ದಿವಾಳಿ ಕಾಯ್ದೆಗೆ ಸುಪ್ರೀಂ ಸಮ್ಮತಿ

ನವದೆಹಲಿ: ಮನೆ ಖರೀದಿದಾರರಿಗೆ ಸಾಲದಾತರು ಎಂಬ ಸ್ಥಾನಮಾನವನ್ನು ನೀಡಿ ಕೇಂದ್ರ ಸರ್ಕಾರವು ದಿವಾಳಿ ಕಾಯ್ದೆಗೆ ಮಾಡಿದ ತಿದ್ದುಪಡಿಯನ್ನು ಸುಪ್ರೀಂಕೋರ್ಟ್‌ ಎತ್ತಿಹಿಡಿದಿದೆ. ಕೇಂದ್ರ ಸರ್ಕಾರದ ಈ ತಿದ್ದುಪಡಿಯ ವಿರುದ್ಧ ಸುಮಾರು 180ಕ್ಕೂ ಹೆಚ್ಚು ಬಿಲ್ಡರುಗಳು ಸುಪ್ರೀಂಕೋರ್ಟ್‌ ಮೊರೆ ಹೋಗಿದ್ದರು. ಈ ತಿದ್ದುಪಡಿಯ ಪ್ರಕಾರ ರಿಯಲ್ ಎಸ್ಟೇಟ್ ಕಂಪನಿಯು ದಿವಾಳಿಯಾದಾಗ ಮನೆ ಖರೀದಿದಾರರ ಹಣವನ್ನು ಮರುಪಾವತಿ ಮಾಡುವಲ್ಲಿ ಮೊದಲ ಆದ್ಯತೆ ನೀಡಲಾಗುತ್ತದೆ. ಅಷ್ಟೇ ಅಲ್ಲ, ದಿವಾಳಿಯಾದ ಕಂಪನಿಯ ಆಡಳಿತ ಮಂಡಳಿಯಲ್ಲಿ ಮನೆ ಖರೀದಿದಾರರಿಗೆ ಸದಸ್ಯತ್ವ, ದಿವಾಳಿ ಪ್ರಕ್ರಿಯೆಯಲ್ಲಿ ಅವರ ನಿರ್ಧಾರಕ್ಕೆ ಪ್ರಾಮುಖ್ಯತೆ ನೀಡುತ್ತದೆ.