ಮೂವರು ಸ್ಟಾರ್‌ಗಳು, ನೂರಾರು ಅಭಿಮಾನಿಗಳು, ಸಿನಿಮಾಕ್ಕೆ ಬೆನ್ನುಲುಬಾಗಿ ನಿಂತ ಚಿತ್ರೋದ್ಯಮ ಮಂದಿ … – ಈ ತರಹದ ಒಂದು ಸಂಗಮಕ್ಕೆ ಕಾರಣವಾಗಿದ್ದು, “ಭಜರಂಗಿ-2′ ಪ್ರೀ ರಿಲೀಸ್‌ ಇವೆಂಟ್.
ಶಿವರಾಜ್‌ ಕುಮಾರ್‌ ನಟನೆಯ “ಭಜರಂಗಿ-2′ ಚಿತ್ರ ಅಕ್ಟೋಬರ್‌ 29ರಂದು ಅದ್ಧೂರಿಯಾಗಿ ಬಿಡುಗಡೆಯಾಗುತ್ತಿರೋದು ನಿಮಗೆ ಗೊತ್ತೇ ಇದೆ. ದೇಶದಾದ್ಯಂತ ಸುಮಾರು ಒಂದು ಸಾವಿರಕ್ಕೂ ಹೆಚ್ಚು ಪರದೆಗಳಲ್ಲಿ ಈ ಚಿತ್ರ ಪ್ರದರ್ಶನ ಕಾಣಲಿದೆ. ಈ ಮೂಲಕ ಎರಡನೇ ಲಾಕ್‌ಡೌನ್‌ ನಂತರ ಕನ್ನಡ ಚಿತ್ರರಂಗದಿಂದ ಬಿಡುಗಡೆಯಾಗುತ್ತಿರುವ ಬಹುನಿರೀಕ್ಷಿತ ಹಾಗೂ ಅದ್ಧೂರಿ ಚಿತ್ರವಾಗಿ “ಭಜರಂಗಿ-2′ ಬಿಡುಗಡೆಯಾಗುತ್ತಿದೆ. ಈ ಖುಷಿಯನ್ನು ಸಿನಿಮಾತಂಡ ಪ್ರೀ ರಿಲೀಸ್‌ ಇವೆಂಟ್‌ನಲ್ಲಿ ಹಂಚಿಕೊಂಡಿತು.
ಕಾರ್ಯಕ್ರಮಕ್ಕೆ ನಟ ರಾಕಿಂಗ್‌ ಸ್ಟಾರ್‌ ಯಶ್, ಪವರ್‌ಸ್ಟಾರ್‌ ಪುನೀತ್‌ ರಾಜ್‌ಕುಮಾರ್‌ ಅತಿಥಿಯಾಗಿ ಆಗಮಿಸಿದರು. ಜೊತೆಗೆ ಇಡೀ ಚಿತ್ರತಂಡ ಹಾಜರಿತ್ತು. ಚಿತ್ರದ ಹಾಡು, ಟೀಸರ್‌, ಟ್ರೇಲರ್‌ ಪ್ರದರ್ಶನದ ಜೊತೆಗೆ ಕಲರ್‌ಫ‌ುಲ್‌ ಡ್ಯಾನ್ಸ್‌ ಮೂಲಕ ರಂಜಿಸಲಾಯಿತು. ತುಂಬಾ ದಿನಗಳ ನಂತರ ಚಿತ್ರರಂಗದಲ್ಲಿ ನಡೆದ ಅದ್ಧೂರಿ ಕಾರ್ಯಕ್ರಮ ವಾದ್ದರಿಂದ ಪರಸ್ಪರ ಹೊಗಳಿಕೆ, ಸ್ನೇಹದ ಅಪ್ಪುಗೆಗಳು ಅಭಿಮಾನಿಗಳ ಖುಷಿಯನ್ನು ದುಪ್ಪಟ್ಟು ಮಾಡುವಂತಿಲ್ಲ.
ಜಯಣ್ಣ ಬಜೆಟ್‌ ಲೆಕ್ಕ ಹಾಕಿ ಸಿನಿಮಾ ಮಾಡಿಲ್ಲ: ಚಿತ್ರದ ಬಗ್ಗೆ ಮಾತನಾಡಿದ ಶಿವಣ್ಣ “ಸಿನಿಮಾ ಅದ್ಭುತವಾಗಿ ಮೂಡಿಬಂದಿದೆ. ನಿರ್ದೇಶಕ ಹರ್ಷ ಒಂದೊಳ್ಳೆಯ ತಂಡದೊಂದಿಗೆ ಇಡೀ ಸಿನಿಮಾವನ್ನು ತುಂಬಾ ನೀಟಾಗಿ ಕಟ್ಟಿಕೊಟ್ಟಿದ್ದಾರೆ. ನಾನಂತು ಈ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆ ಇಟ್ಟಿದ್ದೇನೆ. ಈ ಚಿತ್ರದ ಮೂಲಕ ಹೊಸಬರು ಕೂಡಾ ತೆರೆಮೇಲೆ ಬರುತ್ತಿದ್ದಾರೆ. ನಿರ್ಮಾಪಕ ಜಯಣ್ಣ ಅವರ ಸಿನಿಮಾ ಪ್ರೀತಿಯನ್ನು ಮೆಚ್ಚಲೇಬೇಕು. ಒಂದೊಳ್ಳೆಯ ಸಿನಿಮಾಕ್ಕೆ ಏನು ಬೇಕೋ ಅದನ್ನು ನೀಡಲು ಜಯಣ್ಣ ಯಾವತ್ತೂ ಹಿಂದೇಟು ಹಾಕಿಲ್ಲ. ಸೆಟ್‌ವೊಂದು ಬೆಂಕಿಯಲ್ಲಿ ಸುಟ್ಟು ಹೋದಾಗ ಸಹಜವಾಗಿಯೇ ನನಗೆ ಬೇಸರವಾಯಿತು. ಆದರೂ ಜಯಣ್ಣ, “ಶಿವಣ್ಣ ನೀವು ಮನೆಗೆ ಹೋಗಿ, ನಾವು ನೋಡಿಕೊಳ್ಳುತ್ತೇವೆ’ ಎಂದರು. ಆದರೂ ಬಿಟ್ಟು ಬರೋಕೆ ಮನಸ್ಸಾಗಲಿಲ್ಲ. ಕೊನೆಗೆ ಮನೆಗೆ ಬರುವಷ್ಟರಲ್ಲಿ ಜಯಣ್ಣನಿಂದ ಫೋನ್‌ ಬಂತು, “ಅದೇ ತರಹದ ಬೇರೆ ಸೆಟ್‌ ಹಾಕುತ್ತೇವೆ’ ಎಂದು. ಅದು ಜಯಣ್ಣ ಅವರ ಸಿನಿಮಾ ಪ್ರೀತಿ. ಅದರಂತೆ ಅದಕ್ಕಿಂತ ದೊಡ್ಡದಾದ ಸೆಟ್‌ ಹಾಕಿ ಚಿತ್ರೀಕರಿಸಿದ್ದೇವೆ’ ಎಂದ ಶಿವಣ್ಣ, ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಯಶ್, ಪುನೀತ್‌ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು
