ಹೊಸ ಸಿನಿಮಾದತ್ತ ಸುಬ್ರಮಣ್ಯ ಪ್ರಸಾದ

“ಕೊಡೆ ಮುರುಗ’ ಎಂಬ ಕಾಮಿಡಿ ಡ್ರಾಮಾ ಸಿನಿಮಾವನ್ನು ನಿರ್ದೇಶಿಸಿ, ಅದರಲ್ಲೊಂದು ಪ್ರಮುಖ ಪಾತ್ರ ಕೂಡಾ ಮಾಡಿದ್ದ ಸುಬ್ರಮಣ್ಯ ಪ್ರಸಾದ್‌ ಈಗ ಹೊಸ ಸಿನಿಮಾಕ್ಕೆ ಅಣಿಯಾಗಿದ್ದಾರೆ.

ಈಗಾಗಲೇ ಹೊಸ ಸಿನಿಮಾದ ಪೂರ್ವತಯಾರಿ ಜೋರಾಗಿ ನಡೆದಿದ್ದು, ಶೀಘ್ರದಲ್ಲೇ ಸೆಟ್ಟೇರಲಿದೆ. ಈ ಬಾರಿಯೂ ನಿರ್ದೇಶನದ ಜೊತೆಗೆ ಸುಬ್ರಮಣ್ಯ ಪ್ರಸಾದ್‌ ಅವರೇ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.

ಸದ್ಯ ಕನ್ನಡ ಚಿತ್ರರಂಗದಲ್ಲಿ ಕಂಟೆಂಟ್‌ ಟ್ರೆಂಡ್‌ ನಡೆಯುತ್ತಿದ್ದು, ಸುಬ್ರಮಣ್ಯ ಪ್ರಸಾದ್‌ ಕೂಡಾ ಈ ಬಾರಿ ಕಂಟೆಂಟ್‌ ಆಧಾರಿತ ಸಿನಿಮಾದತ್ತ ಗಮನಹರಿಸಿದ್ದಾರೆ. “ಸಿನಿಮಾದ ಕಂಟೆಂಟ್‌ ಗಟ್ಟಿಯಾಗಿದ್ದರೆ ಸಿನಿಮಾವನ್ನು ಜನ ಇಷ್ಟಪಡುತ್ತಾರೆ. ಒಮ್ಮೆ ಜನ ಇಷ್ಟಪಟ್ಟರೆ ಮುಂದೆ ಸಿನಿಮಾ ಬೇರೆ ಮಟ್ಟಕ್ಕೆ ಸಾಗುತ್ತದೆ ಎಂಬುದು ಈಗಾಗಲೇ ಸಾಬೀತಾಗಿದೆ. ಆ ದೃಷ್ಟಿಯಿಂದ ನಾನು ಕೂಡಾ ಇವತ್ತಿನ ಟ್ರೆಂಡ್‌ ಅನ್ನು ಗಮನದಲ್ಲಿಟ್ಟುಕೊಂಡು ಸಿನಿಮಾ ಮಾಡುತ್ತಿದ್ದೇನೆ. ಈಗಾಗಲೇ ಪೂರ್ವತಯಾರಿ ನಡೆಯುತ್ತಿದೆ. ಒಂದಷ್ಟು ಹೊಸ ಪ್ರಯೋಗದೊಂದಿಗೆ ಸಿನಿಮಾವನ್ನು ಕಟ್ಟಿಕೊಡಬೇಕೆಂಬ ಆಸೆಯಿಂದ ಸಿದ್ಧತೆ ಮಾಡಿಕೊಳ್ಳುತ್ತಿದ್ದೇನೆ’ ಎನ್ನುತ್ತಾರೆ ಸುಬ್ರಮಣ್ಯ ಪ್ರಸಾದ್‌.