ಟಿ.ಆರ್‌.ಎ. ಪೈಯವರ ಪುತ್ರಿ ಪರಿಮಳಾ ಕಾಮತ್‌ ಅಮೆರಿಕದಲ್ಲಿ ವಿಧಿವಶ

ಮಣಿಪಾಲ: ಆಧುನಿಕ ಮಣಿಪಾಲದ ಬ್ರಹ್ಮ ಡಾ| ಟಿಎಂಎ ಪೈಯವರ ಕಿರಿಯ ಸಹೋದರ ಟಿ.ಆರ್‌. ಎ. ಪೈಯವರ ಪುತ್ರಿ, ಉಡುಪಿ ಮೂಲದ ದಿ|ಡಾ| ಗೋಪಾಲಕೃಷ್ಣ ಕಾಮತ್‌ ಅವರ ಪತ್ನಿ ಪರಿಮಳಾ ಕಾಮತ್‌ (87) ಅಸೌಖ್ಯದಿಂದ ಎ. 1ರಂದು ಅಮೆರಿಕದಲ್ಲಿ ನಿಧನ ಹೊಂದಿದರು. ಮೃತರು ಇಬ್ಬರು ಪುತ್ರರನ್ನು ಅಗಲಿದ್ದಾರೆ.

ಪರಿಮಳಾ ಅವರು ಎಳವೆಯಲ್ಲಿಯೇ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿದ್ದರು. ಓದು, ಫಿಲಾಸಫಿ, ಭಾಷಾಧ್ಯಯನ, ಇತಿಹಾಸ, ರಾಜಕೀಯ ವಿಷಯಗಳಲ್ಲಿ ಆಸಕ್ತರಾಗಿದ್ದರು. ಹಾಡುಗಾರರಾಗಿದ್ದ ಅವರು ಸಂಗೀತ ಸಂಯೋಜನೆ, ಬರವಣಿಗೆಯಲ್ಲಿಯೂ ಪರಿಣತಿ ಹೊಂದಿದ್ದರು. ಸ್ವರಚಿತ ಗೀತೆಗಳನ್ನು ಹಾಡುತ್ತಿದ್ದರು. ಕೀಬೋರ್ಡ್‌ ಕಲಾವಿದರಾಗಿದ್ದು, ಮಕ್ಕಳಿಗೆ ಭಾರತೀಯ ಸಂಗೀತವನ್ನು ಕಲಿಸುತ್ತಿದ್ದರು. 1987ರಲ್ಲಿ ಭಜನೆಗಳ ಆಲ್ಬಮ್‌ ಹೊರತಂದಿದ್ದರು. ಪತಿ ಗೋಪಾಲಕೃಷ್ಣ ಕಾಮತ್‌ ಜತೆ ಭಜನೆಗಳನ್ನು ಹಾಡುತ್ತಿದ್ದರು.

ಟಿ.ಆರ್‌.ಎ. ಪೈಯವರು ಡಾ| ಟಿ.ಎಂ.ಎ. ಪೈಯವರು ಉಡುಪಿಯಲ್ಲಿ ಸ್ಥಾಪಿಸಿದ ಕೆನರಾ ಮ್ಯೂಚುವಲ್‌ ಇನ್ಶೂರೆನ್ಸ್‌ ಕಂಪೆನಿಯಲ್ಲಿ ಅಧಿಕಾರಿಯಾಗಿದ್ದರು. ಕಂಪೆನಿಯು ರಾಷ್ಟ್ರೀಕರಣಗೊಂಡು ಭಾರತೀಯ ಜೀವವಿಮಾ ನಿಗಮವಾದ ಬಳಿಕ ಪೈಯವರು ಮದ್ರಾಸ್‌ ಮತ್ತು ಬೆಂಗಳೂರಿನಲ್ಲಿ ವಲಯ ವ್ಯವಸ್ಥಾಪಕರಾಗಿ (ಜೋನಲ್‌ ಮೆನೇಜರ್‌) ಸೇವೆ ಸಲ್ಲಿಸಿ ನಿವೃತ್ತಿ ಹೊಂದಿದರು. ಅನಂತರ ಪೈಯವರು 1970ರ ದಶಕದಲ್ಲಿ ಮಣಿಪಾಲದಲ್ಲಿ ನೆಲೆಸಿದ್ದರು. ಟಿ.ಆರ್‌.ಎ. ಪೈ ಮತ್ತು ಪರಿಮಳಾ ಅವರು ರಾಮಕೃಷ್ಣ ಪರಮಹಂಸರ ಭಕ್ತರಾಗಿದ್ದರು.