ಉಡುಪಿ: ದಕ್ಷಿಣ ಆಫ್ರಿಕಾದ ರಾಷ್ಟ್ರೀಯ ಶ್ವಾನ ರೊಡೇಷನ್‌ ರಿಡ್ಜ್ ಬ್ಯಾಕ್‌ ಈಗ ಉಡುಪಿಯ ಬ್ರಹ್ಮಗಿರಿಯಲ್ಲಿದೆ. ದಕ್ಷಿಣಾ ಆಫ್ರಿಕಾದಲ್ಲಿ ಶಿಕಾರಿ ಹಾಗೂ ಕಾವಲು ಕಾಯಲು ಇದನ್ನು ಹೆಚ್ಚಾಗಿ ಬಳಕೆ ಮಾಡಲಾಗುತ್ತದೆ.
ಭಾರತ ದೇಶದಲ್ಲಿಯೇ ಬೆರಳೆಣಿಕೆ ಸಂಖ್ಯೆಯಲ್ಲಿರುವ ಈ ಶ್ವಾನವನ್ನು ಬ್ರಹ್ಮಗಿರಿಯ ವಿಶ್ವನಾಥ ಕಾಮತ್‌ ಹಾಗೂ ಪ್ರಿಯಾ ಕಾಮತ್‌ ದಂಪತಿ ಚೆನ್ನೈಯ ಶ್ವಾನಪ್ರಿಯರೊಬ್ಬರಿಂದ 1.10 ಲ.ರೂ. ಪಾವತಿಸಿ ಖರೀದಿಸಿದ್ದಾರೆ. ಈಗಾಗಲೇ ಇವರ ಮನೆಯಲ್ಲಿ ಡಾಬರ್‌ಮನ್‌, ಅಮೆರಿಕನ್‌ ಬುಲ್ಲಿ, ಲ್ಯಾಬ್ರೆಡರ್‌, ಪಗ್‌ ತಳಿಯ ಒಟ್ಟು 9 ಶ್ವಾನಗಳಿವೆ. ಇದಕ್ಕಾಗಿ ದಿನನಿತ್ಯ ಅವರು 1 ಸಾವಿರ ರೂ.ಗಳನ್ನು ವ್ಯಯಿಸುತ್ತಾರಂತೆ.
ಸಿಂಹವನ್ನು ಕೊಲ್ಲುವ ತಾಕತ್ತು
ಇದು ಅಪಾಯಕಾರಿ ಶ್ವಾನವಾಗಿದ್ದು, ಏಕಕಾಲದಲ್ಲಿ ನಾಲ್ಕು ಶ್ವಾನಗಳು ಸೇರಿದರೆ ಒಂದು ಸಿಂಹವನ್ನು ಕೊಲ್ಲುವಷ್ಟು ತಾಕತ್ತು ಹೊಂದಿದೆ. ಈ ಶ್ವಾನದ ಭುಜದಿಂದ ಸೊಂಟದವರೆಗೆ ಪಟ್ಟಿ ಹೊಂದಿದೆ. ಕರಾವಳಿ ಕ್ಯಾನಲ್‌ನಲ್ಲಿ ಸರ್ಟಿಫೈಡ್‌ ಪಡೆದ ಶ್ವಾನ ಇದಾಗಿದೆ. ಕನಿಷ್ಠ 9ರಿಂದ 13 ವರ್ಷಗಳ ಕಾಲ ಇದು ಬದುಕುತ್ತದೆ.
ಚಾಂಪಿಯನ್‌ ಮಾಡುವ ಹಂಬಲ
ಈ ನಾಯಿಯನ್ನು ಮಾಲಕರು ಚಾಂಪಿಯನ್‌ ಮಾಡಿಸುವ ಉದ್ದೇಶ ಹೊಂದಿದ್ದಾರೆ. 8 ವರ್ಷಗಳ ಹಿಂದೆ ಇವರೇ ಸಾಕಿದ ಡಾಮರ್‌ಮನ್‌ ನ್ಯಾಶನಲ್‌ ಲೆವೆಲ್‌ ಚಾಂಪಿಯನ್‌ ಆಗಿತ್ತು.
Related Articles
ಮಕ್ಕಳಂತೆ ಸಾಕುತ್ತಿದ್ದೇವೆ
ಈ ಶ್ವಾನವನ್ನು ಮನೆಯ ಮಕ್ಕಳಂತೆ ಸಾಕಿ ಸಲಹುತ್ತಿದ್ದೇವೆ. ಪ್ರಸ್ತುತ ಇರುವ ಶ್ವಾನಗಳೂ ಯಾವುದೇ ಹಾನಿ ಮಾಡದಂತೆ ಎಲ್ಲ ರೀತಿಯ ಮುನ್ನೆಚ್ಚರಿಕೆಗಳನ್ನೂ ಮನೆಯಲ್ಲಿ ತೆಗೆದುಕೊಳ್ಳಲಾಗುತ್ತಿದೆ. ಶ್ವಾನಗಳ ಬಗೆಗೆ ಹಲವಾರು ಸ್ಟಾಂಪ್‌ಗ್ಳನ್ನೂ ಸಂಗ್ರಹಿಸಿದ್ದೇವೆ.
-ವಿಶ್ವನಾಥ ಕಾಮತ್‌, ಪ್ರಿಯಾ ಕಾಮತ್‌, ಶ್ವಾನದ ಮಾಲಕರು