ಮಗ ಬಂದೇ ಬರುತ್ತಾನೆ‌.. ಮಗನನ್ನು ಕಳೆದುಕೊಂಡ ಸುರೇಶ್ ಅಂಗಡಿ ತಾಯಿಯ ರೋದನೆ

ಬೆಳಗಾವಿ: ಮಗನನ್ನು ಕಳೆದುಕೊಂಡು ಬಿಕ್ಕಿ ಬಿಕ್ಕಿ ಅಳುತ್ತಿರುವ ತಾಯಿ ಸೋಮವ್ವ ಅಂಗಡಿ, ಮಗ ಬಂದೇ ಬರುತ್ತಾನೆ‌ ಎಂದು ಅಳುತ್ತ ಕಾದು ಕುಳಿತಿದ್ದಾರೆ.

ಮಗ ಸುರೇಶ ಅಂಗಡಿಯ ಸಾವಿನ ಸುದ್ದಿ ತಿಳಿದು ಕಂಗಾಲಾಗಿರುವ ವೃದ್ಧ ತಾಯಿ, ಸದಾಶಿವ‌ಗರದ ಸಂಪಿಗೆ ರಸ್ತೆಯಲ್ಲಿರುವ ನಿವಾಸಕ್ಕೆ ಬಂದಿದ್ದಾರೆ. ಮಗ ನನ್ನ ಬಿಟ್ಟು ಹೋಗುವುದಿಲ್ಲ.‌ ಪಾರ್ಲಿಮೆಂಟ್ ಮೀಟಿಂಗ್ ಮುಗಿಸಿ ಒಂದು ತಿಂಗಳ ನಂತರ ಬರ್ತೀನಿ ಅಂತ ಹೇಳಿ ಹೋಗಿದ್ದಾನೆ.‌ ವಾಪಸ್ಸು ನನ್ನ ಭೇಟಿ ಆಗಲು ಬರುತ್ತಾನೆ ಎಂದು ಎದೆ ಬಡೆದುಕೊಳ್ಳುತ್ತ ಅಳುತ್ತಿದ್ದಾರೆ. ಮಗನನ್ನು ನೆನೆಸಿಕೊಂಡು ಅಳುತ್ತಿರುವ ತಾಯಿಯ ಆಕ್ರಂದನ ಮುಗಿಲು ಮುಟ್ಟಿದೆ.

ಇದನ್ನೂ ಓದಿ: ದೆಹಲಿಯಲ್ಲಿ ಇಂದು ಸಂಜೆ ನಾಲ್ಕು ಗಂಟೆಗೆ ಸುರೇಶ್ ಅಂಗಡಿ ಅಂತ್ಯಕ್ರಿಯೆ

‘ಕೆ.ಕೆ. ಕೊಪ್ಪ ಊರಾಗ ಸಾಲಿ ಕಟ್ಟಿಸಿ ಶಿಕ್ಷಣ ಕೊಡ್ಸಾತಾನ, ಊರಾಗ ಗುಡಿ ಕಟ್ಟಿಸ್ಯಾನ. ನನ್ನ ಹೆಸರಲೇ ಸಾಲಿ‌ ಕಟ್ಟಿಸಿ ಶಿಕ್ಷಣ ಕೊಡ್ಸಾತಾ. ಹಳ್ಳ್ಯಾಗಿಂದ ದಿಲ್ಲಿಗೆ ಹೋದ ಅಂತ ಹಿಗ್ಗಿ ಹಿಗ್ಗಿ ಹೇಳ್ತಿದ್ನಿ. ನನ್ನ ಬಿಟ್ಟ ಮಗ ಹೋಗಿಲ್ಲ… ಬರ್ತಾನ’ ಅಂತ ಕಣ್ಣೀರು ಹಾಕುತ್ತಿರುವ ತಾಯಿಯ ರೋದನೆ ಮುಗಿಲು ಮುಟ್ಟಿದೆ.

ವಾರದ ಹಿಂದೆ ಕೋವಿಡ್-19 ಸೋಂಕು ದೃಢಪಟ್ಟಿದ್ದ ಸುರೇಶ್ ಅಂಗಡಿಯವರು ಬುಧವಾರ ಸಂಜೆ ದೆಹಲಿಯ ಏಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಕಾರಿಯಾಗದೇ ನಿಧನರಾಗಿದ್ದಾರೆ.