“ಟಾಕಿಂಗ್‌ ಸ್ಟಾರ್‌’ಹೆಸರಿಗೊಂದು ಟೀಸರ್‌

ಸೃಜನ್‌ ಲೋಕೇಶ್‌ ಅಭಿನಯದ “ಎಲ್ಲಿದ್ದೆ ಇಲ್ಲಿ ತನಕ’ ಚಿತ್ರದ ಚಿತ್ರೀಕರಣ ಪೂರ್ಣಗೊಂಡಿದ್ದು ಎಲ್ಲರಿಗೂ ಗೊತ್ತಿದೆ. ಈಗ ಆ ಚಿತ್ರದ ಹೊಸ ಸುದ್ದಿಯೆಂದರೆ, ಚಿತ್ರದ ಟೀಸರ್‌ ಬಿಡುಗಡೆಯಾಗಿರುವುದು. ಹೌದು, ಚಿತ್ರತಂಡ ಹೊಸತನದೊಂದಿಗೆ ಆ ಟೀಸರ್‌ ಬಿಡುಗಡೆ ಮಾಡಿರುವುದು ವಿಶೇಷತೆಗಳಲ್ಲೊಂದು. ಹಾಗಾದರೆ, ಆ ವಿಶೇಷತೆ ಏನು? “ಸೃಜನ್‌ ಅಂದಾಕ್ಷಣ ಎಲ್ಲರೂ “ಮಾತಿನ ಮಲ್ಲ’ ಎನ್ನುತ್ತಾರೆ.

ಮಾತುಗಳನ್ನೇ ಪ್ರಮುಖವಾಗಿರಿಸಿಕೊಂಡ ಸೃಜನ್‌ ಇಂದು ಎಲ್ಲರ ಅಚ್ಚುಮೆಚ್ಚಿನ ನಟ ಎನಿಸಿಕೊಂಡಿರುವುದು ಗೊತ್ತೇ ಇದೆ. ನಿರ್ದೇಶಕ ತೇಜಸ್ವಿ, ಟೀಸರ್‌ ಅನ್ನು ಹೊಸ ಕಾನ್ಸೆಪ್ಟ್ನೊಂದಿಗೆ ಮಾಡಿದ್ದಾರೆ. ಆ ಬಗ್ಗೆ ಹೇಳುವ ನಿರ್ದೇಶಕರು, “ಸೃಜನ್‌ ಅಭಿನಯದ “ಎಲ್ಲಿದೆ ಇಲ್ಲಿತನಕ’ ಚಿತ್ರ ಮುಗಿದಿದ್ದು, ಈಗ ಟೀಸರ್‌ ಹೊರಬಂದಿದೆ. ಅದರ ವಿಶೇಷವೆಂದರೆ, “ಟಾಕಿಂಗ್‌ ಸ್ಟಾರ್‌ ಇಂಟ್ರಡಕ್ಷನ್‌ ಟೀಸರ್‌’ ಎಂದು ನಾಮಕರಣ ಮಾಡಲಾಗಿದೆ.

ನಾಯಕನ ಪರಿಚಯವನ್ನು ಆ ಟೀಸರ್‌ನಲ್ಲಿ ಹೇಳಲಾಗಿದ್ದು, ಅರ್ಜುನ್‌ ಜನ್ಯಾ ಸಂಗೀತದ ಹಾಡಿನ ತುಣುಕು ಟೀಸರ್‌ನ ವಿಶೇಷತೆ ಹೊಂದಿದೆ. ಇನ್ನು, ಚಿತ್ರದ ಚಿತ್ರೀಕರಣ ವಿದೇಶದಲ್ಲೂ ನಡೆದಿದೆ’ ಎನ್ನುತ್ತಾರೆ ಅವರು. ಇದೇ ಮೊದಲ ಬಾರಿಗೆ ಸೃಜನ್‌ ಅವರು, ಸಿನಿಮಾ ನಿರ್ಮಾಣ ಮಾಡಿದ್ದಾರೆ. ತಮ್ಮ ಲೋಕೇಶ್‌ ಪ್ರೊಡಕ್ಷನ್ಸ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರದಲ್ಲಿ ಹರಿಪ್ರಿಯಾ ನಾಯಕಿಯಾಗಿ ನಟಿಸುತ್ತಿದ್ದಾರೆ.

ಇನ್ನು, ಸೃಜನ್‌ ಕೂಡ ಚಿತ್ರಕ್ಕೆ ಬೇಕಾದ ತಯಾರಿ ಮಾಡಿಕೊಂಡಿದ್ದು, ಹೊಸ ಗೆಟಪ್‌ನಲ್ಲಿ ಅವರು ತೆರೆಯ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ. ಅಂದಹಾಗೆ, ಇಂದಿನ ಜನರೇಷನ್‌ಗೆ ಇಷ್ಟವಾಗುವಂಥ ರೊಮ್ಯಾಂಟಿಕ್‌ ಕಾಮಿಡಿ ಕಥೆ ಚಿತ್ರದಲ್ಲಿದೆ. ಇಡೀ ಚಿತ್ರ ನವಿರಾದ ಹಾಸ್ಯದ ಮೂಲಕ ಸಾಗುತ್ತದೆ ಎಂಬುದು ನಿರ್ದೇಶಕರ ಮಾತು.