T20;ಫಿಲ್‌ ಸಾಲ್ಟ್ ಸೆಂಚುರಿ : ಇಂಗ್ಲೆಂಡ್‌ ಜಯಭೇರಿ

ಬ್ರಿಜ್‌ಟೌನ್‌ (ಬಾರ್ಬಡಾಸ್‌): ಆರಂಭಕಾರ ಫಿಲ್‌ ಸಾಲ್ಟ್ ಅವರ ಆಕರ್ಷಕ ಶತಕದ ನೆರವಿನಿಂದ ವೆಸ್ಟ್‌ ಇಂಡೀಸ್‌ ಎದುರಿನ ಟಿ20 ಸರಣಿಯಲ್ಲಿ ಇಂಗ್ಲೆಂಡ್‌ ಗೆಲುವಿನ ಆರಂಭ ಪಡೆದಿದೆ. ಬ್ರಿಜ್‌ಟೌನ್‌ ಮುಖಾಮುಖೀಯನ್ನು 8 ವಿಕೆಟ್‌ಗಳಿಂದ ಭರ್ಜರಿಯಾಗಿ ಜಯಿಸಿದೆ.

ವೆಸ್ಟ್‌ ಇಂಡೀಸ್‌ 9 ವಿಕೆಟಿಗೆ 182 ರನ್ನುಗಳ ಸವಾಲಿನ ಮೊತ್ತವನ್ನೇ ಪೇರಿಸಿತು. ಇಂಗ್ಲೆಂಡ್‌ ಕೇವಲ 16.5 ಓವರ್‌ಗಳಲ್ಲಿ ಎರಡೇ ವಿಕೆಟ್‌ ನಷ್ಟದಲ್ಲಿ 183 ರನ್‌ ಬಾರಿಸಿತು. ಫಿಲ್‌ ಸಾಲ್ಟ್ 103 ರನ್‌ ಬಾರಿಸಿ ಅಜೇಯರಾಗಿ ಉಳಿದರು. ಇದು ಅವರ 3ನೇ ಟಿ20 ಶತಕ. ಕೇವಲ 54 ಎಸೆತಗಳನ್ನು ಎದುರಿಸಿದ ಸಾಲ್ಟ್ 9 ಬೌಂಡರಿ ಹಾಗೂ 6 ಸಿಕ್ಸರ್‌ ಬಾರಿಸಿ ಅಬ್ಬರಿಸಿದರು. ಅಜೇಯ 59 ರನ್‌ ಮಾಡಿದ ಜೇಕಬ್‌ ಬೆಥೆಲ್‌ ಇಂಗ್ಲೆಂಡ್‌ ಸರದಿಯ ಮತ್ತೋರ್ವ ಪ್ರಮುಖ ಸ್ಕೋರರ್‌. ಇವರಿಬ್ಬರ 3ನೇ ವಿಕೆಟ್‌ ಜತೆಯಾಟದಲ್ಲಿ 107 ರನ್‌ ಒಟ್ಟುಗೂಡಿತು. ವಿಲ್‌ ಜಾಕ್ಸ್‌ 17 ರನ್‌ ಮಾಡಿದರೆ, ನಾಯಕ ಜಾಸ್‌ ಬಟ್ಲರ್‌ ಖಾತೆಯನ್ನೇ ತೆರೆಯಲಿಲ್ಲ.

ವೆಸ್ಟ್‌ ಇಂಡೀಸ್‌ ದೊಡ್ಡ ಮೊತ್ತ ಪೇರಿಸಿದರೂ ಯಾರಿಂದಲೂ ಅರ್ಧ ಶತಕ ದಾಖಲಾಗಲಿಲ್ಲ. ನಿಕೋಲಸ್‌ ಪೂರಣ್‌ 38, ರೊಮಾರಿಯೊ ಶೆಫ‌ರ್ಡ್‌ ಅಜೇಯ 35 ಮತ್ತು ಗುಡಕೇಶ್‌ ಮೋಟಿ 33 ರನ್‌ ಹೊಡೆದರು. ಇಂಗ್ಲೆಂಡ್‌ ಪರ ಶಕಿಬ್‌ ಮಹಮೂದ್‌ 4, ಆದಿಲ್‌ ರಶೀದ್‌ 3 ವಿಕೆಟ್‌ ಉರುಳಿಸಿದರು.