ದ.ಆಫ್ರಿಕಾ “ಎ’ತಂಡದ ಭಾರತ ಪ್ರವಾಸ

ಜೊಹಾನ್ಸ್‌ಬರ್ಗ್‌: ದಕ್ಷಿಣ ಆಫ್ರಿಕಾ “ಎ’ ತಂಡ ಆಗಸ್ಟ್‌-ಸೆಪ್ಟಂಬರ್‌ನಲ್ಲಿ ಭಾರತ ಪ್ರವಾಸ ಕೈಗೊಳ್ಳಲಿದೆ. ಈ ಪ್ರವಾಸದ ವೇಳೆ ತಂಡವು 5 ಪಂದ್ಯಗಳ ಅನಧಿಕೃತ ಏಕದಿನ ಸರಣಿ ಮತ್ತು 2 ಚತುರ್ದಿನ ಪಂದ್ಯಗಳನ್ನು ಆಡಲಿದೆ.

ದಕ್ಷಿಣ ಆಫ್ರಿಕಾ “ಎ’ ತಂಡದ ನಾಯಕರಾಗಿ ಐಡನ್‌ ಮಾರ್ಕ್‌ ರಮ್‌ ಮತ್ತು ಏಕದಿನ ತಂಡದ ನಾಯಕರಾಗಿ ಟೆಂಬ ಬವುಮ ಅವರನ್ನು ಕ್ರಿಕೆಟ್‌ ದ. ಆಫ್ರಿಕಾ (ಸಿಎಸ್‌ಎ) ನೇಮಕ ಮಾಡಿದೆ.

ದಕ್ಷಿಣ ಆಫ್ರಿಕಾದ ಸೀನಿಯರ್‌ ತಂಡ ಈ ವರ್ಷಾಂತ್ಯದಲ್ಲಿ ಭಾರತ ಪ್ರವಾಸಗೈಯುವ ಕಾರಣ ಈ ಕೂಟವು ತಂಡದಲ್ಲಿರುವ ಕೆಲವು ಆಟಗಾರರಿಗೆ ನಿರ್ಣಾಯಕವಾಗಿದೆ. ಇಲ್ಲಿ ಉತ್ತಮ ನಿರ್ವಹಣೆ ನೀಡಿದಲ್ಲಿ ಸೀನಿಯರ್‌ ತಂಡಕ್ಕೆ ಆಯ್ಕೆಯಾಗಬಹುದಾಗಿದೆ.

ಐದು ಪಂದ್ಯಗಳ ಏಕದಿನ ಸರಣಿ ತಿರುವನಂತಪುರದಲ್ಲಿ ನಡೆಯಲಿದೆ. ಚತುರ್ದಿನ ಪಂದ್ಯ ವಯನಾಡ್‌ ಮತ್ತು ಮೈಸೂರಿನಲ್ಲಿ ಜರಗಲಿದೆ.

ವಿಶ್ವಕಪ್‌ಗೆ ಆಯ್ಕೆಯಾಗದ ಕೆಲವು ಪ್ರಮುಖ ಆಟಗಾರರಾದ ಹೆನ್ರಿಚ್‌ ಕ್ಲಾಸೆನ್‌, ಬ್ಯೂರನ್‌ ಹೆಂಡ್ರಿಕ್ಸ್‌, ಮಾರ್ಕ್‌ರಮ್‌ ಮತ್ತು ಬವುಮ ಅವರಿಗೆ ಈ ಪ್ರವಾಸ ಪ್ರಮುಖವಾಗಲಿದೆ.