12ರ ಬಾಲಕಿ, 2 ವರ್ಷ, 30 ಅತ್ಯಾಚಾರಿಗಳು!

ಮಲಪ್ಪುರಂ (ಕೇರಳ): ಇಲ್ಲಿನ ತಿರುರಂಗಡಿ ಪೊಲೀಸ್‌ ಠಾಣಾ ವ್ಯಾಪ್ತಿಯ ಆ ಮನೆಗೆ ತೆರಳಿದರೆ, ಮನೆ ಬಾಗಿಲಿನ ಮೇಲೆ “ಸಾರಿ… ಅಮ್ಮ’ ಎಂಬ ಬರಹ ಕಣ್ಣಿಗೆ ರಾಚುತ್ತದೆ. ಎರಡೇ ಕೋಣೆಯ ಆ ಪುಟ್ಟ ಮನೆಯಲ್ಲಿ ಆ 12ರ ಪ್ರಾಯದ ಬಾಲಕಿಯನ್ನು ಕಳೆದೆರಡು ವರ್ಷಗಳಲ್ಲಿ 30ಕ್ಕೂ ಹೆಚ್ಚು ಕಾಮಪಿಶಾಚಿಗಳು ಹುರಿದು ಮುಕ್ಕಿವೆ. ಈಗ ಆ ಪ್ರಕರಣ ಬೆಳಕಿಗೆ ಬಂದಿದ್ದು, ಆಕೆಯನ್ನು ಪಾರು ಮಾಡಿ, ಪುನರ್ವಸತಿ ಕೇಂದ್ರಕ್ಕೆ ಸೇರಿಸಲಾಗಿದೆ. ಆದರೆ, ಮನೆಯಿಂದ ಹೊರಡುವಾಗ ಆ ಬಾಲಕಿ, ಬಾಗಿಲ ಮೇಲೆ “ಸಾರಿ ಅಮ್ಮ’ ಎಂದು ಬರೆದು ಹೋಗಿದ್ದಾಳೆ. ಇದು, ಬಡತನದ ಬೇಗೆ ತಾಳಲಾರದೆ ತನ್ನನ್ನು ಆ ದಂಧೆಗೆ ಇಳಿಸಿದ ಹೆತ್ತಮ್ಮನಿಗೆ ಆ ಬಾಲಕಿ ಕ್ಷಮೆ ಕೇಳಿರುವ ರೀತಿ.

ಮನೆಯಿಂದ 500 ಮೀ. ದೂರದಲ್ಲೇ ಇರುವ ಶಾಲೆಯಲ್ಲಿ 8ನೇ ತರಗತಿ ಓದುತ್ತಿದ್ದ ಈ ಬಾಲಕಿ, ಶಾಲೆಯಲ್ಲಿ ಇತ್ತೀಚೆಗೆ ನಡೆದ ಕೌನ್ಸೆಲಿಂಗ್‌ ವೇಳೆ ನಡೆದ ವಿಷಯ ಬಾಯಿಬಿಟ್ಟಿದ್ದಾಳೆ. ಅಸಲಿಗೆ, ಸರಕಾರಿ ನೌಕರಿ ಕಳೆದುಕೊಂಡು ನಿರುದ್ಯೋಗಿಯಾಗಿದ್ದ ಆಕೆಯ ತಂದೆ, ಬಾಲಕಿಯ ಅಮ್ಮನನ್ನು ವೇಶ್ಯಾವಾಟಿಕೆಗೆ ಇಳಿಸಿ, ಅನಂತರ ಮಗಳನ್ನೂ ಆ ಪಾಪಕೂಪಕ್ಕೆ ತಳ್ಳಿದ್ದಾನೆ ಎಂದು ಆಕೆ ಹೇಳಿದ್ದಾಳೆ. ಆಕೆಯ ತಂದೆ ಸಮೇತ ಮೂವರನ್ನು ಪೋಕ್ಸೋ ಕಾಯ್ದೆಯಡಿ ಪೊಲೀಸರು ಬಂಧಿಸಿದ್ದಾರೆ. ಘಟನೆಯನ್ನು ಗಂಭೀರವಾಗಿ ಪರಿಗಣಿಸಿರುವ ರಾಜ್ಯ ಸರಕಾರ, ರಾಜ್ಯಾದ್ಯಂತ ಇರುವ ಬಡಕುಟುಂಬಗಳಲ್ಲಿನ ಬಾಲಕಿಯರ ಕೌನ್ಸೆಲಿಂಗ್‌ಗೆ ಮುಂದಾಗಿದೆ.