ಟಿ. ವಿ. ಮೋಹನ್‌ದಾಸ್‌ ಪೈಗೆ ಶ್ರೀ ವಿದ್ಯಾಧಿರಾಜ ಪುರಸ್ಕಾರ

ಮಂಗಳೂರು: ಸಮಾಜಕ್ಕೆ ಸಲ್ಲಿಸು ತ್ತಿರುವ ಮಹತ್ವಪೂರ್ಣ ಕೊಡುಗೆಯಾಗಿ ಟಿ. ವಿ. ಮೋಹನ್‌ದಾಸ್‌ ಪೈ ಅವರಿಗೆ 2018ನೇ ಸಾಲಿನ ವಿದ್ಯಾಧಿರಾಜ ಪುರಸ್ಕಾರವನ್ನು ಪರ್ತಗಾಳಿ- ಗೋವಾ ಕಾಣಕೋಣದ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠದಿಂದ ನೀಡಲಾಗುತ್ತಿದೆ ಎಂದು ಕೇಂದ್ರೀಯ ಮಠ ಸಮಿತಿಯ ಅಧ್ಯಕ್ಷ ಶ್ರೀನಿವಾಸ ಡೆಂಪೋ ಅವರು ಪ್ರಕಟಿಸಿದ್ದಾರೆ.

ಮಠದಲ್ಲಿ ಎ. 7ರಂದು ನಡೆಯುವ ವಿಶೇಷ ಸಮಾರಂಭದಲ್ಲಿ ಶ್ರೀ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ್‌ ಸ್ವಾಮೀಜಿ ಮತ್ತು ಅವರ ಪಟ್ಟ ಶಿಷ್ಯ ಶ್ರೀ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ಅವರು ಪ್ರಶಸ್ತಿ ಪ್ರದಾನಿಸಲಿದ್ದಾರೆ.

ಪ್ರಸ್ತುತ ಬೆಂಗಳೂರಿನ ಆರಿನ್‌ ಕ್ಯಾಪಿಟಲ್‌ನ ಅಧ್ಯಕ್ಷರಾಗಿರುವ ಪೈ ಅವರು ಮಣಿಪಾಲ್‌ ಗ್ಲೋಬಲ್‌ ಎಜುಕೇಶನ್ನಿನ ಅಧ್ಯಕ್ಷ, ಮಣಿಪಾಲ್‌ ಎಜುಕೇಶನ್‌ ಆ್ಯಂಡ್‌ ಮೆಡಿಕಲ್‌ ಗ್ರೂಪ್‌ನ ಸಲಹೆಗಾರ, ಅಕ್ಷಯಪಾತ್ರ ಪ್ರತಿಷ್ಠಾನದ ಸ್ಥಾಪಕ ಟ್ರಸ್ಟಿ, ಸಿಡಿº ಇಂಡಿಯಾದ ಹೂಡಿಕೆ ಸಮಿತಿ ಸದಸ್ಯ ಸಹಿತ ಅನೇಕ ಹುದ್ದೆಗಳನ್ನು ನಿರ್ವಹಿಸುತ್ತಿದ್ದಾರೆ; 2015ರ ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತರು.

ಎ. 7ರಂದು ಶ್ರೀ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ್‌ ಸ್ವಾಮೀಜಿಯವರ ಗುರು ಪೀಠಾರೋಹಣದ 46ನೇ ವಾರ್ಷಿಕೋತ್ಸವ ಮತ್ತು ಮಠದ 544ನೇ ಸ್ಥಾಪನಾ ದಿನಾಚರಣೆ ಆಗಿರುತ್ತದೆ.