ಸದ್ಯ ಕೋವಿಡ್ 19 ವಿರುದ್ಧ ಹೋರಾಡುತ್ತಿರುವ ಪೊಲೀಸರ ಕಾರ್ಯ ವೈಖರಿಯನ್ನು ಬಿಂಬಿಸುವ ವಿಡಿಯೋ ಹಾಡೊಂದನ್ನು ಖ್ಯಾತ ನಿರ್ಮಾಪಕ ಎಸ್‌.ವಿ ಬಾಬು ತಮ್ಮ ಎಸ್‌.ವಿ.ಪ್ರೊಡಕ್ಷನ್ಸ್‌ ಮೂಲಕ ನಿರ್ಮಿಸಿ ಪೊಲೀಸರಿಗೆ ಸಮರ್ಪಿಸಿದ್ದಾರೆ.
ಎಲ್ಲರ ಸೋದರರು ಇವರು, ಎಲ್ಲರ ಮಿತ್ರರರು ಇವರು ಎಂದು ಆರಂಭವಾಗುವ ಈ ಹಾಡನ್ನು ಶುಕ್ರವಾರ ಬೆಂಗಳೂರು ಪೊಲೀಸ್‌ ಕಮಿಷನರ್‌ ಭಾಸ್ಕರ್‌ ರಾವ್‌ ಬಿಡುಗಡೆ ಮಾಡಿದರು. ಬಳಿಕ ಈ ಹಾಡನ್ನು ವೀಕ್ಷಿಸಿದ ಭಾಸ್ಕರ್‌ ರಾವ್‌ ಅವರು ತುಂಬಾ ಚೆನ್ನಾಗಿದೆ ಎಂಬ ಪ್ರಶಂಸೆಯ ಮಾತುಗಳನ್ನಾಡಿದರು.
ಅಭಿಮಾನ್‌ ರಾಯ್‌ ಈ ಹಾಡಿಗೆ ಸಾಹಿತ್ಯ ಬರೆದು, ಸಂಗೀತ ಸಂಯೋಜಿಸಿ, ಧ್ವನಿಯಾಗಿದ್ದಾರೆ. ಖ್ಯಾತ ನಟ ಸಾಯಿಕುಮಾರ್‌ ಹಾಡಿಗೂ ಮೊದಲು ತಮ್ಮ ಮಾತಿನ ಮೂಲಕ ಪೊಲೀಸರ ಕಾರ್ಯವನ್ನು ಶ್ಲಾಘಿಸಿದ್ದಾರೆ. ಇನ್ನು ಈ ಹಾಡು ಬಿಡುಗಡೆ ವೇಳೆಯಲ್ಲಿ ಎಸ್‌ .ವಿ.ಪ್ರೊಡಕ್ಷನ್ಸ್‌ ನ ಎಸ್‌.ವಿ ಬಾಬು, ನಿರ್ಮಾಪಕ ಸಾ.ರಾ ಗೋವಿಂದು, ಕೆ.ಎಂ ವೀರೇಶ್‌, ಅನಂತು ಮೊದಲಾದವರು ಉಪಸ್ಥಿತರಿದ್ದರು.
ಕೋವಿಡ್ 19 ಲಾಕ್‌ ಡೌನ್‌ ಆರಂಭದ ದಿನದಿಂದ ಪೊಲೀಸ್‌ ಇಲಾಖೆಯ ಸಿಬ್ಬಂದಿ ಜನರಿಗಾಗಿ ಸಾಕಷ್ಟು ಕಷ್ಟ ಪಡುತ್ತಿದ್ದಾರೆ. ಇವರಿಗೆ ಎಷ್ಟು ಧನ್ಯವಾದ ತಿಳಿಸಿದರು ಸಾಲದು.ಮೊದಲಿನಿಂದಲೂ ಸಾಮಾಜಿಕ ಕಾರ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡಿರುವ ಎಸ್‌.ವಿ.ಬಾಬು ಅವರು ಲಾಕ್‌ ಡೌನ್‌ ಆರಂಭವಾದ ದಿನದಿಂದಲೂ ಸುಮಾರು 550ಕ್ಕೂ ಅಧಿಕ ಪೊಲೀಸರಿಗೆ ಬಿಸ್ಕತ್ತು ಮುಂತಾದ ಪದಾರ್ಥಗಳನ್ನು ವಿತರಿಸುತ್ತಿದ್ದಾರೆ. ತಮ್ಮ ಈ ಕಾರ್ಯ ಲಾಕ್‌ ಡೌನ್‌ ಮುಗಿಯುವವರೆಗೂ ಮುಂದುವರೆಸುವುದಾಗಿ ಎಸ್‌.ವಿ.ಬಾಬು ತಿಳಿಸಿದ್ದಾರೆ.
