ಇಂದಿರಾ ಕ್ಯಾಂಟೀನ್‌ಗೆ ಕುಷ್ಟಗಿಯಲ್ಲಿ ಜಾಗೆ ನಿಗದಿ

ಕುಷ್ಟಗಿ: ಹಿಂದಿನ ಸರ್ಕಾರ ಮಹತ್ವಾಕಾಂಕ್ಷಿ ಯೋಜನೆ ಇಂದಿರಾ ಕ್ಯಾಂಟೀನ್‌ಗೆ ಪಟ್ಟಣದಲ್ಲಿ ಕೊನೆಗೂ ಜಾಗೆ ಸಿಕ್ಕಿದೆ. ಕುಷ್ಟಗಿ ಪಟ್ಟಣ ವ್ಯಾಪ್ತಿಯಲ್ಲಿ ಇಂದಿರಾ ಕ್ಯಾಂಟೀನ್‌ ಗೆ ಸೂಕ್ತ ಜಾಗೆ ಕುರಿತು ಜಿಲ್ಲಾಡಳಿತ ವರದಿ ನೀಡುವಂತೆ ಪುರಸಭೆಗೆ ಆದೇಶಿಸಿತ್ತು. ಸದರಿ ಆದೇಶದ ಅನುಸಾರ ಕುಷ್ಟಗಿ ಎಪಿಎಂಸಿ ಗಂಜ್‌ಯಾರ್ಡ್‌, ಬಸ್‌ ನಿಲ್ದಾಣ, ಜೆಸ್ಕಾಂ ಎಇಇ ಕಚೇರಿ ಬಳಿ ಜಾಗೆ ಪರಿಶೀಲಿಸಿ ಮೂರು ಸ್ಥಳಗಳಲ್ಲಿ ಸೂಕ್ತ ಆಯ್ಕೆಗೆ ಜಿಲ್ಲಾಡಳಿತದ ವಿವೇಚನೆಗೆ ಬಿಡಲಾಗಿತ್ತು. ಈ ಮೂರು ಸ್ಥಳಗಳು ಪರಿಗಣನೆಗೆ ಬರಲಿಲ್ಲ.

ಕಾಲಹರಣ ಆಗುವುದನ್ನು ಅರಿತ ಶಾಸಕರು, ಇದೀಗ ಕಾರ್ಗಿಲ್‌ ವೃತ್ತದ ಬಳಿ, ಸರ್ಕಾರಿ ಬಾಲಕಿಯರ ಪಪೂ ಕಾಲೇಜ್‌ ಎದುರಿನ ಬಸ್‌ ಡೀಪೋ ಆವರಣಗೋಡೆ ಒಡೆದು ಅದರಲ್ಲಿ ನಿಗದಿತ ಜಾಗೆ ಬಳಸಿಕೊಳ್ಳಲು ಉದ್ದೇಶಿಸಲಾಗಿದೆ. ಈ ಜಾಗೆಯನ್ನು ಅಂತಿಮಗೊಳಿಸಲಾಗಿದ್ದು, ಸಂಬಂಧಿಸಿದ ಗುತ್ತಿಗೆದಾರರು ಇಂದಿರಾ ಕ್ಯಾಂಟೀನ್‌ ಕಾಮಗಾರಿ ಆರಂಭಿಸುವುದೊಂದೇ ಬಾಕಿ ಇದೆ. ಈ ಹಿನ್ನೆಲೆಯಲ್ಲಿ ಪುರಸಭೆ ಸಂಬಂಧಿಸಿದ ಗುತ್ತಿಗೆದಾರರಿಗೆ ಜಿಲ್ಲಾ ನಗರಾಭಿವೃದ್ಧಿ ಕೋಶದ ಯೋಜನಾಧಿ ಕಾರಿಗೆ ಪತ್ರ ಬರೆಲಾಗಿದೆ ಎಂದು ಪುರಸಭೆ ಕಚೇರಿ ವ್ಯವಸ್ಥಾಪಕ ಪ್ರಹ್ಲಾದ್‌ ಜೋಶಿ ಮಾಹಿತಿ ನೀಡಿದರು.