ಕೆಎಎಸ್‌ ಪರೀಕ್ಷೆಯಲ್ಲಿ ವೀರೇಶ ಕಲ್ಯಾಣಕ್ಕೆ ಪ್ರಥಮ

ಸುರಪುರ: ಕರ್ನಾಟಕ ಲೋಕಸೇವಾ ಆಯೋಗ ಇತ್ತೀಚೆಗೆ ಪ್ರಕಟಿಸಿದ ಕೆಎಎಸ್‌ ಪರೀಕ್ಷೆ ರ್‍ಯಾಂಕ್‌ ಪಟ್ಟಿಯಲ್ಲಿ ತಾಲೂಕಿನ ಪೇಠಮ್ಮಾಪುರ ಗ್ರಾಮದ ವೀರೇಶ ಅಮರಣ್ಣ ಶೆಟ್ಟಿ ಕಲ್ಯಾಣ ಕರ್ನಾಟಕಕ್ಕೆ ಪ್ರಥಮ ರ್‍ಯಾಂಕ್‌ಗಳಿಸಿ ತಾಲೂಕಿಗೆ ಕೀರ್ತಿ ತಂದಿದ್ದಾರೆ.

ಯಾವುದೇ ಮೂಲ ಸೌಲಭ್ಯಗಳಿಲ್ಲದೇ ಇರುವ ಕುಗ್ರಾಮದಲ್ಲಿ ಜನಿಸಿ ಕನ್ನಡ ಮಾಧ್ಯಮದಲ್ಲಿಯೇ ಶಿಕ್ಷಣ ಪಡೆದ ಹಳ್ಳಿ ಹೈದ ಕೆಎಎಸ್‌ ಪರೀಕ್ಷೆ ಬರೆದು ಕಲ್ಯಾಣ ಕರ್ನಾಟಕಕ್ಕೆ ಪ್ರಥಮ ರ್‍ಯಾಂಕ್‌ ಪಡೆದು, ಹುಬ್ಬೇರಿಸುವಂತೆ ಮಾಡಿದ್ದಾರೆ.

ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣವನ್ನು ಹುಟ್ಟೂರಾದ ಪೇಠ ಅಮ್ಮಾಪುರದ ಸಗರನಾಡು ಶಿಕ್ಷಣ ಸಂಸ್ಥೆಯಲ್ಲಿ ಮುಗಿಸಿದ್ದಾರೆ. ತಾಯಿ ಅಕಾಲಿಕ ಮರಣಕ್ಕೆ ತುತ್ತಾದ ಹಿನ್ನೆಲೆಯಲ್ಲಿ ವೀರೇಶನಿಗೆ ಎಸ್ಸೆಸ್ಸೆಲ್ಸಿ ಪರೀಕ್ಷೆ ಬರೆಯಲು ಸಾಧ್ಯವಾಗಿರಲಿಲ್ಲ. ಮರು ವರ್ಷವೇ ಕೊಪ್ಪಳದ ಕುಣಿಕೇರಿ ಕೂಡಲ ಸಂಗಮನಾಥ ವಸತಿ ಶಾಲೆಯಲ್ಲಿ ಪ್ರವೇಶ ಪಡೆದು ಶೇ. 78 ಅಂಕ ಗಳಿಸಿ ಎಸ್ಸೆಸ್ಸೆಲ್ಸಿ ಉತ್ತೀರ್ಣರಾದರು.

ಹುನುಗುಂದದಲ್ಲಿ ಡಿಪ್ಲೋಮ ಉತ್ತೀರ್ಣವಾಗಿ ನಂತರ ಕಲಬುರಗಿ ಪಿಡಿಎ ಇಂಜಿನಿಯರಿಂಗ್‌ ಕಾಲೇಜಿನಿಂದ ಎಂಜಿನಿಯರಿಂಗ್‌ ಪದವಿ ಪಡೆದರು. 2013ರಲ್ಲಿ ಪ್ರಥಮ ಬಾರಿಗೆ ಕೆಎಎಸ್‌ ಪರೀಕ್ಷೆ ತೆಗೆದುಕೊಂಡಿದ್ದರು. ಆಗ ಯಶಸ್ಸು ದೊರಕಿರಲಿಲ್ಲ. ನಂತರ ಬದುಕಿಗೊಂದು ಆಸರೆ ಎನ್ನುವಂತೆ 2016ರಲ್ಲಿ ಬೆಸ್ಕಾಂ ಇಲಾಖೆಯಲ್ಲಿ ಸಹಾಯಕ ಹುದ್ದೆಗೆ ನೇಮಕವಾಗಿದ್ದರು.

ಹುದ್ದೆಯಲ್ಲಿ ಮನಸ್ಸಿಲ್ಲದೇ ಇದ್ದರೂ ಬದುಕಿನ ಜಟಕಾಬಂಡಿ ಸಾಗಿಸಲು ತಂದೆಯ ಒತ್ತಾಸೆ ಮೇರೆಗೆ ಹುದ್ದೆಯಲ್ಲಿ ಅನಿವಾರ್ಯತೆಯಿಂದ ಮುಂದುವರಿದಿದ್ದರು. ಆದರೆ ಕೆಎಎಸ್‌ ಬರೆಯುವ ಬಯಕೆಯನ್ನು ಮಾತ್ರ ಕೈಬಿಟ್ಟಿರಲಿಲ್ಲ. ಪರೀಕ್ಷೆ ಪಾಸಾಗಲೇಬೇಕು ಎನ್ನುವ ಛಲದಿಂದ ವೀರೇಶ 2017ರಲ್ಲಿ ಪುನಃ ಕೆಎಎಸ್‌ ಪರೀಕ್ಷೆ ಬರೆದರು.

1146 ಅಂಕ ಪಡೆದು ಕಲ್ಯಾಣ ಕರ್ನಾಟಕಕ್ಕೆ ಪ್ರಥಮ ರ್‍ಯಾಂಕ್‌ ಗಳಿಸಿ ಕಂದಾಯ ಇಲಾಖೆಯ ಉಪವಿಭಾಗಾಧಿಕಾರಿಯಾಗಿ ಆಯ್ಕೆಯಾಗಿದ್ದಾರೆ. ನಿತ್ಯ 8ರಿಂದ 10 ತಾಸು ಅಭ್ಯಾಸ ಮಾಡಿದ್ದೇನೆ. ನನಗೆ ರಜೆ ನೀಡಿ ಉತ್ತಮ ಮಾರ್ಗದರ್ಶನ ಮಾಡುವ ಮೂಲಕ ನನ್ನನ್ನು ಪ್ರೋತ್ಸಾಹಿಸಿದ ಇಲಾಖೆ ನಿರ್ದೇಶಕ ಅಶೋಕ ಕುಮಾರ ಅವರನ್ನು ಯಾವತ್ತು ಮರೆಯಲಾರೆ ಎಂದು ವೀರೇಶ ಸ್ಮರಿಸಿಕೊಳ್ಳುತ್ತಾರೆ.

ಸಾಧನೆ ಹಿಂದೆ ನನ್ನ ತಂದೆ ಅಮರಣ್ಣ, ಅಣ್ಣ ಶರಣಬಸವ, ಅಕ್ಕ
ಈರಮ್ಮ, ಭಾವ ಬಸವಣ್ಣೆಪ್ಪ ಅಂಗರಗಿ ಅವರ ಬೆಂಬಲ ಪ್ರೋತ್ಸಾಹ ಸದಾ ನನಗೆ ಬೆನ್ನೆಲುಬಾಗಿ ನಿಂತು ಕೆಲಸ ಮಾಡಿದೆ. ಆರೋಗ್ಯ ಮತ್ತು ಶಿಕ್ಷಣ ಇಲಾಖೆಯಲ್ಲಿ ಕೆಲಸ ಮಾಡಬೇಕು ಎನ್ನುವುದು ನನ್ನ ಇಚ್ಛೆ ಆಗಿತ್ತು ಎಂದು ವೀರೇಶ “ಉದಯವಾಣಿ’ಯೊಂದಿಗೆ ಅಭಿಪ್ರಾಯ ಹಂಚಿಕೊಂಡರು.

ಪರೀಕ್ಷೆ ಪಾಸು ಮಾಡಲು ನನಗೆ ದಿನ ಪತ್ರಿಕೆಗಳೇ ಕಾರಣ. ಅದರಲ್ಲೂ ವಿಶೇಷವಾಗಿ ಆಂಗ್ಲ ಮತ್ತು ಕನ್ನಡ ದಿನಪತ್ರಿಕೆಗಳು ಪ್ರಮುಖ ಕಾರಣ. ಎಲ್ಲ ಪತ್ರಿಕೆಗಳನ್ನು ನಿತ್ಯ ಬಿಡದೇ ಓದುತ್ತಿದ್ದೆ, ಕೆಲ ಸ್ಪರ್ಧಾತ್ಮಕ ಪತ್ರಿಕೆಗಳು, ನಿಯತಕಾಲಿಕೆಗಳು ಕೂಡ ನೆರವಿಗೆ ಬಂದವು ಎಂದು ವೀರೇಶ ಧನ್ಯತಾಭಾವ ವ್ಯಕ್ತಪಡಿಸುತ್ತಾರೆ.

ಇಂಗ್ಲಿಷ್‌ ಮಾಧ್ಯಮದಲ್ಲಿ ಓದಿದರೆ ಮಾತ್ರ ಸ್ಪರ್ಧಾತ್ಮಕ ಪರೀಕ್ಷೆ ಬರೆಯಲು ಸಾಧ್ಯ ಎನ್ನುವ ತಪ್ಪು ಕಲ್ಪನೆ ಕೆಲವರಲ್ಲಿದೆ. ಕನ್ನಡ ಮಾಧ್ಯಮದಲ್ಲಿ ಓದಿ ಸಾಧನೆ ಮಾಡಬಹುದು ಎನ್ನುವುದಕ್ಕೆ
ನಾನೇ ಉದಾಹರಣೆ. ಕನ್ನಡವನ್ನು ನಾವು ಸರಿಯಾಗಿ, ಚೆನ್ನಾಗಿ ಕಲಿಯಬೇಕು. ಹೆಚ್ಚು ಹೆಚ್ಚು ಸಾಹಿತ್ಯ ಅಧ್ಯಯನ ಮಾಡಬೇಕು. ಸಾಹಿತ್ಯ ಅಧ್ಯನದಿಂದ ನಮ್ಮಲ್ಲಿ ಶಬ್ದ ಸಂಗ್ರಹವಾಗುತ್ತದೆ. ಭಾಷೆ ಮೇಲೆ ಹಿಡಿತ ಸಾಧಿಸಲು ಸಾಧ್ಯವಾಗುತ್ತದೆ. ಕನ್ನಡವನ್ನು ಚೆನ್ನಾಗಿ ಕಲಿತರೆ ಆಂಗ್ಲ ಭಾಷೆ ಸರಳವಾಗಿ ಕಲಿಯಬಹುದು. ಅಲ್ಲದೇ ಯಾವುದೇ ವಿದ್ಯಾರ್ಥಿಗಳು ಬಯಸಿದಲ್ಲಿ ಮಾರ್ಗದರ್ಶನ ಮಾಡಲು ಸಿದ್ಧನಾಗಿದ್ದೇನೆ.
ವೀರೇಶ ಅಮರಣ್ಣ ಶೆಟ್ಟಿ

„ಸಿದ್ದಯ್ಯ ಪಾಟೀಲ