ವಿದ್ಯಾರ್ಥಿಗಳ ರಕ್ಷಣೆಗೆ ಸ್ಪೈಸ್‌ ಜೆಟ್‌, ಇಂಡಿಗೋ ವಿಮಾನ

ನವದೆಹಲಿ: ಉಕ್ರೇನ್‌ನಿಂದ ಭಾರತೀಯ ವಿದ್ಯಾರ್ಥಿಗಳನ್ನು ಪಾರು ಮಾಡುವ ಕೆಲಸ ಬಿರುಸುಪಡೆದುಕೊಂಡಿದೆ. ಏರ್‌ ಇಂಡಿಯಾ ಜತೆಗೆ ಸ್ಪೈಸ್‌ ಜೆಟ್‌, ಏರ್‌ ಇಂಡಿಯಾ ಎಕ್ಸ್‌ಪ್ರೆಸ್‌, ಇಂಡಿಗೋ ವಿಮಾನಯಾನ ಸಂಸ್ಥೆಗಳು ಕೂಡ ಹಂಗೇರಿ ರಾಜಧಾನಿ ಬುಡಾಫೆಸ್ಟ್‌ ಮತ್ತು ರೊಮೇನಿಯಾದ ರಾಜಧಾನಿ ಬುಕಾರೆಸ್ಟ್‌ನಿಂದ ಸೋಮವಾರ ಮತ್ತು ಮಂಗಳವಾರ ವಿಶೇಷ ವಿಮಾನ ಸಂಚಾರ ಏರ್ಪಡಿಸಲು ಒಪ್ಪಿಕೊಂಡಿವೆ.

ಟಾಟಾ ಗ್ರೂಪ್‌ ಮಾಲೀಕತ್ವದ ಏರ್‌ಇಂಡಿಯಾ ಇದುವರೆಗೆ ಆರು ವಿಮಾನಗಳ ಮೂಲಕ 1,396 ಮಂದಿ ವಿದ್ಯಾರ್ಥಿಗಳನ್ನು ಕರೆದುಕೊಂಡು ಬಂದಿದೆ. ಇದೇ ವೇಳೆ, 249 ಮಂದಿ ಪ್ರಯಾಣಿಕರನ್ನೊಳಗೊಂಡ ಏರ್‌ ಇಂಡಿಯಾ ವಿಮಾನ ಬುಕಾರೆಸ್ಟ್‌ನಿಂದ ನವದೆಹಲಿಗೆ ಆಗಮಿಸಿದೆ.

ಖಾಸಗಿ ಕ್ಷೇತ್ರದ ಮತ್ತೊಂದುವಿಮಾನಯಾನ ಸಂಸ್ಥೆ ಸೆùಸ್‌ ಜೆಟ್‌ ತಾನು ಹೊಂದಿರುವ ಬೋಯಿಂಗ್‌ 737 ಮ್ಯಾಕ್ಸ್‌ ವಿಮಾನವನ್ನು ಬಳಕೆ ಮಾಡಲಿದೆ. ಅದು ಜಾರ್ಜಿಯಾದ ಕುಟೈಸಿ ಮೂಲಕ ಹಾರಾಟ ನಡೆಸಲಿದೆ. ಇದರ ಹೆಚ್ಚುವರಿಯಾಗಿಯೂ ವಿಮಾನಗಳ ಹಾರಾಟ ನಡೆಸಲಿದೆ. ಮಂಗಳವಾರ ಬೆಳಗ್ಗೆ 9.30ಕ್ಕೆ ಏರ್‌ ಇಂಡಿಯಾ ವಿಮಾನ ಬುಕಾರೆಸ್ಟ್‌ನಿಂದ ಮುಂಬೈಗೆ ಆಗಮಿಸಲಿದೆ.

ಮುಂದೂಡಿಕೆ:
ಇದೇ ವೇಳೆ, ಸಕ್ರಿಯ ಅಂತಾರಾಷ್ಟ್ರೀಯ ವಿಮಾನ ಸಂಚಾರವನ್ನು ಪುನಾರಂಭಿಸುವ ನಿರ್ಧಾರವನ್ನು ಕೇಂದ್ರ ಸರ್ಕಾರ ಅನಿರ್ದಿಷ್ಟಾವಧಿಗೆ ಮುಂದೂಡಿದೆ. ಹಾಲಿ ಇರುವ ನಿಯಮ ಪ್ರಕಾರ ಫೆ.28ಕ್ಕೆ ಅದು ಮುಕ್ತಾಯಗೊಳ್ಳಬೇಕಾಗಿತ್ತು.

ವಿಮಾನಗಳು ಬಂದದ್ದೆಲ್ಲಿಂದ?
4  – ಬುಕಾರೆಸ್ಟ್‌
2- ಬುಡಾಫೆಸ್ಟ್‌
1,396- ಆರು ವಿಮಾನಗಳಲ್ಲಿ ಬಂದ ವಿದ್ಯಾರ್ಥಿಗಳು
3- ಮುಂದಿನ 24 ಗಂಟೆಗಳಲ್ಲಿ ಬರಲಿರುವ ವಿದ್ಯಾರ್ಥಿಗಳು
8,000 ಮಂದಿ- ಉಕ್ರೇನ್‌ನಿಂದ ಆಗಮಿಸಿದವರ ಒಟ್ಟು ಸಂಖ್ಯೆ