ಟಿಕ್ ಟಾಕ್ ವಿಡಿಯೋಗಾಗಿ ಕಾರು, ಬೈಕ್ ನಲ್ಲಿ ಸ್ಟಂಟ್: ಯುವಕರು ಅರೆಸ್ಟ್

ನೋಯ್ಡಾ: ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕಾರು ಬೈಕ್ ಬಳಸಿಕೊಂಡು ಟಿಕ್ ಟಾಕ್ ವಿಡಿಯೋ ಮಾಡುತ್ತಿದ್ದ ಐವರು ಯುವಕರನ್ನು ಸಾರ್ವಜನಿಕರ ಶಾಂತಿ ಕದಡುತ್ತಿದ್ದ ಆರೋಪದಡಿಯಲ್ಲಿ ಗ್ರೇಟರ್ ನೋಯ್ಡಾ ಪೊಲೀಸರು ಬಂಧಿಸಿದ್ದಾರೆ.

ಯುವಕರೆಲ್ಲರೂ 20 ರಿಂದ 25 ವಯಸ್ಸಿನ ಒಳಗಿರುವವರು. ಭಾನುವಾರ ಗಲ್ಗೋಟಿಯಾಸ್ ವಿಶ್ವವಿದ್ಯಾಲಯದ ಮುಂದಿನ ಹೆದ್ದಾರಿಯಲ್ಲಿ ಈ ಐವರು ಕಾರು, ಬೈಕ್ ನಲ್ಲಿ ಸ್ಟಂಟ್ ಮಾಡುತ್ತಾ ಟಿಕ್ ಟಾಕ್ ವಿಡಿಯೋ ಚಿತ್ರೀಕರಣ ಮಾಡುತ್ತಿದ್ದರು.

ಇದರಿಂದ ಹೆದ್ದಾರಿಯಲ್ಲಿ ಸಂಚರಿಸುತ್ತಿದ್ದ ಸಾರ್ವಜನಿಕರಿಗೆ ಹಾಗೂ ವಾಹನಗಳಿಗೆ ತೀವ್ರತರವಾದ ತೊಂದರೆಯಾಗುತ್ತಿದ್ದವು. ಕೆಲ ನಾಗರಿಕರು ಇದನ್ನು ಕಂಡು ಪೊಲೀಸರಿಗೆ ದೂರು ಕೂಡ ನೀಡಿದ್ದರು.

ಈ ಹಿನ್ನಲೆಯಲ್ಲಿ ಪೊಲೀಸರು ಐವರು ಯುವಕರನ್ನು ಬಂಧಿಸಿ ವಿಚಾರಣೆಗೊಳಪಡಿಸಿದ್ದಾರೆ.