಥೆಯನ್ನು ತೆಗೆದುಹಾಕುವ ನಿಟ್ಟಿನಲ್ಲಿ ಚರ್ಚೆ ನಡೆಯುತ್ತಿರುವ ಈ ವೇಳೆ “ಉದಯವಾಣಿ’ ರಾಜ್ಯಾದ್ಯಂತ ತಾ.ಪಂ. ಅಧ್ಯಕ್ಷರನ್ನು ಮಾತನಾಡಿಸಿ ಅವರ ಅಭಿಪ್ರಾಯ ಸಂಗ್ರಹಿಸಿದೆ. ಹೆಚ್ಚು ಕಡಿಮೆ ಶೇ. 75 ಮಂದಿ ತಾ.ಪಂ. ಇರಲಿ ಎಂದಿದ್ದಾರೆ. ತಾ.ಪಂ. ಇರಲಿ, ಜತೆಗೆ ಹೆಚ್ಚಿನ ಅಧಿಕಾರ ಕೊಡಲಿ ಎಂದು ಆಶಯ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರು : ತಾ. ಪಂಚಾಯತ್‌ಗೆ ಅಧಿಕಾರ – ಸಮರ್ಪಕ ಅನುದಾನ ಕೊರತೆ ಇದೆ. ಇದರಿಂದ ಸದಸ್ಯರಿಗೆ ಜನರ ನಿರೀಕ್ಷೆಗಳಿಗೆ ತಕ್ಕಂತೆ ಸ್ಪಂದಿಸಲು ಸಾಧ್ಯವಾಗುತ್ತಿಲ್ಲ. ಸರಕಾರ ತಾ.ಪಂ.ಗಳನ್ನು ರದ್ದುಗೊಳಿಸುವ ಬದಲು ಹೆಚ್ಚಿನ ಅನುದಾನ ಮತ್ತು ಅಧಿಕಾರ ನೀಡಿ ಬಲವರ್ಧನೆಗೊಳಿಸಬೇಕು.

-ಇದು ರಾಜ್ಯದ ಬಹುತೇಕ ತಾ.ಪಂ. ಅಧ್ಯಕ್ಷ- ಉಪಾಧ್ಯಕ್ಷರು ಮತ್ತು ಸದಸ್ಯರ ಒಕ್ಕೊರಲ ಆಗ್ರಹ. ಪಂಚಾಯತ್‌ ವ್ಯವಸ್ಥೆಯ 3 ಹಂತಗಳನ್ನು ಎರಡಕ್ಕಿಳಿಸಲು ಸರಕಾರ ಚಿಂತನೆ ನಡೆಸಿರುವುದು ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ತಾ.ಪಂ. ವ್ಯವಸ್ಥೆಗೆ ಹೆಚ್ಚು ಅನುದಾನ, ಅಧಿಕಾರ ನೀಡಬೇಕು. ಇದಕ್ಕಾಗಿ ಪಂ.ರಾಜ್‌ ಕಾಯಿದೆಯಲ್ಲಿ ಮಾರ್ಪಾಟು ತರಬೇಕು ಎಂಬ ಅಭಿಪ್ರಾಯ ಕೇಳಿ ಬಂದಿದೆ.

ಏಕೆ ಬೇಕು?
1 ಸ್ಥಳೀಯ ಸಂಸ್ಥೆಗಳು ಗ್ರಾಮೀಣಾಭಿವೃದ್ಧಿಗಾಗಿ ಜಿ. ಪಂ., ಸರಕಾರಗಳ ನಡುವೆ ಸೇತುವೆಯಂತಿವೆ.
2 ತಾಲೂಕು ವ್ಯಾಪ್ತಿಯಲ್ಲಿ ಬರುವ ಗ್ರಾ.ಪಂ.ಗಳ ಮೇಲುಸ್ತುವಾರಿ, ಕಾರ್ಯವೈಖರಿ ತಪಾಸಣೆ, ಲೆಕ್ಕಪತ್ರ ಪರಿಶೋಧನೆಗೆ ಅನುಕೂಲ.
3 ಗ್ರಾ.ಪಂ. ಮಟ್ಟದ ದೂರು, ಸಮಸ್ಯೆಗಳಿಗೆ ತಾ.ಪಂ. ಹತ್ತಿರದ ವ್ಯವಸ್ಥೆ.
4 ಜಿಲ್ಲೆಯ ಎಲ್ಲ ಗ್ರಾ.ಪಂ.ಗಳ ಸಮರ್ಪಕ ಉಸ್ತುವಾರಿ ಜಿ.ಪಂ.ನಿಂದ ಅಸಾಧ್ಯ.
5 ತಾ.ಪಂ. ಸದಸ್ಯರು ಜಿಲ್ಲಾ ಮತ್ತು ಗ್ರಾ.ಪಂ. ನಡುವೆ ಸಂಪರ್ಕ ಸೇತುವಾಗಿರುತ್ತಾರೆ.

ವಿರೋಧ ಏಕೆ ?
1ಕಡಿಮೆ ಅನುದಾನ, ಕಡಿಮೆ ಅಧಿಕಾರ.
2ಹಿಂದೆ 32 ಇಲಾಖೆಗಳಿಗೆ ತಾ.ಪಂ. ಮೂಲಕ ಅನುದಾನ ಹೋಗುತ್ತಿತ್ತು. ಈಗಿಲ್ಲ.
3 20-30 ಸದಸ್ಯರಿರುವ ತಾ.ಪಂ.ನಲ್ಲಿ ಒಬ್ಬರಿಗೆ ನಾಲ್ಕೆ çದು ಲಕ್ಷ ರೂ. ಕೂಡ ಅನುದಾನ ಸಿಗುವುದಿಲ್ಲ.
4ಇಷ್ಟು ಕಡಿಮೆ ಅನುದಾನದಲ್ಲಿ ಹೆಚ್ಚಿನ ಕೆಲಸಗಳನ್ನು ಮಾಡಿಕೊಡಲಾಗುತ್ತಿಲ್ಲ.

ಆಗಬೇಕಿದೆ ಬಲವರ್ಧನೆ
– ಸರಕಾರವು ತಾ. ಪಂ. ಬಲವರ್ಧನೆಗೆ ಏನು ಮಾಡಬೇಕು ಎಂಬ ಬಗ್ಗೆ ಕೆಲವು ತಾ.ಪಂ. ಅಧ್ಯಕ್ಷರ ಸಲಹೆ ಹೀಗಿವೆ:
ಅಧಿಕಾರ ವಿಕೇಂದ್ರೀಕರಣ ವ್ಯವಸ್ಥೆಯಲ್ಲಿ ತ್ರಿಸ್ತರಗಳೂ ಪ್ರಮುಖ. ಹೀಗಾಗಿ ತಾ.ಪಂ. ವ್ಯವಸ್ಥೆಗೆ ಇನ್ನಷ್ಟು ಪುಷ್ಟಿ ತುಂಬ ಬೇ ಕು.

– ಪ್ರತೀ ತಾ.ಪಂ.ಗೆ ಹೆಚ್ಚಿನ ಅನುದಾನ ಮತ್ತು ಅಧಿಕಾರ ನೀಡಬೇಕು. ಇದಕ್ಕಾಗಿ ಕಾಯ್ದೆಯಲ್ಲಿ ಮಾರ್ಪಾಟು ತರಬೇಕು.

– ತಾ.ಪಂ. ಮೂಲಕ ನರೇಗಾ, ವಸತಿ ಯೋಜನೆ ಅನುಷ್ಠಾನಕ್ಕೆ ತರಬೇಕು. ಆದಾಯ ತರುವ ಮಾರ್ಗ ಒದಗಿಸಬೇಕು.

– ಪ್ರತ್ಯೇಕವಾಗಿ ಬಜೆಟ್‌ ಮಂಡಿಸುವ ಶಕ್ತಿ ತುಂಬಬೇಕು. ಅದಕ್ಕಾಗಿ ವಿವಿಧ ತೆರಿಗೆ ವಿಧಿಸುವ ಅಧಿಕಾರ ನೀಡಬೇಕು.

– ಗ್ರಾಮೀಣ ಭಾಗದಲ್ಲಿ ದೊಡ್ಡಮಟ್ಟದ ಯೋಜನೆ ಅನುಷ್ಠಾವನ್ನು ತಾ.ಪಂ.ಗೆ ವಹಿಸಬೇಕು.

– ಅನುದಾನವನ್ನು ಕಾಲಕಾಲಕ್ಕೆ ಬಿಡುಗಡೆ ಗೊಳಿಸಬೇಕು. ವಾರ್ಷಿಕ ಅನುದಾನ 5-6 ಕೋ.ರೂ.ಗಳಿಗೆ ಹೆಚ್ಚಿಸಬೇಕು.

– ಶಾಸಕರ ಅನಗತ್ಯ ಹಸ್ತಕ್ಷೇಪ ತಪ್ಪಿಸಬೇಕು. ಪಿಡಿಒ ಮೇಲೆ ಶಿಸ್ತು ಕ್ರಮ ಕೈಗೊಳ್ಳುವ ಅಧಿ ಕಾರ ನೀಡಬೇಕು.