Park Bo Ram: 30ರ ಹರೆಯದಲ್ಲಿ ಇಹಲೋಕ ತ್ಯಜಿಸಿದ ಖ್ಯಾತ ಗಾಯಕಿ; ಕಾರಣ ನಿಗೂಢ

ನವದೆಹಲಿ:  ದಕ್ಷಿಣ ಕೊರಿಯಾದ ಗಾಯಕಿ ಪಾರ್ಕ್ ಬೋ ರಾಮ್ ತನ್ನ 30ನೇ ವಯಸ್ಸಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ.

ಕೆ-ಪಾಪ್ ಗಾಯಕಿಯ ನಿಧನ ಸುದ್ದಿಯನ್ನು ಕೇಳಿ ದಕ್ಷಿಣ ಕೊರಿಯಾದ ಮ್ಯೂಸಿಕ್‌ ಇಂಡಸ್ಟ್ರಿ ಶಾಕ್‌ ಆಗಿದೆ.

ಪಾರ್ಕ್ ಬೋ ರಾಮ್ ಸಾವಿನ ಸುದ್ದಿಯನ್ನು ಆಕೆಯ ಏಜೆನ್ಸಿ ಖಚಿತಪಡಿಸಿದೆ.  ಏಪ್ರಿಲ್ 11 ರಂದು ತಡರಾತ್ರಿ ಪಾರ್ಕ್‌ ಬೋ ರಾಮ್ ಹಠಾತ್ ನಿಧನರಾದರೆಂದು ಹೇಳಲು ನಮಗೆ ಅತೀವ ದುಃಖವಾಗುತ್ತಿದೆ. ಪಾರ್ಕ್ ಬೋ ರಾಮ್ ಅವರನ್ನು ಬೆಂಬಲಿಸುವ ಎಲ್ಲಾ ಅಭಿಮಾನಿಗಳಿಗೆ ನಾವು ಈ ಹಠಾತ್ ಸುದ್ದಿಯನ್ನು ಹೇಳಬೇಕಾಗಿರುವುದು ಇನ್ನಷ್ಟು ದುಃಖಕರವಾಗಿದೆ ಎಂದು ಕ್ಸಾನಾಡು ಎಂಟರ್‌ಟೈನ್‌ಮೆಂಟ್ ಹೇಳಿದೆ.

ಪಾರ್ಕ್ ಬೋ ರಾಮ್ ಈ ವರ್ಷ ಸಂಗೀತ ಕ್ಷೇತ್ರದಲ್ಲಿ 10 ವರ್ಷಗಳನ್ನು ಪೂರ್ಣಗೊಳಿಸಲಿದ್ದರು. ಈ ಸಂದರ್ಭದಲ್ಲಿ ಹೊಸ ಹಾಡನ್ನು ಬಿಡುಗಡೆ ಮಾಡಲು ತಯಾರಿ ನಡೆಸುತ್ತಿದ್ದರು ಎಂದು ವರದಿಯಾಗಿದೆ.

ಪಾರ್ಕ್ ಬೋ ರಾಮ್ ಅವರು ಸಾಯುವ ಕೆಲ ಗಂಟೆಗಳ ಮೊದಲು ಸ್ನೇಹಿತರೊಂದಿಗೆ ಪಾರ್ಟಿಯಲ್ಲಿದ್ದರು. ಈ ವೇಳೆ ಅವರು ಮದ್ಯಪಾನ ಮಾಡುತ್ತಿದ್ದರು. ಗಾಯಕಿ ರಾತ್ರಿ 9:55 ಕ್ಕೆ ವಾಶ್‌ರೂಮ್‌ಗೆ ಹೋಗುವುದಾಗಿ ಹೇಳಿ ಹೋದವರು ವಾಪಾಸ್‌ ಬಾರದೇ ಇರುವುದನ್ನು ಕಂಡಾಗ ಅವರ ಸ್ನೇಹಿತರು ವಾಶ್‌ ರೂಮ್‌ ನತ್ತ ಹೋಗಿದ್ದಾರೆ. ಆದರೆ ಈ ವೇಳೆ ಅವರು ಸಿಂಕ್‌ ಬಳಿ ಪ್ರಜ್ಞಾಹೀನರಾಗಿ ಬಿದ್ದಿದ್ದರು. ತಕ್ಷಣ ಅವರನ್ನು ಸಿಪಿಆರ್‌ ನೀಡಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆದರೆ ರಾತ್ರಿ 11:17 ಕ್ಕೆ ಅವರು ಸಾವನ್ನಪ್ಪಿದ್ದಾರೆ ಎಂದು ವರದಿ ತಿಳಿಸಿದೆ.

2010 ರಲ್ಲಿ Mnet ಆಡಿಷನ್ ಪ್ರೋಗ್ರಾಂ ‘ಸೂಪರ್‌ಸ್ಟಾರ್ K2’ ನಲ್ಲಿ ಭಾಗವಹಿಸಿದ ನಂತರ ಪಾರ್ಕ್ ಬೊ ರಾಮ್ ಖ್ಯಾತಿಯನ್ನು ಗಳಿಸಿದ್ದರು. ಇದಾದ ಬಳಿಕ 2014 ರಲ್ಲಿ ʼಬ್ಯೂಟಿಫುಲ್‌ʼ ಹಾಡಿನ ಮೂಲಕ ಪಾಪ್‌ ಮ್ಯೂಸಿಕ್‌ ಇಂಡಸ್ಟ್ರಿಗೆ ಕಾಲಿಟ್ಟರು. ಅದೇ ವರ್ಷ ಅವರು 2014 ರ ಗಾಂವ್ ಚಾರ್ಟ್ ಸಂಗೀತ ಪ್ರಶಸ್ತಿಗಳಲ್ಲಿ ವರ್ಷದ ಕಲಾವಿದ ಪ್ರಶಸ್ತಿಯನ್ನು ಗೆದ್ದರು. 2015 ರಲ್ಲಿ, ಪಾರ್ಕ್ ‘ಸೆಲೆಪ್ರೆಟಿ’ ಎನ್ನು ಆಲ್ಬಂನ್ನು ರಿಲೀಸ್‌ ಮಾಡಿದ್ದರು. ʼ ಹೈವಾಡಾಂಗ್ʼ, ʼ Please Say Something Even Though I know It’s a Lieʼ ಮುಂತಾದ ಹಾಡುಗಳಿಂದ ಖ್ಯಾತಿ ಗಳಿಸಿದ್ದರು.

ಎರಿಕ್ ನ್ಯಾಮ್, ಪಾರ್ಕ್ ಕ್ಯುಂಗ್, ಪಾರ್ಕ್ ಜೇ ಜಂಗ್, ಲಿಲ್ ಬೋಯಿ ಮತ್ತು ಹುಹ್ ಗಕ್ ಸೇರಿದಂತೆ ಕೊರಿಯಾದಲ್ಲಿ ಅನೇಕ ಕಲಾವಿದರೊಂದಿಗೆ ಕೆಲಸ ಮಾಡಿದ್ದರು.

ಏಪ್ರಿಲ್ 3 ರಂದು ಪಾರ್ಕ್ ಬೋ ರಾಮ್ ಅವರು ‘ಐ ಮಿಸ್ ಯು’ ಎಂಬ ಹಾಡನ್ನು ಬಿಡುಗಡೆ ಮಾಡಿದರು. ಇದು ಈಗ ಯೂಟ್ಯೂಬ್‌ನಲ್ಲಿ 211k ವೀಕ್ಷಣೆ ಕಂಡಿದೆ.

ಸದ್ಯ ಅವರ ನಿಗೂಢ ಸಾವಿನ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.