T20;ಮೂರೂ ಪಂದ್ಯ ಗೆದ್ದ ಬಾಂಗ್ಲಾ: ವಿಂಡೀಸಿಗೆ ವೈಟ್‌ವಾಶ್‌

ಕಿಂಗ್ಸ್‌ಟೌನ್‌ (ಸೇಂಟ್‌ ವಿನ್ಸೆಂಟ್‌): ಎರಡು ಬಾರಿಯ ಟಿ20 ವಿಶ್ವ ಚಾಂಪಿಯನ್‌ ವೆಸ್ಟ್‌ ಇಂಡೀಸಿಗೆ ಬಾಂಗ್ಲಾದೇಶ ಅವರದೇ ನೆಲದಲ್ಲಿ ವೈಟ್‌ವಾಶ್‌ ಮಾಡಿದೆ. ಏಕದಿನದಲ್ಲಿ ಅನುಭವಿಸಿದ ವೈಟ್‌ವಾಶ್‌ಗೆ ಸೇಡು ತೀರಿಸಿಕೊಂಡಿದೆ. ಇದಕ್ಕೂ ಹಿಂದಿನ ಟೆಸ್ಟ್‌ ಸರಣಿ 1-1ರಿಂದ ಸಮನಾಗಿತ್ತು.

ಸರಣಿಯ 3ನೇ ಹಾಗೂ ಅಂತಿಮ ಪಂದ್ಯದಲ್ಲಿ 80 ರನ್ನುಗಳ ಭರ್ಜರಿ ಗೆಲುವು ಸಾಧಿಸುವ ಮೂಲಕ ಬಾಂಗ್ಲಾದೇಶ ಈ ಸಾಧನೆಗೈದಿತು. ಬಾಂಗ್ಲಾ 7 ವಿಕೆಟಿಗೆ 189 ರನ್‌ ಪೇರಿಸಿದರೆ, ಕೆರಿಬಿಯನ್‌ ಪಡೆ 16.4 ಓವರ್‌ಗಳಲ್ಲಿ 109 ರನ್ನಿಗೆ ಆಲೌಟ್‌ ಆಯಿತು. ಮೊದಲೆರಡು ಪಂದ್ಯಗಳನ್ನು ಬಾಂಗ್ಲಾ 7 ರನ್‌ ಹಾಗೂ 27 ರನ್‌ ಅಂತರದಿಂದ ಗೆದ್ದಿತ್ತು. ಇದು ವಿಂಡೀಸ್‌ ವಿರುದ್ಧ ಹಾಗೂ ವಿದೇಶದಲ್ಲಿ ಬಾಂಗ್ಲಾದ ಮೊದಲ ಕ್ಲೀನ್‌ಸ್ವೀಪ್‌ ಪರಾಕ್ರಮವಾಗಿದೆ.

ಬಾಂಗ್ಲಾದೇಶದ ಬೃಹತ್‌ ಮೊತ್ತಕ್ಕೆ ಕಾರಣರಾದವರು ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್‌ ಜಾಕರ್‌ ಅಲಿ. ಅವರು 41 ಎಸೆತಗಳಿಂದ ಅಜೇಯ 71 ರನ್‌ ಮಾಡಿದರು. ಸಿಡಿಸಿದ್ದು 6 ಸಿಕ್ಸರ್‌, 3 ಫೋರ್‌. ಈ ಸಾಧನೆಗಾಗಿ ಅವರಿಗೆ ಪಂದ್ಯಶ್ರೇಷ್ಠ ಗೌರವ ಒಲಿಯಿತು.