ಭಾನುವಾರದ ಲಾಕ್ ಡೌನ್:  ಕೊಪ್ಪಳ ಸಂಪೂರ್ಣ ಬಂದ್

ಕೊಪ್ಪಳ: ಕೋವಿಡ್-19 ನಿಯಂತ್ರಣಕ್ಕಾಗಿ ಸರ್ಕಾರವು ಭಾನುವಾರ ಸಂಪೂರ್ಣ ಲಾಕ್ ಡೌನ್ ಮಾಡುವ ಘೋಷಣೆ ಮಾಡಿದ ಹಿನ್ನೆಲೆಯಲ್ಲಿ ಕೊಪ್ಪಳ ಜಿಲ್ಲೆಯು ಸಂಪೂರ್ಣ ಲಾಕ್ ಡೌನ್ ಅಗಿದೆ.

ನಗರದ ಅಂಗಡಿ, ವ್ಯಾಪಾರ ವಹಿವಾಟು ಬಂದ್ ಆಗಿವೆ. ಸಾರಿಗೆ, ಆಟೋ ಸಂಚಾರವೂ ಸ್ಥಗಿತ ಮಾಡಲಾಗಿದೆ. ಪ್ರಮುಖ ರಸ್ತೆಗಳೆಲ್ಲವೂ ಖಾಲಿಯಾಗಿದ್ದು ಎಲ್ಲೆಡೆ ಪೊಲೀಸ್ ಇಲಾಖೆ ಬ್ಯಾರೆಕೇಡ್ ನಿರ್ಮಿಸಿ ರಸ್ತೆ ಸಂಚಾರವನ್ನೂ ಬಂದ್ ಮಾಡಿದೆ.

ರವಿವಾರದ ಲಾಕ್ ಡೌನ್ ಗೆ ಜಿಲ್ಲೆಯು ಸಂಪೂರ್ಣ ಬೆಂಬಲ ವ್ಯಕ್ತಪಡಿಸಿದೆ. ತುರ್ತು ಸೇವೆ ಹೊರತುಪಡಿಸಿ ಇನ್ನೆಲ್ಲ ಸೇವೆ ಬಂದ್ ಆಗಿವೆ. ಈ ಮೊದಲು ಸರ್ಕಾರ ಲಾಕ್ ಡೌನ್ ನಿಂದ ಕೆಲ ವಿನಾಯತಿ ನೀಡಿದ ಬಳಿಕ ನಗರದಲ್ಲಿ ಜನ ಸಂಚಾರ ಕಾಣುತ್ತಿತ್ತು. ಸರ್ಕಾರ ಸಂಡೆ ಲಾಕ್ ಡೌನ್ ಘೋಷಣೆಯಿಂದ ಯಾರೊಬ್ಬರೂ ಮನೆಯಿಂದ ಹೊರಗೆ ಬಂದಿಲ್ಲ. ಉತ್ತಮ ಸ್ಪಂದನೆ ದೊರೆತಿದೆ.