ಟಿ20: ಲಂಕಾವನ್ನು ಕ್ಲೀನ್‌ಸ್ವೀಪ್‌ ಮಾಡಿದ ದ.ಆಫ್ರಿಕಾ

ಜೊಹಾನ್ಸ್‌ಬರ್ಗ್‌: ಪ್ರವಾಸಿ ಶ್ರೀಲಂಕಾ ವಿರುದ್ಧದ 3ನೇ ಟಿ20 ಪಂದ್ಯವನ್ನೂ ಗೆದ್ದ ದಕ್ಷಿಣ ಆಫ್ರಿಕಾ, ಸರಣಿಯನ್ನು ಕ್ಲೀನ್‌ಸ್ವೀಪ್‌ ಆಗಿ ವಶಪಡಿಸಿಕೊಂಡಿದೆ.

ಜೊಹಾನ್ಸ್‌ಬರ್ಗ್‌ನಲ್ಲಿ ನಡೆದ ಅಂತಿಮ ಪಂದ್ಯವನ್ನು ಆಫ್ರಿಕಾ ಡಿಎಲ್‌ ನಿಯಮದಂತೆ 45 ರನ್ನುಗಳಿಂದ ಗೆದ್ದಿತು. ಮೊದಲು ಬ್ಯಾಟಿಂಗ್‌ ನಡೆಸಿದ ಹರಿಣಗಳ ಪಡೆ 2 ವಿಕೆಟಿಗೆ 198 ರನ್‌ ಪೇರಿಸಿತು. ಲಂಕಾ ಸರದಿಯ 12ನೇ ಓವರ್‌ ವೇಳೆ ಮಳೆ ಸುರಿದುದರಿಂದ ಗುರಿ ಬದಲಾಯಿತು. 17 ಓವರ್‌ಗಳಲ್ಲಿ 183 ರನ್‌ ಗಳಿಸುವ ಗುರಿ ಲಭಿಸಿತು. ಆದರೆ 15.4 ಓವರ್‌ಗಳಲ್ಲಿ 137ಕ್ಕೆ ಕುಸಿಯಿತು.

ಸಂಕ್ಷಿಪ್ತ ಸ್ಕೋರ್‌: ದಕ್ಷಿಣ ಆಫ್ರಿಕಾ 2 ವಿಕೆಟಿಗೆ 198 (ಪ್ರಿಟೋರಿಯಸ್‌ ಔಟಾಗದೆ 77, ಹೆಂಡ್ರಿಕ್ಸ್‌ 66). ಶ್ರೀಲಂಕಾ 15.4 ಓವರ್‌ಗಳಲ್ಲಿ 137 (ಡಿಕ್ವೆಲ್ಲ 38, ಉದಾನ 36, ಫೆಲುಕ್ವಾಯೊ 24ಕ್ಕೆ 4).