ಮಗುವಿನ ಹುಟ್ಟುಹಬ್ಬಕ್ಕೆ “ಸುಕನ್ಯಾ ಸಮೃದ್ಧಿ’ಯೋಜನೆ ಉಡುಗೊರೆ

ಕಟಪಾಡಿ: ಮರ್ಣೆ ಫ್ರೆಂಡ್ಸ್‌ ಮರ್ಣೆ ಅವರು ಮಗುವಿನ ಹುಟ್ಟು ಹಬ್ಬಕ್ಕೆ ಸುಕನ್ಯಾ ಸಮೃದ್ಧಿ ಯೋಜನೆಯನ್ನು ಉಡುಗೊರೆಯಾಗಿ ನೀಡುವ ಮೂಲಕ ಹುಟ್ಟುಹಬ್ಬವನ್ನು ಸಂಭ್ರಮಾಚರಿಸಿದ ವಿಶೇಷ ಘಟನೆ ನಡೆದಿದೆ.

ಸಾಮಾನ್ಯವಾಗಿ ಹುಟ್ಟುಹಬ್ಬಕ್ಕೆ ಗೊಂಬೆ, ಡ್ರೆಸ್‌, ಇನ್ನಿತರ ಆಟಿಕೆ ಸಾಮಗ್ರಿಗಳನ್ನು ಬಂದವರೆಲ್ಲ ಉಡುಗೊರೆ ನೀಡುವುದು ಸರ್ವೇಸಾಮಾನ್ಯವಾಗಿದೆ. ಆದರೆ ಇಲ್ಲಿ ಸಾನ್ವಿ ಮರ್ಣೆ ಎಂಬ ಮಗುವಿನ ಹುಟ್ಟುಹಬ್ಬದ ಕಾರ್ಯಕ್ರಮದಲ್ಲಿ ಮರ್ಣೆ ಫ್ರೆಂಡ್ಸ್‌ನ ತಂಡದವರು ಸೇರಿ ವಿಶೇಷವಾದ ಉಡುಗೊರೆ ನೀಡಲು ನಿರ್ಧರಿಸಿತ್ತು.

ಆದರಂತೆ ಮರ್ಣೆ ಫ್ರೆಂಡ್ಸ್‌ ತಂಡದಿಂದ ಪ್ರಧಾನಿ ನರೇಂದ್ರ ಮೋದಿ ಅವರ ಕನಸಿನ ಯೋಜನೆಯಾದ ಸುಕನ್ಯಾ ಸಮೃದ್ಧಿ ಯೋಜನೆಯನ್ನು ಉಡುಪಿ ಪ್ರಧಾನ ಅಂಚೆ ಕಚೇರಿಯಲ್ಲಿ ಸಾನ್ವಿ ಹೆಸರಿನಲ್ಲಿ ಮಾಡಿ, ಅದರ ಮೊದಲ ಕಂತನ್ನು (ಒಂದು ಸಾವಿರ ರೂಪಾಯಿ)ಉಡುಗೊರೆಯಾಗಿ ಪಾವತಿಸಿ ಮಗುವಿನ ಹೆತ್ತವರಾದ ಜಯಾನಂದ ನಾಯ್ಕ, ಸಂಧ್ಯಾ ಜಯಾನಂದ ನಾಯ್ಕ ದಂಪತಿಗೆ ಸರ್ಟಿಫಿಕೇಟ್‌ ನೀಡುವ ಮೂಲಕ ಬಹಳಷ್ಟು ಅರ್ಥಪೂರ್ಣ ಮತ್ತು ಅತ್ಯಂತ ಅಮೂಲ್ಯವಾದ ಉಡುಗೊರೆ ಎಂದು ನೆರೆದ ಸಾರ್ವಜನಿಕರ ಪ್ರಶಂಸೆಗೆ ಪಾತ್ರರಾದರು.ಈ ಯೋಜನೆಯನ್ನು ಹೆತ್ತವರು ಮುಂದುವರಿಸಿಕೊಂಡು ಹೋದರೆ ಮಗಳ ವಿದ್ಯಾಭ್ಯಾಸ ಮತ್ತು ಮದುವೆಯ ಸಂದರ್ಭದಲ್ಲಿ ಬಹಳಷ್ಟು ಉಪಯುಕ್ತವಾಗುತ್ತದೆ .ಆಗ ಹುಟ್ಟುಹಬ್ಬದ ಅಮೂಲ್ಯವಾದ ಉಡುಗೊರೆ ಅರ್ಥಪೂರ್ಣಗೊಳ್ಳಬಹುದು.