ಭಾರತೀಯ ಮೌಲ್ವಿಗಳು ಇಂದು ಸ್ವದೇಶಕ್ಕೆ: ಸುಷ್ಮಾ

ಹೊಸದಿಲ್ಲಿ: ಪಾಕಿಸ್ಥಾನದಲ್ಲಿ ನಾಪತ್ತೆಯಾಗಿದ್ದಾರೆ ಎನ್ನಲಾಗಿದ್ದ ದಿಲ್ಲಿಯ ಹಜ್ರತ್‌ ನಿಜಾಮುದ್ದೀನ್‌ ದರ್ಗಾದ ಇಬ್ಬರು ಧರ್ಮಗುರುಗಳು ಸುರಕ್ಷಿತವಾಗಿದ್ದು, ಸೋಮವಾರ ದೇಶಕ್ಕೆ ವಾಪಸಾಗಲಿದ್ದಾರೆ ಎಂದು ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಮಾಹಿತಿ ನೀಡಿದ್ದಾರೆ. ‘ನಾನು ಈಗಷ್ಟೇ ಕರಾಚಿಯ ಸೈಯದ್‌ ನಾಜಿಮ್‌ ಅಲಿ ನಿಜಾಮಿ ಅವರೊಂದಿಗೆ ಮಾತನಾಡಿದೆ. ಇಬ್ಬರೂ ಸುರಕ್ಷಿತವಾಗಿದ್ದು, ಸೋಮವಾರ ಮರಳುವುದಾಗಿ ಅವರು ಹೇಳಿದ್ದಾರೆ,’ ಎಂದು ಸುಷ್ಮಾ ಟ್ವೀಟ್‌ ಮಾಡಿದ್ದಾರೆ. ಶನಿವಾರ ರಾತ್ರಿ ಪಾಕಿಸ್ಥಾನ ಸರಕಾರವು ನಾಪತ್ತೆಯಾಗಿದ್ದ ಇಬ್ಬರೂ ಪತ್ತೆಯಾಗಿರುವುದಾಗಿ ತಿಳಿಸಿತ್ತು.