Meghalaya ಮುಖ್ಯಮಂತ್ರಿ ಕಚೇರಿ ಮೇಲೆ ಕಲ್ಲು ತೂರಾಟ, 5 ಮಂದಿಗೆ ಗಾಯ

ತುರಾ: ಮೇಘಾಲಯ ಮುಖ್ಯಮಂತ್ರಿ ಕಾನ್ರಾಡ್ ಸಂಗ್ಮಾ ಅವರ ಕಚೇರಿ ಮೇಲೆ ಗುಂಪೊಂದು ಸೋಮವಾರ ಕಲ್ಲು ತೂರಾಟ ನಡೆಸಿದ್ದು, ಐವರು ಭದ್ರತಾ ಸಿಬಂದಿ ಗಾಯಗೊಂಡಿದ್ದಾರೆ.

ಈ ಸಂದರ್ಭದಲ್ಲಿ ಕಚೇರಿಯಲ್ಲೇ ಇದ್ದ ಸಂಗ್ಮಾ ಅವರಿಗೆ ಘಟನೆಯಲ್ಲಿ ಯಾವುದೇ ಗಾಯವಾಗಿಲ್ಲ, ಘಟನೆ ಬಳಿಕ ಕಚೇರಿಯೊಳಗೆ ಸಿಲುಕಿಕೊಂಡಿದ್ದಾರೆ.

ಉಪವಾಸ ಸತ್ಯಾಗ್ರಹ ನಡೆಸುತ್ತಿರುವ ಆಂದೋಲನ ನಿರತ ಗುಂಪುಗಳೊಂದಿಗೆ ಸಿಎಂ ಸಂಗ್ಮಾ ಸಭೆ ನಡೆಸುತ್ತಿದ್ದ ವೇಳೆ ಈ ಘಟನೆ ನಡೆದಿದೆ. ಗಾರೋ ಹಿಲ್ಸ್‌ನಲ್ಲಿ ನೆಲೆಗೊಂಡಿರುವ ಗುಂಪುಗಳು ತುರಾದಲ್ಲಿ ಚಳಿಗಾಲದ ರಾಜಧಾನಿಯನ್ನು ಒತ್ತಾಯಿಸುತ್ತಿವೆ.

14 ದಿನಗಳಿಂದ ನಡೆಯುತ್ತಿರುವ ಉಪವಾಸ ಸತ್ಯಾಗ್ರಹದ ನಂತರ, ಸಿಎಂ ಸಂಗ್ಮಾ ಸೋಮವಾರ ಶಿಲ್ಲಾಂಗ್‌ನಿಂದ ತುರಾಗೆ ಆಗಮಿಸಿ, ಟಿಯುರಾದಲ್ಲಿರುವ ಮುಖ್ಯಮಂತ್ರಿ ಕಚೇರಿಯಲ್ಲಿ (ಸಿಎಂಒ) ಅ’ಚಿಕ್ ಕಾನ್ಷಿಯಸ್ ಹೋಲಿಸ್ಟಿಕ್ ಇಂಟಿಗ್ರೇಟೆಡ್ ಕ್ರಿಮಾ (ACHIK) ಮತ್ತು ಗಾರೊ ಹಿಲ್ಸ್ ಸ್ಟೇಟ್ ಮೂವ್‌ಮೆಂಟ್ ಕಮಿಟಿ (GHSMC) ಸೇರಿದಂತೆ ಪ್ರತಿಭಟನಾನಿರತ ನಾಗರಿಕ ಸಂಸ್ಥೆಗಳೊಂದಿಗೆ ಮಾತುಕತೆ ನಡೆಸಿದ್ದಾರೆ.