ಸ್ಟೀಪಲ್‌ಚೇಸ್‌: ಕೀನ್ಯಾ ಸ್ಪರ್ಧಿಯ ವಿಶ್ವದಾಖಲೆ

ಮೊನಾಕೊ: “ಮೊನಾಕೊ ಡೈಮಂಡ್‌ ಲೀಗ್‌’ ಕೂಟದ ವನಿತೆಯರ 3 ಸಾವಿರ ಮೀಟರ್‌ ಸ್ಟೀಪಲ್‌ಚೇಸ್‌ ಸ್ಪರ್ಧೆಯಲ್ಲಿ ಕೀನ್ಯಾದ ಆ್ಯತ್ಲೀಟ್‌ ಬೀಟ್‌ರೈಸ್‌ ಚೆಪ್‌ಕೊಯೆಕ್‌ ನೂತನ ವಿಶ್ವದಾಖಲೆ ನಿರ್ಮಿಸಿದ್ದಾರೆ. 27ರ ಹರೆಯದ ಚೆಪ್‌ಕೊಯೆಕ್‌ ಈ ಸಾಧನೆಯನ್ನು 8 ನಿಮಿಷ, 44.32 ಸೆಕೆಂಡ್‌ಗಳಲ್ಲಿ ದಾಖಲಿಸಿದರು. ಸಮೀಪದ ಸ್ಪರ್ಧಿಗಿಂತ 16 ಸೆಕೆಂಡ್‌ಗಳಿಗಿಂತಲೂ ಉತ್ತಮ ಸಾಧನೆಯೊಂದಿಗೆ ಗುರಿ ತಲುಪಿದರು.

2016ರಲ್ಲಿ ಬಹೆನಿನರುತ್‌ ಜೆಬೆಟ್‌ 8 ನಿಮಿಷ, 52.78 ಸೆಕೆಂಡ್‌ಗಳಲ್ಲಿ ಈ ಸಾಧನೆ ಮಾಡಿ ವಿಶ್ವದಾಖಲೆ ನಿರ್ಮಿಸಿದ್ದರು. ಕಳೆದ ತಿಂಗಳಲ್ಲಷ್ಟೇ ಪ್ಯಾರಿಸ್‌ ಕೂಟದಲ್ಲಿ 8 ನಿಮಿಷ, 59.36 ಸೆಕೆಂಡ್‌ಗಳಲ್ಲಿ ಸಾಧನೆಗೈದದ್ದು ಚೆಪ್‌ಕೊಯೆಕ್‌ ಅವರ ಅತ್ಯುತ್ತಮ ನಿರ್ವಹಣೆಯಾಗಿತ್ತು. 2016ರ ರಿಯೋ ಒಲಿಂಪಿಕ್ಸ್‌ ಹಾಗೂ 2017ರ ಲಂಡಬ್‌ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ 4ನೆಯವರಾಗಿ ಸ್ಪರ್ಧೆ ಮುಗಿಸಿದ್ದರು.