ಜನರ ದೂರಿಗೆ ಓಗೊಡಲು “ನೂರು’ಶುರು

ಬೆಂಗಳೂರು: ಪೊಲೀಸರು ಮನಸ್ಸು ಮಾಡಿದರೆ ಅಂತರರಾಷ್ಟ್ರೀಯ ಮನ್ನಣೆ ಗಳಿಸಿರುವ ಬೆಂಗಳೂರು ಮಹಾನಗರವನ್ನು “ಗೂಂಡಾಮುಕ್ತ’ ನಗರವನ್ನಾಗಿ ಮಾಡಬಹುದು ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು.

ನಗರ ಪೊಲೀಸ್‌ ಆಯುಕ್ತರ ಕಚೇರಿಯಲ್ಲಿ ಶನಿವಾರ ನಡೆದ “ನಮ್ಮ 100′ ಮತ್ತು “ಕಮಾಂಡೊ ಸೆಂಟರ್‌’ಗೆ ಚಾಲನೆ ನೀಡಿದ ಅವರು, “ಸಮಾಜವನ್ನು ಸಂಪೂರ್ಣ ಅಪರಾಧ ಮುಕ್ತವಾಗಿಸಲು ಅಸಾಧ್ಯ. ಆದರೆ, ಕಡಿಮೆ ಮಾಡಬಹುದು. ಇದು ಸವಾಲಿನ ಕೆಲಸವೇನಲ್ಲ. ಇನ್ಸ್‌ಪೆಕ್ಟರ್‌, ಎಸಿಪಿಗಳು ಮನಸ್ಸು ಮಾಡಬೇಕು ಅಷ್ಟೇ,’ ಎಂದು ತಿಳಿಸಿದರು.

ಪೊಲೀಸ್‌ ವ್ಯವಸ್ಥೆಯನ್ನು ಜನಸ್ನೇಹಿಯಾಗಿಸಲು ಪೊಲೀಸ್‌ ಸಹಾಯವಾಣಿ 100 ಅನ್ನು “ನಮ್ಮ 100′ ಆಗಿ ರೂಪಾಂತರಿಸಲಾಇದೆ. ಸದ್ಯ ಬೆಂಗಳೂರಲ್ಲಿ ಮಾತ್ರ ಈ ವ್ಯವಸ್ಥೆಯಿದ್ದು, ಮುಂದಿನ ದಿನಗಳಲ್ಲಿ ರಾಜ್ಯದ ಎಲ್ಲ ಜಿಲ್ಲಾ ಕೇಂದ್ರಗಳಲ್ಲೂ ಈ ವ್ಯವಸ್ಥೆ ಅಳವಡಿಸಲು ಕ್ರಮಕೈಗೊಳ್ಳುವಂತೆ ರಾಜ್ಯ ಪೊಲೀಸ್‌ ಮಹಾನಿರ್ದೇಶಕರಿಗೆ ಸೂಚಿಸಿದ್ದೇನೆ ಎಂದರು.

ಮೊದಲ ಕರೆ ಸ್ವೀಕರಿಸಿದ ಸಿಎಂ: ಮುಖ್ಯಮಂತ್ರಿ ಸಿದ್ದರಾಮಯ್ಯ “ನಮ್ಮ 100 ಉದ್ಘಾಟನೆ’ ವೇಳೆ ಕಮಾಂಡೊ ಸೆಂಟರ್‌ನಲ್ಲಿ ಸ್ವತಃ ಕರೆ ಸ್ವೀಕರಿಸಿ ಮಾತನಾಡಿದರು. ಶಿವಾಜಿನಗರದ ಬಸ್‌ ನಿಲ್ದಾಣದಿಂದ ಮಹಿಳೆಯೊಬ್ಬರು ಕರೆ ಮಾಡಿ ತನ್ನ ಪಾಸ್‌ ಪೋರ್ಟ್‌ ಕಳೆದು ಹೋಗಿದೆ ಸಹಾಯ ಮಾಡಿ ಎಂದು ದೂರು ನೀಡಿದರು. ಇತ್ತ ಕೆರೆ ಸ್ವೀಕರಿಸಿದ ಮುಖ್ಯಮಂತ್ರಿಗಳು, ಹೆದರುವ ಅಗತ್ಯವಿಲ್ಲ. ನಮ್ಮ ಪೊಲೀಸರು ಕೂಡಲೇ ನಿಮ್ಮನ್ನು ಸಂಪರ್ಕಿಸಿ ಸಹಾಯ ಮಾಡಲಿದ್ದಾರೆ ಎಂದರು. 

ಗೃಹ ಸಚಿವ ಡಾ ಜಿ.ಪರಮೇಶ್ವರ್‌, ಸಚಿವ ರೋಷನ್‌ಬೇಗ್‌, ಸರ್ಕಾರದ ಅಪರ ಕಾರ್ಯದರ್ಶಿ ಸುಭಾಷ್‌ ಚಂದ್ರ, ಸಿಎಂ ಪ್ರಧಾನ ಕಾರ್ಯದರ್ಶಿ ಎಲ್‌.ಕೆ.ಅತಿಕ್‌, ನಗರ ಪೊಲೀಸ್‌ ಆಯುಕ್ತ ಪ್ರವೀಣ್‌ ಸೂದ್‌, ಹೆಚ್ಚುವರಿ ಪೊಲೀಸ್‌ ಆಯುಕ್ತರಾದ ಮಾಲಿನಿ ಕೃಷ್ಣಮೂರ್ತಿ, ಹೇಮಂತ್‌ ನಿಂಬಾಳ್ಕರ್‌, ರವಿ(ಅಪರಾಧ ವಿಭಾಗ), ಡಿಸಿಪಿಗಳು, ಇನ್‌ಸ್ಪೆಕ್ಟರ್‌ಗಳು, ಎಸಿಪಿಗಳು ಇದ್ದರು.

ಏನಿದು ನಮ್ಮ 100?: ಮಹಿಳಾ ಸಹಾಯವಾಣಿ, ಮಕ್ಕಳ ಸಹಾಯವಾಣಿ ಸೇರಿದಂತೆ ನಾನಾ ಸೇವೆಗಳನ್ನು ಒಂದೆ ಸೂರಿನಡಿ ತರಲಾಗಿದೆ.  ಈ ಸೇವೆ ಪಡೆಯಲು ಸಾರ್ವಜನಿಕರು 100ಗೆ ಡಯಲ್‌ ಮಾಡಬೇಕು. ಪೊಲೀಸ್‌ ಸೇವೆಗೆ 1, ಸಂಚಾರ ಪೊಲೀಸ್‌ ಸೇವೆಗೆ 2, ವಿಚಾರಣೆ ಮತ್ತು ಪೊಲೀಸ್‌ ಠಾಣೆಗೆ ಭೇಟಿ ನೀಡುವ ಸಮಯ ನಿಗದಿಗೆ 3 ನಮೂದಿಸಬೇಕು. ಆಗ ಬೇಕಾದ ಮಾಹಿತಿ ಮತ್ತು ನೆರವು ಲಭ್ಯವಾಗುತ್ತದೆ. ಮುಂದಿನ ಒಂದೆರಡು ವಾರಗಳಲ್ಲಿ ಅಗ್ನಿ ಶಾಮಕ ಮತ್ತು ಆಂಬ್ಯುಲೆನ್ಸ್‌ ಸೇವೆಯನ್ನೂ ಈ ವ್ಯವಸ್ಥೆಯಲ್ಲೇ ಸೇರಿಸುವ ಉದ್ದೇಶವಿದೆ. ಇದಕ್ಕಾಗಿ ತಾಂತ್ರಿಕ ಬದಲಾವಣೆ ಮಾಡಲಾಗುತ್ತಿದೆ. 

ಕನ್ನಡಿಗರಿಗಿಲ್ಲ ಪ್ರಾಧಾನ್ಯತೆ: ಹೊಸದಾಗಿ ಆರಂಭವಾಗಿರುವ ಕಮಾಂಡೊ ಸೆಂಟರ್‌ನಲ್ಲಿ ಹೆಚ್ಚಾಗಿ ತಮಿಳರು, ಇತರೆ ಭಾಷಿಕರಿಗೆ ಆದ್ಯತೆ ನೀಡಲಾಗಿದೆ. ಕನ್ನಡಿಗರನ್ನು ಕಡೆಗಣಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದೆ. ಇಲ್ಲಿನ ಕೆಲ ಸಿಬ್ಬಂದಿಗೆ ಸ್ಪಷ್ಟವಾಗಿ ಕನ್ನಡವೇ ಬರುವುದಿಲ್ಲ. ಇನ್ನು ಬೆಂಗಳೂರಿಗರ ಜತೆ ಹೇಗೆ ವ್ಯವಹರಿಸುತ್ತಾರೆ. ಅಲ್ಲದೇ ಕಮಾಂಡ್‌ ಸೆಂಟರ್‌ನಲ್ಲಿ ಹೆಚ್ಚಿನವರು ಪರಸ್ಪರ ತಮಿಳು ಮತ್ತು ಉರ್ದುವಿನಲ್ಲಿ ಮಾತನಾಡುತ್ತಾರೆ. 

ಈ ಬಗ್ಗೆ ಕಮಾಂಡೊ ಸೆಂಟರ್‌ನಲ್ಲಿದ್ದ ಸಿಬ್ಬಂದಿಯೊಬ್ಬರು ಉದಯವಾಣಿಗೆ ಜತೆ ಮಾತನಾಡಿ, “ಬೆಂಗಳೂರಿನಲ್ಲಿ ಇಂಗ್ಲಿಷ್‌, ಹಿಂದಿ, ತಮಿಳು ಇತರೆ ಭಾಷಿಕರೆ ಹೆಚ್ಚಾಗಿದ್ದಾರೆ. ಹೀಗಾಗಿ ಕನ್ನಡವನ್ನೊಳಗೊಂಡಂತೆ ಬಹುಭಾಷೆ ಬರುವವರನ್ನು ಆಯ್ಕೆ ಮಾಡಲಾಗಿದೆ,’ ಎಂದು ಅವರು ಹೇಳಿದರು. 

ನಗರದಲ್ಲಿ 1.10 ಕೋಟಿ ಜನಸಂಖ್ಯೆ ಇದೆ. 30ರಿಂದ 40 ಲಕ್ಷ ಮಂದಿ ನಿತ್ಯ ಬಂದು ಹೋಗುತ್ತಾರೆ. ಈ ಹಿನ್ನೆಲೆಯಲ್ಲಿ ಸಾರ್ವಜನಿಕರ ಸುರಕ್ಷತೆಗಾಗಿ “ನಮ್ಮ 100′ ಕೇಂದ್ರ ಆರಂಭಿಸಲಾಗಿದೆ. ಸಿಬ್ಬಂದಿ 24/7 ಕರ್ತವ್ಯ ನಿರ್ವಹಿಸಲಿದ್ದಾರೆ. ಕೇಂದ್ರಕ್ಕೆ ಬರುವ ದೂರುಗಳನ್ನು ಹೊಯ್ಸಳ, ಪಿಂಕ್‌ ಹೊಯ್ಸಳ ಸೇವೆಗೆ ವರ್ಗಾಯಿಸಿ ತ್ವರಿತಗತಿಯಲ್ಲಿ ಸಹಾಯ ಮಾಡಲಾಗುವುದು
-ಸಿದ್ದರಾಮಯ್ಯ, ಮುಖ್ಯಮಂತ್ರಿ