ಸೇನಾನೆಲೆಗೆ ತಾಲಿಬಾನ್‌ ಲಗ್ಗೆ: 150 ಸಾವು

ಮಜಾರ್‌-ಎ-ಷರೀಫ್: ಪಾಕ್‌ ಗಡಿಗೆ ಹೊಂದಿಕೊಂಡಿರುವ ಅಫ್ಘಾನಿಸ್ತಾನದ ನಂಗರ್‌ಹಾರ್‌ನಲ್ಲಿ ಐಸಿಸ್‌ ಉಗ್ರರನ್ನು ಗುರಿ ಯಾಗಿಸಿ ಅಮೆರಿಕ ಮದರ್‌ ಬಾಂಬ್‌ ಪ್ರಯೋಗಿಸಿ ದಿನಗಳು ಕಳೆದಿಲ್ಲ. ಉತ್ತರ ಅಫ್ಘಾನಿಸ್ತಾನದ ಮಜಾರ್‌-ಎ-ಷರೀಫ್ನಲ್ಲಿ ರುವ ಸೇನಾ ನೆಲೆಗೆ ತಾಲಿಬಾನ್‌ ಉಗ್ರರು ಶುಕ್ರವಾರ ತಡ ರಾತ್ರಿ ನುಗ್ಗಿ ಬಾಂಬ್‌ ಸ್ಫೋಟ ನಡೆಸಿದ್ದಾರೆ. ಈ ದುರಂತದಲ್ಲಿ ಕನಿಷ್ಠ 150 ಮಂದಿ ಸೈನಿಕರು ಅಸುನೀಗಿದ್ದಾರೆ.

ಆಫ‌^ನ್‌ನ ರಕ್ಷಣಾ ಸಚಿವಾಲಯ ಸಾವಿನ ಸಂಖ್ಯೆಯನ್ನು 50 ಎಂದೇ ಹೇಳುತ್ತಿದೆ. ಇತ್ತೀಚೆಗೆ ಸೇನಾ ನೆಲೆ ಗುರಿಯಾಗಿರಿಸಿ ಕೊಂಡು ನಡೆಸಲಾಗಿರುವ ಅತ್ಯಂತ ಭೀಕರ ದಾಳಿ ಇದಾಗಿದೆ. 

ಸಮವಸ್ತ್ರ ಧರಿಸಿದ್ದರು: ಸೈನಿಕರಂತೆ ಸಮವಸ್ತ್ರ ಧರಿಸಿದ್ದ ಹತ್ತು ಮಂದಿ ಉಗ್ರರು ಎರಡು ಟ್ರಕ್‌ಗಳ ಮೂಲಕ ಕಾಂಪೌಂಡ್‌ ಪ್ರವೇಶಿಸಿದರು. ಗುಂಡು ಹಾರಿಸುತ್ತಾ ಒಳ ನುಗ್ಗಿದರು. ಶುಕ್ರವಾರದ ಪ್ರಾರ್ಥನೆ ನಡೆಯುತ್ತಿದ್ದ ವೇಳೆಯನ್ನೇ ಗಮನದಲ್ಲಿರಿಸಿಕೊಂಡು ಈ ದಾಳಿ ನಡೆಸಲಾಗಿದೆ. ಆರಂಭದಲ್ಲಿ ಗ್ರೆನೇಡ್‌ ಎಸೆದರು. ಬಳಿಕ 6 ಗಂಟೆಗಳ ಕಾಲ ಉಗ್ರರು ಹಾಗೂ ಯೋಧರ ನಡುವೆ ಗುಂಡಿನ ಕಾಳಗ ನಡೆಯಿತು. ಅಂತಿಮವಾಗಿ ಎಲ್ಲ ದಾಳಿಕೋರರನ್ನು ಗುಂಡು ಹಾರಿಸಿ ಸಾಯಿಸಲಾಗಿದೆ.  ಅಫ್ಘಾನಿಸ್ತಾನ ಅಧ್ಯಕ್ಷ ಅಶ್ರಫ್ ಘನಿ ಶನಿವಾರ ಘಟನೆ ನಡೆದ ಸ್ಥಳಕ್ಕೆ ಭೇಟಿ ನೀಡಿದರು.