ಕೆರೆ ತೂಬು ಸರಿಪಡಿಸದಿದ್ದರೆ ಆತ್ಮಹತ್ಯೆ

ಸಾಗರ: ತಾಲೂಕಿನ ತಾಳಗುಪ್ಪ ಸಮೀಪದ ತಲವಾಟ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿರುವ ಕೆರೆಗೋಳಿ ಕೆರೆಯನ್ನು ದುರಸ್ತಿಗೊಳಿಸಲಾಗದಿದ್ದರೆ ಸಾಮೂಹಿಕ ಆತ್ಮಹತ್ಯೆ ಮಾಡಿಕೊಳ್ಳಲು ಅವಕಾಶ ಕಲ್ಪಿಸಬೇಕು ಎಂದು ಇಲ್ಲಿನ ಕೆರೇಕೈ ಗ್ರಾಮಸ್ಥರು ಸೋಮವಾರ ತಲವಾಟ ಗ್ರಾಪಂಗೆ ಮನವಿ ಸಲ್ಲಿಸಿದ್ದಾರೆ.

ಕೆರೆಯ ತೂಬು ಎತ್ತರವಿರುವ ಕಾರಣ ನೀರು ಸರಾಗವಾಗಿ ಹರಿದು ಹೋಗುತ್ತಿಲ್ಲ. ಈ ಹಿನ್ನೆಲೆಯಲ್ಲಿ ತೋಟಗಳನ್ನು ರಕ್ಷಿಸಿಕೊಳ್ಳುವುದುಸಾಧ್ಯವೇ ಇಲ್ಲ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ಗ್ರಾಮಸ್ಥರು ಮನವಿಯಲ್ಲಿ ದೂರಿದ್ದಾರೆ.

ಸುಮಾರು 15 ಎಕರೆ ತೋಟ ಹಾಗೂ 15 ಎಕರೆ ಗದ್ದೆ ಪ್ರತಿ ವರ್ಷ ಜಲಾವೃತವಾಗುತ್ತಿದ್ದು,ಇದಕ್ಕೆ ಕಾರಣ ಸರ್ವೇ ನಂ. 82ರಲ್ಲಿರುವ ಕೆರೆಯಿಂದ ನೀರು ಹೊರ ಹೋಗುವ ತೂಬು ಎತ್ತರವಿರುವುದೇ ಆಗಿದೆ. ಆದ್ದರಿಂದ ಕೆರೆ ತೂಬು ತಗ್ಗಿಸಿ ನೀರು ಸರಾಗವಾಗಿ ಹರಿದು ಹೋಗುವ ವ್ಯವಸ್ಥೆ ಮಾಡಬೇಕು. ಇಲ್ಲದಿದ್ದರೆ ಸಾಮೂಹಿಕ ಆತ್ಮಹತ್ಯೆ ಮಾಡಿಕೊಳ್ಳುವುದು ಜನರಿಗೆ ಅನಿವಾರ್ಯವಾಗಲಿದೆ ಎಂದು ಪ್ರತಿಪಾದಿಸಿದ್ದಾರೆ.

ಗ್ರಾಪಂ ಮಾಜಿ ಅಧ್ಯಕ್ಷ ಪ್ರಸನ್ನ, ಗ್ರಾಮಸ್ಥರಾದ ಶ್ರೀಧರಭಟ್‌, ಪ್ರಕಾಶ್‌, ಶ್ರೀಪಾದ ಎಂ., ಜಯಲಕ್ಷ್ಮಿ ಇತರರು ಇದ್ದರು.

ದಕ್ಷಿಣಕನ್ನಡ