ಮಾಸಾಂತ್ಯಕ್ಕೆ ಮೊದಲೇ ಕೇರಳಕ್ಕೆ ಮುಂಗಾರು?

ಹೊಸದಿಲ್ಲಿ: ಈ ಬಾರಿ ಮೇ 30ಕ್ಕೆ ಮೊದಲೇ ಮುಂಗಾರು ಕೇರಳಕ್ಕೆ ಪ್ರವೇಶಿಸಲಿದೆ ಎಂದು ಹವಾಮಾನ ಇಲಾಖೆ ಹೇಳಿದೆ. ಈ ಮೂಲಕ ರೈತರಿಗೆ ಸಂತಸದ ಸುದ್ದಿ ಕೊಟ್ಟಿದೆ. ಮಾನ್ಸೂನ್‌ ನಿಗದಿಗೂ ಮುಂಚೆ ಆಗಮಿಸುವ ವಾತಾವರಣ ನಿರ್ಮಾಣವಾಗಿದೆ ಎಂದು ಭೂವಿಜ್ಞಾನ ಸಚಿವಾಲಯದ ಕಾರ್ಯದರ್ಶಿ ಎಂ. ರಾಜೀವನ್‌ ಅವರು ಹೇಳಿದ್ದಾರೆ. ಮೇ 30ರ ಮೊದಲೇ ಮುಂಗಾರು ಪ್ರವೇಶಿಸಿದಲ್ಲಿ, ಕರ್ನಾಟಕ ಕರಾಧಿವಳಿಗೆ ಮೂರು ದಿನಗಳಲ್ಲಿ ಮುಂಗಾರು ಪ್ರವೇಶವಾಗಲಿದೆ.

ಈ ಮೊದಲು ಹವಾಮಾನ ಇಲಾಖೆ ಮೇ 30ರಂದು ಮುಂಗಾರು ಆಗಮಿಸುವುದಾಗಿ ಹೇಳಿತ್ತು. ಆದರೆ ಇದೀಗ ಅದಕ್ಕೂ ಮೊದಲೇ ಬರುವ ನಿರೀಕ್ಷೆಗಳು ದಟ್ಟವಾಗಿದೆ ಎಂದು ಅವರು ಹೇಳಿದ್ದಾರೆ. ಸಾಮಾನ್ಯವಾಗಿ ಜೂ. 1ರಂದು ಮಾನ್ಸೂನ್‌ ಕೇರಳ ಕರಾವಳಿ ಪ್ರವೇಶಿಸುತ್ತದೆ. ಅಲ್ಲದೇ ಈ ಬಾರಿ ಎಲ್‌ನಿನೋ ಎಫೆಕ್ಟ್ ಕಡಿಮೆಯಾಗಿದ್ದು, ಮಳೆ ವಾಡಿಕೆಯಂತೆ ಇರಲಿದೆ ಎಂದು ಹವಾಮಾನ ಇಲಾಖೆ ಹೇಳಿದೆ. ಈ ಬಾರಿ ಮುಂಗಾರು ಅವಧಿಯಲ್ಲಿ ಮೋಡ ಬಿತ್ತನೆಯ ಕಾರ್ಯಸಾಧ್ಯತೆ ಬಗ್ಗೆ ಸಚಿವಾಲಯ ಅಧ್ಯಯನ ಕೈಗೊಳ್ಳಲಿದೆ ಎಂದೂ ರಾಜೀವನ್‌ ತಿಳಿಸಿದ್ದಾರೆ.