ಲಂಕಾ ಸಂಸತ್‌ ವಿಸರ್ಜನೆ ಜನವರಿಯಲ್ಲಿ ಚುನಾವಣೆ?

ಕೊಲಂಬೋ: ಶ್ರೀಲಂಕೆಯ ಸಂಸತ್‌ ಅನ್ನು ಅಧ್ಯಕ್ಷ ಮೈತ್ರಿಪಾಲ ಸಿರಿಸೇನಾ ಶುಕ್ರವಾರ ವಿಸರ್ಜಿಸಿದ್ದಾರೆ. ಹೊಸ ಸಂಸತ್‌ ಆಯ್ಕೆಯಾಗಿ ಜನವರಿಯಲ್ಲಿ ನಡೆಯುವ ಸಾಧ್ಯತೆ ಇದೆ. 2020ರಲ್ಲಿ ಹಾಲಿ ಸಂಸತ್‌ನ ಅವಧಿ ಮುಕ್ತಾಯವಾಗಿ ಚುನಾವಣೆ ನಡೆಯಬೇಕಾಗಿತ್ತು. ಪ್ರಧಾನಿ ಹುದ್ದೆಯಿಂದ ರನಿಲ್‌ ವಿಕ್ರಮ ಸಿಂಘೆ ಅವರನ್ನು ತೆಗೆದು ಹಾಕಿ ಮಾಜಿ ಅಧ್ಯಕ್ಷ ಮಹಿಂದ ರಾಜಪಕ್ಸೆ ಅವರನ್ನು ಪ್ರಧಾನಿಯಾಗಿ ನೇಮಿಸಿದ ಬಳಿಕ ಅಧಿಕಾರಕ್ಕಾಗಿ ಮುಸುಕಿನ ಗುದ್ದಾಟ ನಡೆಯುತ್ತಿತ್ತು. ರಾಜಪಕ್ಸೆ ಅವರ ಯುನೈಟೆಡ್‌ ಪೀಪಲ್ಸ್‌ ಫ್ರೀಡಂ ಅಲಯನ್ಸ್‌ (ಯುಪಿಎಫ್ಎ) ಪಕ್ಷದ ಪರವಾಗಿ 105-106 ಸಂಸತ್‌ ಸದಸ್ಯರ ಬಲವಷ್ಟೇ ಸಿಕ್ಕಿತ್ತು. ಹೀಗಾಗಿ ಸಂಸತ್‌ ವಿಸರ್ಜನೆಯ ನಿರ್ಧಾರ ಕೈಗೊಳ್ಳಲಾಗಿದೆ.