T20 World Cup: ಆತಿಥೇಯ ವೆಸ್ಟ್‌  ಇಂಡೀಸ್‌ಗೆ ಉಗಾಂಡ ಎದುರಾಳಿ

ಗಯಾನಾ: ರವಿವಾರ ನಡೆಯುವ ಟಿ20 ವಿಶ್ವಕಪ್‌ 18ನೇ ಪಂದ್ಯದಲ್ಲಿ ಎರಡು ಬಾರಿಯ ಚಾಂಪಿಯನ್‌, ಆತಿಥೇಯ ವೆಸ್ಟ್‌ ಇಂಡೀಸ್‌ ವಿರುದ್ಧ ಉಗಾಂಡ ಕಣಕ್ಕಿಳಿಯಲಿದೆ. ಗ್ರೂಪ್‌ “ಸಿ’ಯ ಈ ಪಂದ್ಯ ಗಯಾನದ ಪ್ರಾವಿಡೆನ್ಸ್‌ ಮೈದಾನದಲ್ಲಿ ನಡೆಯಲಿದೆ.

ಆರಂಭಿಕ ಪಂದ್ಯದಲ್ಲಿ ಪಪುವಾ ನ್ಯೂಗಿನಿಯ ವಿರುದ್ಧ ವೆಸ್ಟ್‌ ಇಂಡೀಸ್‌ ಗೆದ್ದಿತ್ತು. ಇತ್ತ ಉಗಾಂಡ ಕೂಡ ನ್ಯೂಗಿನಿಯ ವಿರುದ್ಧವೇ ಗೆದ್ದು, ಇನ್ನೊಂದು ಪಂದ್ಯದಲ್ಲಿ ಅಫ್ಘಾನಿಸ್ಥಾನ ವಿರುದ್ಧ ಸೋತಿದೆ. ಸದ್ಯ ಅಂಕಪಟ್ಟಿಯಲ್ಲಿ ವಿಂಡೀಸ್‌ 2 ಅಂಕದೊಂದಿಗೆ 2ನೇ ಸ್ಥಾನದಲ್ಲಿದೆ. ಉಗಾಂಡ ಕೂಡ 2 ಅಂಕ ಗಳಿಸಿದೆಯಾದರೂ ನೆಟ್‌ ರನ್‌ರೇಟ್‌ ಆಧಾರದಲ್ಲಿ 3ನೇ ಸ್ಥಾನದಲ್ಲಿದೆ. ಎರಡೂ ಪಂದ್ಯ ಗೆದ್ದಿರುವ ಅಫ್ಘಾನಿಸ್ಥಾನ ಅಗ್ರಸ್ಥಾನದಲ್ಲಿದೆ.

ವೆಸ್ಟ್‌ ಇಂಡೀಸ್‌ ತಂಡದಲ್ಲಿ ಆಲ್‌ ರೌಂಡರ್‌ ರೋಸ್ಟನ್‌ ಚೇಸ್‌ ಮತ್ತು ಉಗಾಂಡ ತಂಡದಲ್ಲಿ ಯುವ ವೇಗಿ ಕಾಸ್ಮಾಸ್‌ ಕ್ಯೆಯುಟ ಗಮನ ಸೆಳೆಯುವ ನಿರೀಕ್ಷೆಯಿದೆ.

ಸ್ಲೋ ಪಿಚ್‌ ಆಗಿರುವ ಗಯಾನದ ಪ್ರಾವಿಡೆನ್ಸ್‌ ಮೈದಾನ ವೇಗಿಗಳಿಗೆ ಹೆಚ್ಚು ನೆರವಾಗುತ್ತದೆ. ಇಲ್ಲಿ ಮೊದಲ ಇನ್ನಿಂಗ್ಸ್‌ ಸರಾಸರಿ ಸ್ಕೋರ್‌ 128. ಟಾಸ್‌ ಗೆಲ್ಲುವ ತಂಡ ಮೊದಲು ಬೌಲಿಂಗ್‌ ಆಯ್ದುಕೊಳ್ಳುವ ಸಾಧ್ಯತೆ ಹೆಚ್ಚು.