ಶಿರಾಡಿಘಾಟ್‌ನಲ್ಲಿ ಮಣ್ಣು ತೆರವು ಕಾರ್ಯಾಚರಣೆ ಸ್ಥಗಿತ

ಮಂಗಳೂರು: ಮಂಗಳೂರು -ಹಾಸನ ರೈಲು ಮಾರ್ಗದ ಶಿರಾಡಿ ಘಾಟ್‌ನಲ್ಲಿ ಸುಬ್ರಹ್ಮಣ್ಯ ರೋಡ್‌- ಸಕಲೇಶಪುರ ಮಧ್ಯೆ ಭೂಕುಸಿತ ಮುಂದುವರಿದಿದ್ದು ಪ್ರತಿಕೂಲ ಹವಾಮಾನ ಹಿನ್ನಲೆಯಲ್ಲಿ ರೈಲ್ವೆ ಹಳಿಗಳ ಮೇಲೆ ಬಿದ್ದಿರುವ ಮಣ್ಣು ಹಾಗೂ ಕಲ್ಲುಗಳನ್ನು ತೆರೆವುಗೊಳಿಸುವ ಕಾರ್ಯವನ್ನು ಸ್ಥಗಿತಗೊಳಿಸಲಾಗಿದೆ.

ಸ್ಥಳದಿಂದ ಎಲ್ಲ ರೈಲ್ವೆ ಸಿಬ್ಬಂದಿ ಹಾಗೂ ಕಾರ್ಮಿಕರನ್ನು ತೆರವುಗೊಳಿಸಲಾಗಿದ್ದು, ಸುಬ್ರಹ್ಮಣ್ಯ ರೋಡ್‌ ರೈಲ್ವೆ ನಿಲ್ದಾಣದಲ್ಲಿ ವಾಸ್ತವ್ಯ ಕಲ್ಪಿಸಲಾಗಿದೆ. ಈ ರೈಲುಮಾರ್ಗದಲ್ಲಿನ ಎಲ್ಲ ರೈಲುಗಳ ಸಂಚಾರವನ್ನು ಆ. 23ರ ವರೆಗೆ ರದ್ದುಗೊಳಿಸಲಾಗಿದೆ. ಅಲ್ಲದೆ, ರಾಷ್ಟ್ರೀಯ ಹೆದ್ದಾರಿ -75ರ ಶಿರಾಡಿಘಾಟ್‌ನಲ್ಲಿ ಪ್ರಯಾಣಿಕರ ವಾಹನ, ಅಗತ್ಯ ವಸ್ತುಗಳ ಸಾಗಣೆ ವಾಹನ ಹೊರತುಪಡಿಸಿ, ಉಳಿದ ವಾಹನಗಳ ಸಂಚಾರ ಬಂದ್‌ ಮಾಡಲಾಗಿದೆ.

ಶಿವಮೊಗ್ಗ-ಬೆಂಗಳೂರು ಸಂಚಾರ ಬಂದ್‌
* ಭದ್ರಾವತಿ- ಶಿವಮೊಗ್ಗ ರಸ್ತೆ ಸಂಪೂರ್ಣ ಜಲಾವೃತ. ಶಿವಮೊಗ್ಗದಿಂದ ಬೆಂಗಳೂರಿಗೆ ಸಂಚಾರ ಬಂದ್‌.

* ಶರಾವತಿಯಲ್ಲಿ ಪ್ರವಾಹ, ಸಿಗಂದೂರಿಗೆ ಭಕ್ತರು ಬರದಂತೆ ದೇವಾಲಯದಿಂದ ಮನವಿ.

* ಹಸಿರುಮಕ್ಕಿ- ಸಿಗಂದೂರು ರಸ್ತೆ ಬಂದ್‌, ಕುಂದಾಪುರ, ಮಣಿಪಾಲ್‌ಗೆ ತೆರಳಲು ಇದ್ದ ಮಾರ್ಗ ಬಂದ್‌.

* ಶಿವಮೊಗ್ಗ- ತೀರ್ಥಹಳ್ಳಿ- ಉಡುಪಿ ರಾಷ್ಟ್ರೀಯ ಹೆದ್ದಾರಿ ಸಂಪೂರ್ಣ ಬಂದ್‌.

* ಶಿವಮೊಗ್ಗ- ಹೊನ್ನಾಳಿ ಸಂಚಾರ ಬಂದ್‌.

* ತಾಳಗುಪ್ಪ- ಶಿವಮೊಗ್ಗ-ಮೈಸೂರು- ತಾಳಗುಪ್ಪ ರೈಲು ಸಂಚಾರ ರದ್ದು.

* ರಾಣೇಬೆನ್ನೂರು – ಕೊಲ್ಲೂರು ರಾಷ್ಟ್ರೀಯ ಹೆದ್ದಾರಿ ಸಂಪೂರ್ಣ ಬಂದ್‌.

* ಕೊಚ್ಚಿಹೋದ ಕಳಸ-ಹೊರನಾಡು ರಸ್ತೆ, ಹೊರನಾಡಿಗೆ ಸಂಚಾರ ಬಂದ್‌.

* ಶಿಕಾರಿಪುರ-ಶಿರಾಳಕೊಪ್ಪ -ಸೊರಬ ರಸ್ತೆ ಸಂಪರ್ಕ ಕಡಿತ. ಶಿವಮೊಗ್ಗ-ಮಂಡಗದ್ದೆ-ತೀರ್ಥಹಳ್ಳಿ ರಸ್ತೆ ಕೂಡ ಜಲಾವೃತ. ಮಣಿಪಾಲ್‌ಗೆ ಹೋಗುವವರು ಶಿವಮೊಗ್ಗ-ರಿಪ್ಪನ್‌ಪೇಟೆ- ನಗರ ಮಾರ್ಗವನ್ನು ಬಳಸಬಹುದಾಗಿದೆ. ಸೂಡೂರು ಗೇಟ್‌ ಸೇತುವೆ ಮುಳುಗಡೆಯಾದ ಕಾರಣ ಹೊಸನಗರ-ಶಿವಮೊಗ್ಗ ಸಂಪರ್ಕ ಕಂಡಿತಗೊಂಡಿದೆ.