Germany: ಅಲ್ಪ ಪ್ರಮಾಣದ ಗಾಂಜಾ ಬಳಕೆ ಜರ್ಮನಿ ಅನುಮತಿ 

ಬರ್ಲಿನ್‌: ಮಾದಕವಸ್ತುಗಳ ಕಳ್ಳಸಾಗಣೆ ಮತ್ತು ಅಕ್ರಮ ಬಳಕೆಯನ್ನು ನಿಗ್ರಹಿಸುವ ನಿಟ್ಟಿನಲ್ಲಿ ಗಾಂಜಾ ಮಾರಾಟದ ಮೇಲಿನ ನಿಯಮಗಳನ್ನು ಸರಾಗಗೊಳಿಸಲು ಜರ್ಮನಿ ನಿರ್ಧರಿಸಿದೆ. ಅಲ್ಪಪ್ರಮಾಣದ ಗಾಂಜಾ ಬಳಕೆಗೆ ಅನುಮತಿಸುವ ಯೋಜನೆಯೊಂದಕ್ಕೆ ಅನುಮೋದನೆ ನೀಡಲು ಅಲ್ಲಿನ ಸಚಿವ ಸಂಪುಟ ಸಜ್ಜುಗೊಂಡಿದೆ.

ಆರೋಗ್ಯ ಸಚಿವ ಕಾರ್ಲ್ ಲೌಟರ್‌ ಬಾಕ್‌ ಈ ಕುರಿತಂತೆ ಮಾಹಿತಿ ನೀಡಿದ್ದು, ಪ್ರಸ್ತಾವಿತ ಯೋಜನೆಯು ದೇಶದ 18 ವರ್ಷ ಮೇಲ್ಪಟ್ಟವರು ಮನರಂಜನಾ ಉದ್ದೇಶಗಳಿಗಾಗಿ ತಲಾ 25 ಗ್ರಾಂ ಗಾಂಜಾವನ್ನು ಖರೀದಿಸಲು ಹಾಗೂ ಸ್ವತಃ ಅವರೇ ಮೂರು ಗಾಂಜಾ ಗಿಡಗಳನ್ನು ಬೆಳೆಯಲು ಅವಕಾಶ ಕಲ್ಪಿಸುತ್ತದೆ. ಅಲ್ಲದೇ, ಗಾಂಜಾ ಖರೀದಿಗಾಗಿ ಕ್ಲಬ್‌ಗಳಿಗೂ ಸೇರಬಹುದಾಗಿದ್ದು, ಈ ಕ್ಲಬ್‌ 500 ಸದಸ್ಯರನ್ನು ಮಾತ್ರ ಹೊಂದಲು ಅವಕಾಶ ನೀಡಲಾಗಿದೆ. ಕ್ಲಬ್‌ಗಳಿಂದ ಗಾಂಜಾ ಖರೀದಿಸುವವರಿಗೆ ತಿಂಗಳಿಗೆ 50 ಗ್ರಾಂ ಖರೀದಿಗೆ ಮಾತ್ರ ಅವಕಾಶ ನೀಡಲಾಗಿದ್ದು, 21 ವರ್ಷ ಒಳಗಿನ ವಯಸ್ಸಿನವರಿಗೆ ಈ ಮಿತಿ 30 ಗ್ರಾಂ ಆಗಿರಲಿದೆ ಎಂದಿದ್ದಾರೆ. ಗಾಂಜಾ ಮಾರಾಟ ಮತ್ತು ಸ್ವಾಧೀನಗಳ ಮೇಲಿನ ನಿಯಮಗಳನ್ನು ಉದಾರಗೊಳಿಸಲು ಈ ಯೋಜನೆ ಪ್ರಸ್ತಾಪಿಸಿದ್ದು, ಕ್ಯಾಬಿನೆಟ್‌ ಅನುಮೋದನೆ ಬಳಿಕ ಸಂಸತ್‌ ಅನುಮೋದನೆಗೆ ಕಳುಹಿಸಲಾಗುವುದು ಎಂದೂ ಮಾಹಿತಿ ನೀಡಿದ್ದಾರೆ.